မူအရ အပြောင်းအလဲမဟုတ်သည့်တိုင်

မူအရ အပြောင်းအလဲမဟုတ်သည့်တိုင်

မိမိတို့နိုင်ငံမှာ နိုင်ငံရေးပြုပြင်ပြောင်းလဲရေးကိစ္စက လူပြောသူပြောအများဆုံးကိစ္စဖြစ်ပါတယ်။ အပြင်းအထန် ငြင်းခုန်ဆွေးနွေးကြရတဲ့ ကိစ္စဖြစ်ပါတယ်။ အခြေခံအကျဆုံး ကိစ္စလို့တောင်မှ   ပြောလို့ရပါတယ်။ ငြင်းခုန်ရတာတွေ ဆူညံလွန်းတော့ တချို့က စိတ်ပူပြီး တခြားနည်းလမ်းပြောင်းပြီး တွေးဖို့၊ ပြောကြဖို့ အကြံပြုတာတွေလည်း ရှိပါတယ်။ တကယ်တော့ အဲသလိုမဟုတ်ပါဘူး။   နိုင်ငံရေးအရ ငြင်းခုန်ဆွေးနွေးတာဟာ ကောင်းပါတယ်။ အခြေခံအကျဆုံး ငြင်းခုန်မှုတွေလည်းဖြစ်ပါတယ်။

ပြုပြင်ပြောင်းလဲရေးအလုပ်တွေနဲ့ပတ်သက်ပြီး အခြေခံကျတဲ့ပြုပြင်ပြောင်းလဲရေးနဲ့ အခြေခံမကျတဲ့ သာမာန်ပြောပြုပြင်ပြောင်းလဲရေးဆိုပြီး ပြုပြင်ပြောင်းလဲရေး နှစ်မျိုးရှိပါတယ်။ အခြေခံကျတဲ့ ပြုပြင်ပြောင်းလဲရေးက တစုံလုံးပြောင်းလဲသွားရေးကို ဦးတည်ပြီး ရေရှည်သဘောဆောင်ပါတယ်။ သာမာန်ပြုပြင်ပြောင်းလဲရေးကတော့ တစ်ခုချင်း ပြောင်းလဲသွားရေးကို ဦးတည်ပြီး ရေတိုသဘောဆောင်ပါတယ်။

ဒီနေရာ ဥပမာတချို့ပြောရရင် ကွမ်းစားတာဆန့်ကျင်တဲ့ပြုပြင်ပြောင်းလဲရေး၊ လမ်းတွေပေါ်က အမှိုက်လိုက်ကောက်တဲ့ ပြုပြင်ပြောင်းလဲရေး၊ လမ်းဘေးဈေးသည်တွေကို စနစ်တကျ ပြန်လည်နေရာချထားရေးနဲ့ ယာဉ်ကြောပိတ်ဆို့မှု ရှင်းလင်းချောမွေ့စေရရေး အစရှိတဲ့အလုပ်တွေဟာ သာမာန်ပြုပြင်ပြောင်းလဲရေးကိစ္စတွေပဲဖြစ်ပါတယ်။ ဒါကြောင့်မို့ရေတိုသဘောဆောင်ပါတယ်။

သာမာန်ပြုပြင်ပြောင်းလဲရေးတွေက မူူူူူူူူအရ အဓိက ပြုပြင်ပြောင်းလဲရေးကိစ္စမဟုတ်တာကြောင့် မူအရပြုပြင်ပြောင်းလဲရေးသမားတွေက မကြိုက်ကြပါဘူး။ ခေတ်မပြောင်းနိုင်ဘူး၊ ပြဿနာသောင်းခြောက်ထောင်တက်ပြီး ကျဆုံးသွားနိုင်တယ်။ မအောင်မြင်နိုင်ဘူးလို့လည်း ယူဆတတ်ကြပါတယ်။ အောင်မြင်ရင်လည်း ကြာကြာမခံဘူးလို့ မြင်ကြပါတယ်။ သာမာန်ပြုပြင်ပြောင်းလဲရေးအလုပ် လုပ်ကြသူတွေဟာ နိုင်ငံရေးအားနည်းကြသူတွေဖြစ်တယ်၊ ငါးပွက်ရာ ငါးစာချလုပ်တတ်သူတွေသာဖြစ်တယ်လို့လည်း ဝေဖန်တတ်ကြပြန်ပါတယ်။ တကယ်တော့ အဲသလိုမဟုတ်ပါဘူး။

