ဗီယင်နာ၊ ဇူလိုင် ၂၃ ။ ။ ယခုလတွင် အီရန်နှင့် ကမ္ဘာ့အင်အားကြီးနိုင်ငံများကြား နျူကလီးယား သဘောတူညီချက် တစ်ခု ရရှိပြီးနောက် အီရန်ရှိ စီမံကိန်းများတွင် ရင်းနှီးမြုပ်နှံလိုသော ဥရောပကုမ္ပဏီအချို့နှင့် ညိနှိုင်းဆွေးနွေးမှုများကို အီရန်က အပြီး သတ်သဘောတူညီမှုများ ရရှိလိုက်ပြီဖြစ်သည်ဟု အီရန်ဒု-ဝန်ကြီးတစ်ဦးက ဇူလိုင် ၂၃ တွင်ပြောကြားခဲ့သည်။
"မကြာသေးမီက ဥရောပရင်းနှီးမြုပ်နှံသူတွေ အီရန်ကို ပြန်လာတာတွေ့နေရပါတယ်။ စေ့စပ်ညိနှိုင်းမှုအချို့ကတော့ အပြီးသတ် သဘောတူညီမှုရပြီးပါပြီ။ ကျွန်တော်တို့ အတည်ပြုပြီး သူတို့ကို နိုင်ငံခြားရင်းနှီးမြုပ်နှံမှုလိုင်စင်တွေ ထုတ်ပေးလိုက်ပါတယ်"ဟု အီးယူနှင့် အီရန်ကြား ကုန်သွယ်ရေးမြင့်တင်မှုကွန်ဖရင့်တစ်ခုတွင် အီရန်စီးပွားရေး ဒု-ဝန်ကြီး မိုဟာမက်ခါဇာအေ ကပြောကြား ခဲ့သည်။
"လွန်ခဲ့တဲ့သီတင်းနှစ်ပတ်အတွင်းကလောက်တောင် အီရန်ရဲ့ဒေါ်လာ နှစ်ဘီလျံကျော်တန် စီမံကိန်းတွေမှာ ဥရောပကုမ္ပဏီတွေ ရင်းနှီးမြုပ်နှံဖို့ ကျွန်တော်တို့ အတည်ပြုလိုက်ပါတယ်"ဟု ၎င်းကဆိုသည်။ သို့သော်လည်း ကုမ္ပဏီများ၏ အမည်များ၊ သဘောတူ ညီချက်နှင့် ပတ်သက်သည့် နောက်ထပ်အသေးစိတ်အချက်အလက်များကိုမူ ၎င်းက မပြောကြားခဲ့ပေ။
