မတ် ၂၂ ။ ။ နိုင်ဂျီးရီးယားနိုင်ငံ အရှေ့မြောက်ပိုင်း၌ ဘိုကိုဟာရမ် သောင်းကျန်းသူများကြောင့် ထွက်ပြေးလာခဲ့ရသော ရွှေ့ပြောင်းနေထိုင်သူများ၏ စခန်း၌ အသေခံဗုံးဖောက်ခွဲမှု ၄ ခုကြောင့် အနည်းဆုံး ၃ ဦးခန့်သေဆုံးခဲ့ပြီး ၂၀ခန့် ဒဏ်ရာရရှိခဲ့ကြောင်း ယနေ့ဗုဒ္ဓဟူးနေ့တွင် အာဏာပိုင်များက ပြောခဲ့သည်။
ပေါက်ကွဲမှုကြောင့် မီးလောင်ကျွမ်းမှုများ ဖြစ်ပွားခဲ့ပြီး မိတ်ဒူဂူရီမြို့ ဆင်ခြေဖုံးနားမှ မူနာစခန်းထဲရှိ တဲအိမ်များကို လောင်ကျွမ်းစေခဲ့ကြောင်း စခန်း၏တာဝန်ရှိသူ တစ်ဂျာနီလူမာနီက ပြောခဲ့သည်။
“စခန်းအတွင်းမှာ ပေါက်ကွဲမှု ၄ ကြိမ်ခန့် ဖြစ်ပွားခဲ့ပါတယ်။ ဗုံးခွဲတိုက်ခိုက်သူများဟာ ဒေသစံတော်ချိန် မနက် ၄နာရီခွဲခန့်မှာ စခန်းထဲရှိ မတူညီတဲ့ နေရာအသီးသီးကို တိုက်ခိုက်ခဲ့ကြပါတယ်” ဟု သူက ပြောခဲ့သည်။
“အသေခံဗုံးဖောက်ခွဲသူ စုစုပေါင်း ၅ ဦးရှိပါတယ်။ အားလုံးဟာ အရွယ်ရောက်ပြီးသား ယောင်္ကျားတွေဖြစ်ကြပြီး လူ ၃ ဦးခန့်ကို သေဆုံးစေခဲ့ပါတယ်” ဟု အမျိုးသားအရေးပေါ်စီမံခန့်ခွဲရေး အေဂျင်စီမှ အက်ဘ််ဒူကာဒါအီဘရာဟမ် က ပြောခဲ့သည်။ ဒဏ်ရာရရှိသူ ၂၀ ခန့်ကို ဆေးရုံ၌ ကုသပေးနေကြောင်းကို လည်း သူက တဆက်တည်းပြောခဲ့သည်။
မူနာစခန်းသည် ဘိုကိုဟာရမ်သောင်းကျန်းသူများ၏ လက်ချက်ကြောင့် ထွက်ပြေးလာခဲ့သော ထောင်သောင်းချီ သည့် ပြည်သူများ ခိုလှုံရာနေရာတစ်ခုဖြစ်သည်။
အစ္စလာမ်အစွန်းရောက်အဖွဲ့တို့သည် နေရပ်စွန့်ခွာ ထွက်ပြေးနေကြသော ပြည်သူများကို ပစ်မှတ်ထား တိုက်ခိုက်မှုများ အကြိမ်ကြိမ်ကျူးလွန်နေကြပြီး မူနာစခန်းအနီး၌ အသေခံဗုံးဖောက်ခွဲမှုများ မကြာခဏပြုလုပ် လျက်ရှိနေသည်။
