မတ် ၂၀ ။ ။ သင်္ကြန်မတိုင်မီ ခရီးသည်များ တစ်နေရာမှ တစ်နေရာ သွားလာရ အဆင်ပြေစေရန် ရန်ကုန်-မန္တလေးပြေးဆွဲနေသည့် ရထားများကို တိုးချဲ့ပြေးဆွဲသွားမည်ဖြစ်ကြောင်း မြန်မာ့မီးရထား သွားလာပို့ဆောင်ရေးဌာနမှ ရန်ကုန်တိုင်းမန်နေဂျာ ဦးဇော်လွင်က ပြောသည်။
သင်္ကြန်နားနီးသည့်ကာလတွင် သွားလာကြသော ခရီးသည်ဦးရေ များပြားသည့်အတွက် ပုံမှန်ပြေးဆွဲနေသော ရထားများအပြင် အထူးရထားများ တိုးချဲ့ပြီး ပြေးဆွဲသွားမည်ဖြစ်သည်။
“ပုံမှန်ပြေးဆွဲနေတဲ့ ရထားတွေအပြင် နောက်ထပ်အထူးရထားတွေကို တိုးချဲ့ပြေးဆွဲသွားမှာပါ သင်္ကြန်ရောက်ရင်တော့ ရထားတွေကို လျော့ချပြီးပြေးဆွဲသွားမှာပါ” ဟု ၎င်းကပြောသည်။
လက်ရှိအချိန်တွင် ရန်ကုန်-မန္တလေး ခရီးသည်တင် ရထားစီးရေ ၈ စီး ပြေးဆွဲနေကြောင်းသိရကာ အဆိုပါအရေအတွက်ထက် တိုးချဲ့ပြေးဆွဲမည် ဖြစ်သည်။
သင်္ကြန်တွင်းကာလတွင် ရန်ကုန်-မန္တလေးရထား လမ်းကြောင်းများနှင့် နေပြည်တော်၊ ပုဂံ စသည့် လမ်းကြောင်းများတွင်လည်း ရထား၂စီး စီ လျော့ချပြေးဆွဲသွားမည်ဖြစ်သော်လည်း သင်္ကြန်အထူး ရထားများ ပြေးဆွဲသွားမည်ဟု သိရသည်။
