လွန်ခဲ့သော စက်တင်ဘာလတုန်းက မင်းသားဘရက်ပစ်နှင့် ကွာရှင်းပြတ်ဆဲခဲ့သည့်အကြောင်းကို လူသိရှင်ကြား ထုတ်ဖော်ပြောကြားခဲ့ချိန်တွင် အင်ဂျလီနာဂျိုလီသည် မျက်ရည်များကို ထိန်းနိုင်အောင်ကြိုးစားခဲ့ရသည်။
ဘီဘီစီနှင့်ပြုလုပ်ခဲ့သော အင်တာဗျူး၌ မင်းသမီးလည်းဖြစ်၊ လူ့အခွင့်အရေးလှုပ်ရှားသူလည်းဖြစ်သည့် သူမက လူအများအပြား စိတ်ဝင်စားခဲ့သော သူမနှင့်မင်းသားဘရက်ပစ်တို့၏ လမ်းခွဲမှုအပြီးတွင် သူမ၏မိသားစုသည် လပေါင်းများစွာကြာ ခက်ခဲသော အချိန်ကာလတို့ကို ကြံ့ကြံ့ခံခဲ့ရသည်ဟု ဖွင့်ဟပြောကြားခဲ့သည်။
“အဲ့ဒီ့တုန်းက အရမ်းကိုခက်ခဲတ ဲ့အခိုက်အတန့်တွေ ကြုံတွေ့ခဲ့ရတယ်ဆိုတာကလွဲလို့ ကျွန်မအဲ့ဒီ့အကြောင်းတွေကို အများကြီးမပြောချင်ပါဘူး” သူမက ဝမ်းနည်းစွာပြောခဲ့သည်။ “ကျွန်မတို့ဟာ မိသားစုတွေပါ။ ပြီးတော့ မိသားစုတွေ အဖြစ်အမြဲရှိနေမှာပါ။ ပြီးတော့ အဲ့လိုခက်ခဲတဲ့အချိန်ကာလကို ဖြတ်ကျော်ပြီးတော့ ပိုမိုကြံ့ကြံ့ခံနိုင်တဲ့ မိသားစုဖြစ် လာဖို့မျှော်လင့်ပါတယ်” ဟု ပြောခဲ့သည်။
“ကျွန်မအာရုံထားတာ ကျွန်မရဲ့ကလေးတွေပါ။ ကျွန်မတို့ရဲ့ကလေးတွေပါ။ ပြီးတော့ ကျွန်မအာရုံထားတာက ဒါကိုဘယ်လိုကျော်ဖြတ်ရမလဲ ဆိုတာပါပဲ” ဟု ဂျိုလီကဖြည့်စွက်ပြောကြားခဲ့သည်။ “ကျွန်မတို့ မိသားစုပိုမိုကြံ့ကြံ့ခံနိုင်ဖို့၊ ပိုမို သွေးနီးလာဖို့ ကျွန်မကိုယ်တိုင် ကိုင်တွယ်ဖြေရှင်းနေပါတယ် “ဟု သူမကပြောခဲ့သည်။
ဂျိုလီနှင့်ဘရက်ပစ်တို့၏ ကလေး၆ဦးစလုံးသည် ယခုလောလောဆယ်တွင် ကမ္ဘောဒီးယား၌ အထူးပွဲပြသမည့် သူမ၏နောက်ဆုံးထွက်ရှိထားသော “ First They Killed My Father” ရုပ်ရှင်အတွက် ရောက်ရှိနေကြသည်။ အဆိုပါပွဲသည် မင်းသားဘရက်ပစ်နှင့်ကွာရှင်းပြီးနောက်ပိုင်းတွင် ဂျိုလီ၏ ပထမဦးဆုံးအကြိမ်အဖြစ် လူမြင် ကွင်းထဲသို့ ရောက်ရှိလာခြင်းဖြစ်သည်။
