ဖေဖော်ဝါရီလ ၂၁ ။ ။ တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးစာချုပ်(NCA) လက်မှတ်မထိုးသေးသော တိုင်းရင်းသားလက်နက်ကိုင်အဖွဲ့အစည်းများ၏ တတိယအကြိမ် မျက်နှာစုံညီ အစည်းအဝေးတွင် ဒုတိယအကြိမ် ၂၁ ရာစု ပင်လုံညီလာခံကျင်းပရေးနှင့် ပတ်သက်သည့် အမြင်သဘောထားနှင့် ရပ်တည်ချက်များ ဆွေးနွေးသွားမည် ဖြစ်ကြောင်း ထုတ်ပြန်လိုက်သည်။
ဝ ပြည်သွေးစည်းညီညွတ်ရေတပ်မတော် (UWSP/UWSA)မှ ကမကထ ကျင်းပပြုလုပ်သော မျက်နှာစုံညီ အစည်းအဝေးက “၀ UWSP ”ဌာနချုပ် ပန်ခမ်းမြို့တွင် မနက်ဖြန် ဖေဖော်ဝါရီလ ၂၂ ရက်နေ့တွင် စတင်ကျင်းပမည် ဖြစ်ကြောင်း ဖေဖော်ဝါရီလ ၂၁ ရက်နေ့က တရားဝင် ကြေညာချက်ထုတ်ပြန်ထားသည်။
ထိုမျက်နှာစုံညီ အစည်းအဝေးသို့ ဖိတ်ကြားထားသော တိုင်းရင်းသားလက်နက်ကိုင် အဖွဲ့အစည်း ၁၀ ဖွဲ့ကို ဖိတ်ကြားထားပြီး ၁၀ ဖွဲ့မှ ၈ ဖွဲ့မှ ကိုယ်စားလှယ်များ တက်ရောက်မည် ဖြစ်ကြောင်း သိရသည်။
ကချင်လွတ်လပ်ရေးအဖွဲ့(KIO/KIA)၊ မြန်မာအမျိုးသား ဒီမိုကရေစီ မဟာမိတ်တပ်ဖွဲ့ (MNDAA)၊ ပလောင် ပြည်လွတ်မြောက်ရေးတပ်ဦး (PSLF/TNLA)၊ ရှမ်းပြည်တိုးတက်ရေးပါတီ၊ ရှမ်းပြည်တပ်မတော်(SSPP/SSA)၊ ရှမ်းပြည်နယ် အရှေ့ပိုင်း အမျိုသား ဒီမိုကရေစီ မဟာမိတ်တပ်ဖွဲ့ (PSA/NDAA)၊ ရက္ခိုင့် တပ်မတော်(ULA/AA)တို့ အပါအဝင် အဖွဲ့အစည်း ၈ ဖွဲ့မှ ကိုယ်စားလှယ်များ တက်ရောက်မည် ဖြစ်ကြောင်း သိရသည်။
ကရင်နီ အမျိုးသားတိုးတက်ရေးပါတီ (KNPP)နှင့် မွန်ပြည်သစ်ပါတီ(NMSP)တို့သည် အခြေအနေ ထူးခြားမှုကြောင်း ထိုအစည်းအဝေးသို့ တက်ရောက်နိုင်ခြင်း မရှိသော်လည်း စာတမ်းတင်သွင်း၍ ပါဝင်သွားမည် ဖြစ်ကြောင်း ထုတ်ပြန်ချက်တွင် ဖော်ပြထားသည်။
အစည်းအဝေးကို ဖေဖော်ဝါရီလ ၂၂ ရက်မှ ၂၄ ရက်နေ့ထိ သုံးရက်ကြာ ကျင်းမည် ဖြစ်သည်။