နေပြည်တော်(ဖေဖော်ဝါရီ ၁၇ရက်၊ ၂၀၁၇ခုနှစ်)။ ။ မြန်မာ့မီးရထား ဒီဇယ်စက်ခေါင်းစက်ရုံ(ရွာထောင်) တိုးတက်ကောင်းမွန်ရေး စီမံကိန်းအတွက် ဂျာမနီနိုင်ငံ KfW Development Bank မှ ယူရို ၅သန်း(မြန်မာငွေ ကျပ်သန်း ၇ထောင်ကျော်) ချေးယူခွင့်ပြုရန် အစိုးရက ပြည်ထောင်စုလွှတ်တော်သို့ ယနေ့ တင်ပြလိုက်သည်။
နိုင်ငံတော်သမ္မတထံမှ ပေးပို့ထားသော မြန်မာ့မီးရထား ဒီဇယ်စက်ခေါင်းစက်ရုံ(ရွာထောင်) တိုးတက်ကောင်းမွန်ရေး စီမံကိန်းအတွက် ဂျာမနီနိုင်ငံ KfW Development Bank မှ ယူရို ၅သန်း ချေးယူရန် ကိစ္စနှင့်စပ်လျဉ်း၍ ပို့ဆောင်ရေးနှင့်ဆက်သွယ်ရေးဝန်ကြီး ဦးသန့်စင်မောင်က ဖေဖော်ဝါရီ ၁၇ရက်၊ ပြည်ထောင်စုလွှတ်တော်အစည်းအဝေးတွင် လာရောက် ရှင်းလင်း တင်ပြခဲ့ခြင်း ဖြစ်သည်။
“မြန်မာ့မီးရထား ဒီဇင်စက်ခေါင်းစက်ရုံ(ရွာထောင်)မှာ သင်တန်းကျောင်းတွေ ရှိပါတယ်။ အဲ့ဒါလည်း ဂျာမနီနိုင်ငံရဲ့ အကူအညီနဲ့ လွန်ခဲ့တဲ့ နှစ် ၃၀လောက်က တည်ဆောက်ထားတဲ့အတွက်ကြောင့် သင်တန်းကျောင်းမှာရှိတဲ့ စက်ပစ္စည်း ကိရိယာတွေဟာ ဟောင်းနွမ်း နေပါတယ်။ ဒါကြောင့် သင်ထောက်ကူပစ္စည်းများကိုလည်း ဝယ်ယူတပ်ဆင်မှာ ဖြစ်ပါတယ်” ဟု ဦးသန့်စင်မောင်က ပြောသည်။
လက်ရှိ ပေါက်ဈေးအရ ၁ယူရိုလျှင် မြန်မာကျပ်ငွေ ၁၄၅၀နှင့် တွက်ချက်မည်ဆိုပါက ချေးယူမည့် ယူရို ၅သန်းသည် မြန်မာငွေ ကျပ်သန်း ၇ထောင်ကျော်(၇,၂၅၀,၀၀၀,၀၀၀) ရှိသည်။
အဆိုပါ ဂျာမနီနိုင်ငံ KfW Development Bank ထံမှ ယူရို ၅သန်း ချေးယူရာတွင် ဆိုင်းငံ့ကာလ ၁၀နှစ်၊ ပြန်ဆပ်ကာလ ၃၀နှစ် စုစုပေါင်း ချေးငွေသက်တမ်းကာလ နှစ် ၄၀ ဖြစ်ပြီး အတိုးနှုန်းမှာ ဝဒဿမ ၇၅ရာခိုင်နှုန်း၊ ကတိခံကြေး ဝဒဿမ ၂၅ရာခိုင်နှုန်းနှင့် နောက်ကျကြေး အတိုးနှုန်းမှာ ၃ရာခိုင်နှုန်း ဖြစ်သည်။
အဆိုပါ ချေးငွေ ချေးယူလိုမှုနှင့်ပတ်သက်ပြီး ဆွေးနွေးလိုသည့် လွှတ်တော်ကိုယ်စားလှယ်များအနေဖြင့် ဖေဖော်ဝါရီ ၂၁ရက် နောက်ဆုံးထားပြီး ပြည်ထောင်စုလွှတ်တော်၊ ညွှန်ကြားရေးမှူးချုပ်ထံ အမည်စာရင်း ပေးသွင်းနိုင်ကြောင်းနှင့် ဖေဖော်ဝါရီ ၂၂ရက် ပြည်ထောင်စုလွှတ်တော်အစည်းအဝေးတွင် ဆွေးနွေးသွားမည်ဟု လွှတ်တော်နာယက မန်းဝင်းခိုင်သန်းက ကြေငြာထားသည်။
၂၀၁၆ခုနှစ် နှစ်ကုန်အထိ နိုင်ငံတော်၏ ပြည်ပကြွေးမြီ စုစုပေါင်းမှာ အမေရိကန်ဒေါ်လာ ၉ဘီလီယံနီးပါး(၈,၉၈၉,၈၇၉,၅၄၀ဒဿမ ၃၂) ရှိနေသည်။