သာမာန်ပြုပြင်ပြောင်းလဲရေးအလုပ်တွေဟာ အချိန်ကြာလာတာနဲ့အမျှ လူတွေရဲ့ အသိညာဏ်ကို လင်းလက်ပွင့်လင်းလာစေပါတယ်။ ကျဉ်းရာက ကျယ်လာစေတဲ့သဘောပါပဲ။ အရေအတွက်အရသဘောဆောင်တာဖြစ်လို့ အချိန်အကန့်အသတ်တစ်ခုရောက်တဲ့အခါ အရည်အချင်းသဘော ပြောင်းလဲဖြစ်ပေါ်သွားစေမှာ သေချာပါတယ်။ အထူးသဖြင့်တော့ သာမာန်ပြုပြင်ပြောင်းလဲရေးလုပ်ငန်းတွေဟာ အနည်းဆုံးတော့ လူတွေကိုစိတ် လန်းဆန်းတက်ကြွစေပါတယ်။ စဉ်းစားချင့်ချိန်တတ်တဲ့ဓလေ့ကို ရစေပါတယ်။

သာမာန်ပြုပြင်ပြောင်းလဲရေး ဘာ့ကြောင့်လုပ်ရသလဲဆိုရင် မူအရပြုပြင်ပြောင်းလဲရေးအလုပ် လုပ်ဖို့အတွက် ခက်ခဲနေသေးရင်၊ မူအရပြုပြင်ပြောင်းလဲရေးအလုပ် လုပ်ခွင့်မသာသေးရင် အဲဒီ သာမာန်ပြုပြင်ပြောင်းလဲရေးကို မလွဲမသွေ ကောက်ကိုင်ကြရတာပါပဲ။ သာမာန်ပြုပြင်ပြောင်းလဲရေးအောင်မြင်ဖို့ အာမခံတဲ့အချက်ကလည်းစိတ်ဝင်စားဖို့ကောင်းပါတယ်။ အဲဒီသာမာန်ပြုပြင်ပြောင်းလဲရေးလုပ်ငန်းတွေကို ဦးစီးဦးဆောင်ပြုကြသူတွေဟာ သီလ၊ သမာဓိ ရှိသူတွေဖြစ်ရပါမယ်။ ဝိရိယ ရှိရပါမယ်။ ဒီအချက်တွေပြည့်စုံရင် သာမာန်ပြုပြင်ပြောင်းလဲရေးတွေကို မူအရပြုပြင်ပြောင်းလဲရေးအထိ အောင်မြင်အောင် သယ်ဆောင်ပေးသွားနိုင်မှာ အသေအချာပါပဲ။

အခုဆိုရင် လူတချို့ထောက်ပြဝေဖန်နေတဲ့ ရန်ကုန်မြို့ ယာဉ်လမ်းကြောင်းပိတ်ဆို့မှု ချောမွေ့ကောင်းမွန်ရေး လှုပ်ရှားမှုဟာ သာမာန်ပြုပြင်ပြောင်းလဲရေးပါပဲ။ ဒါပေမယ့် နှလုံးသားကောင်းသူ၊ ပညာညာဏ်ရှိသူနဲ့ ပရဟိတစိတ်ရှိသူတိုင်းက ဝိုင်းဝန်းထောက်ခံ ဝန်းရံပေးလာတာ တွေ့ကြရမှာဖြစ်ပါတယ်။ ခေါင်းဆောင်ခေါင်းရွက်ပြုသူတွေက ဒီလုပ်ငန်းအပေါ် သီလ သမာဓိရှိရှိ၊ ကိုယ်ကျိုးမကြည့် လုပ်သွားမယ်ဆိုရင် ဒီပြုပြင်ပြောင်းလဲရေးလုပ်ငန်းဟာ မြေကြီးလက်ခတ်မလွဲ အောင်မြင်မှာပါပဲ။

ဒါကြောင့်မို့ လက်ရှိအခြေအနေအတိုင်း ပြည်သူတွေကလည်း ဝိုင်းဝန်းကြမယ် ဦးဆောင်ဦးရွက်ပြုသူတွေကလည်း သီလနဲ့ သမာဓိကို ထိန်းမယ်၊ ကိုယ်ကျိုးမကြည့်ပဲ လုပ်ကြမယ်ဆိုရင် လူအများ စိတ်ဝင်စားတစား စာင့်ကြည့်နေတဲ့ ရန်ကုန်မြို့ ယာဉ်လမ်းကြောင်း ချောမွေ့ကောင်းမွန်ရေးလှုပ်ရှားမှုဟာ အောင်မြင်မှာ သေချာကြောင်း မဇ္ဈိမက ထပ်လောင်း အသိအမှတ်ပြုရင်းနဲ့ အကြံပြုနှိုးဆော်လိုက်ပါတယ်။

Mizzima Weekly