ဇူလိုင် ၂၉၊ ရန်ကုန် ။ ။ ၂၀၁၅ အာဆီယံချန်ပီယံရှစ် ယူ-၁၆ ဘောလုံးပြိုင်ပွဲ ဝင်ပြိုင်နေသော မြန်မာ့လက်ရွေးစင် ယူ-၁၆ အသင်းသည် ပွဲဦးထွက်တွင် စင်ကာပူအသင်းကို အနိုင်ရခဲ့ပြီး လာမည့် လက်ကျန်ပွဲစဉ်များတွင်လည်း ခြေစွမ်း ပိုမိုကောင်းမွန်လာမည်ဟု မြန်မာ ယူ-၁၆ အသင်းနည်းပြ အဲရစ်ဝီလျံက ပြောခဲ့သည်။
အာဆီယံ ယူ-၁၆ ပြိုင်ပွဲ အုပ်စု(ခ)တွင် သြစတြေးလျ၊ ကမ္ဘောဒီးယား၊ ဖိလစ်ပိုင်၊ စင်ကာပူအသင်းများနှင့် တစ်အုပ်စုတည်း ကျရောက်နေသော မြန်မာ ယူ-၁၆ အသင်းသည် ပွဲဦးထွက်တွင် စင်ကာပူအသင်း ကို ၃-၁ ဂိုးဖြင့် အနိုင်ရခဲ့သည်။
' နောက်လာမယ့် အုပ်စု (၃) ပွဲမှာ ကစားပုံ ဒီထက်ပိုကောင်းလာနိုင် ပါဦးမယ်။ ဖိလစ်ပိုင်နဲ့ ပွဲမတိုင်ခင် ရတဲ့ အချိန် (၃) ရက် အတွင်း ကျွန်တော်တို့ အကောင်းဆုံး လေ့ကျင့်ပြင်ဆင်မှုတွေ လုပ်သွားမှာပါ'ဟု နည်းပြ အဲရစ်ဝီလျံက ပြောသည်။
မြန်မာ အသင်းသည် လာမည့် သြဂုတ် ၁ ရက်တွင် ဖိလစ်ပိုင်အသင်း၊ သြဂုတ် ၃ ရက်တွင် သြစတြေးလျအသင်း၊ သြဂုတ် ၅ ရက် တွင် ကမ္ဘောဒီးယားအသင်းတို့နှင့် ကစားရမည်ဖြစ်သည်။ ဇူလိုင် ၂၈ ရက်က ကစားခဲ့သော အုပ်စု(ခ)၏ အခြားပွဲစဉ်တစ်ပွဲ တွင် အိမ်ရှင်ကမ္ဘောဒီးယားအသင်းက ဖိလစ်ပိုင်အသင်းကို ၁-၀ ဂိုးဖြင့် အနိုင်ရခဲ့သည်။
ထို့ကြောင့် အုပ်စု(ခ)တွင် မြန်မာ အသင်းနှင့် ကမ္ဘောဒီးယားအသင်းတို့က တစ်ပွဲ ကစားထားပြီး တစ်ပွဲ အနိုင်ရကာ အမှတ်ပေးဇယားကို ဦးဆောင်လျက်ရှိ သည်။ အုပ်စု(က)တွင် လာအို၊ မလေးရှား၊ ဘရူးနိုင်း၊ တီမော၊ ထိုင်း၊ ဗီယက်နမ်အသင်းတို့ ပါဝင်နေပြီး မလေးရှားအသင်း နှင့် လာအိုအသင်းတို့က ပွဲဦးထွက်တွင် နိုင်ပွဲရရှိထားကြသည်။
