ဖေဖော်ဝါရီ ၂၀။ ။ မေယု စစ်ဆင်ရေး အရ မောင်တောမြို့နယ်၊ ဖေဇီကျေးရွာသို့ ဖေဖော်ဝါရီ ၁၉ ရက်က ဝင်ရောက်ရှာဖွေရာ WY ဆေးပြား ၁၀၀၀ ကျော် ဖမ်းဆီးရခဲ့မိသည်ဟု နိုင်ငံတော်အတိုင်ပင်ခံရုံး သတင်းထုတ်ပြန်ရေးကော်မတီမှ ထုတ်ပြန်သည်။
ဖေဇီကျေးရွာနေ မူဟာမတ်အီဆုပ်၏ နေအိမ်မှ WY နှင့် R စိတ်ကြွရူးသွပ်ဆေးပြား ၆၂ ပြား (ကာလတန်ဖိုး ၁၂၄၀၀၀ ကျပ်) သိမ်းဆည်းရမိခဲ့ပြီး စစ်ဆေးမေးမြန်းချက်အရ မောင်တောမြို့ ၂ ရပ်ကွက်နေ ရာမောက်ဒူလာထံမှ ဝယ်ယူခဲ့ကြောင်းသိရသည်။
ထို့ကြောင့် ယင်းနေ့ ၁၂နာရီခွဲတွင် ရာမောက်ဒူလာ၏ နေအိမ်သို့ ဆက်လက်ရှာဖွေရာ ၎င်း၏ မိခင် မရော်ဂျီရာဘေဂေါင်၏ သံသေတ္တာအတွင်းမှ WY စိတ် ကြွဆေးပြား ၉၇၅ ပြား(ကာလတန်ဖိုး ငွေကျပ် ၁၉၅၀၀၀၀)တို့အား တွေ့ရှိခဲ့သည်။ ၎င်းအား စစ်ဆေးမေးမြန်းချက်အရ သားဖြစ်သူ ရာမောက်ဒူလာ၏ စိတ်ကြွဆေးပြားများ ဖြစ်ကြောင်း ထွက်ဆိုခဲ့သည်။
ထို့ကြောင့် ဖမ်းဆီးရမိသည့် မူဟာမတ်အီဆုပ်နှင့် မရော်ဂျီရာဘေဂေါင်၊ ထွက်ပြေးတိမ်းရှောင်နေသော ရာမောက်ဒူလာတို့အား ဥပဒေလုပ်ထုံး လုပ်နည်းများနှင့်အညီ အမှုဖွင့် အရေးယူဆောင်ရွက်လျက် ရှိကြောင်း ထုတ်ပြန်ထားသည်။
