ရန်ကုန်၊ ဖေဖော်ဝါရီ ၁၅ ။ ။ ရှေ့နေဦးကိုနီအား လေဆိပ်တွင် သေနတ်ဖြင့် ပစ်ခတ်လုပ်ကြံမှုတွင် ငွေပေးစေခိုင်းခဲ့သော ဒုတိယဗိုလ်မှူးကြီးဟောင်းတစ်ဦးဟု သမ္မတရုံးမှ ယနေ့ ညနေတွင် သတင်းထုတ်ပြန်ခဲ့မှုအပေါ် သေနတ်သမားဦးကြည်လင်းမှ လာရောက်ဆက်သွယ်ခဲ့သော ကိုအောင်စိုးမှ မသိရှိကြောင်း ၎င်းက မဇ္ဈိမသို့ ပြောသည်။
“ ဒုဗိုလ်မှူးကြီးဟောင်းဆိုတာလည်း ကျွန်တော့်ကို တစ်လုံးမှပြောမသွားပါဘူး။ သူပေးတဲ့ပိုက်ဆံလည်း ကျွန်တော် တစ်ပြားမှလည်း မယူပါဘူး။ ဒီကိစ္စကို လက်ခံမယ်လည်း ကျွန်တော် မပြောခဲ့ပါဘူး။ မသိခဲ့ပါဘူးခင်ဗျာ” ဟု ပြောသည်။
ထွက်ပြေးတိမ်းရှောင်လျှက်ရှိသော တရားခံအောင်ဝင်းခိုင်အားတွေ့ရစဉ်။ ဓာတ်ပုံ-Myanmar President Office
ထိသို့ လုပ်ကြံရန် ငွေပေးစေခိုင်းသူမှာ အောင်ဝင်းခိုင်ဆိုသူဖြစ်ကြောင်း၊ ၎င်းမှာ တပ်မတော်တွင် ဗိုလ်မှူးကြီးအဆင့်ထိ တာဝန်ထမ်းဆောင်ခဲ့ပြီး ၂၀၁၄ ခုနှစ်တွင် ဆန္ဒအလျောက် နုတ်ထွက်ခဲ့သူဖြစ်သည်။ အောင်ဝင်းခိုင်နှင့် ဆက်စပ်သူများဖမ်းဆီးရရှိရေး ဆောင်ရွက်သွားမည်ဖြစ်ပြီး ပြည်သူများသို့ တင်ပြသွားမည်ဟု ထုတ်ပြန်ချက်တွင် ဖော်ပြထားသည်။
ဖြစ်စဉ်မှာ အောင်စိုးထံသို့ သေနတ်သမားကြည်လင်းမှ လာရောက်ဆက်သွယ်ခဲ့ပြီး ၎င်းမှ ငြင်းဆိုခဲ့သည်။ ကနဦးတွင် ပူးပေါင်းပါဝင်သူ အောင်ဝင်းဇော်၏ ဖော်ထုတ်ချက်အရ ငွေပေးစေခိုင်းသူမှာ ၎င်း၏ ညီဖြစ်သူ အောင်ဝင်းခိုင်ဖြစ်ကြောင်း၊ လုပ်ကြံသတ်ဖြတ်မည့်သူအား ရှာဖွေခဲ့ခြင်းဖြစ်သည်ဟု ကနဦးသတင်းများတွင် ဖော်ပြထားသည်။
ယနေ့ ဖေဖော်ဝါရီလ ၁၅ ရက်တွင် ထုတ်ပြန်ခဲ့သောသတင်းအပေါ် ကိုအောင်စိုးက သူ့အမြင်ကိုပြောသည်။
“ အဲ့လောက်ထိ ကျွန်တော် မတွေးတတ်ဘူးခင်ဗျ။ စစ်တဲ့ အခါမှာသူပြောချင်ရာသူပြောမှာပေါ့။ အဲ့ထဲမှာ မှားတာတွေမှန်တာတွေပါမှာပေါ့နော့။ အဲ့လိုပဲသုံးသပ်ပါတယ်” ဟု ပြောသည်။
