ဇန်နဝါရီ ၁၉ ။ ။ ဂမ်ဘီယာနိုင်ငံတွင် သမ္မတ Yahya Jammeh က ရွေးကောက်ပွဲအရှုံးရလဒ်ကို လက်မခံဘဲ ရာထူးမှ ဖယ်ပေးရန် ငြင်းဆန်နေခဲ့၍ အာဖရိကန်နိုင်ငံများ ကျောထောက်နောက်ခံ ပြုထားသည့် ဆီနီဂေါတပ်ဖွဲ့များက ယင်းနိုင်ငံတွင်းသို့ ဝင်ရောက်ကာ အင်အားသုံးဖိအားပေးရန် ပြင်ဆင်နေလျက်ရှိသည်။
ရွေးကောက်ပွဲရှုံးပြီးနောက် ရာထူးအာဏာသက်တမ်းကုန်ဆုံးသွားခဲ့ပြီဖြစ်သော်လည်း Yahya Jammeh မှာ ယင်းအခြေအနေတွင် ရာထူးမှ ဖယ်ပေးခြင်းမရှိသေးဘဲ ငြင်းဆန်နေလျက်ရှိသည်။
သို့သော် နိုင်ငံတွင်းသို့ ဆီနီဂေါတပ်များ ဝင်ရောက်လာပါက မိမိတို့တပ်များအနေဖြင့် ပြန်လည်ခုခံတိုက်ခိုက်ရန် အစီအစဉ်မရှိကြောင်း Jammeh ၏ စစ်ဦးစီးချုပ် ဖြစ်သူက ပြောသည်။
" ကျွန်တော်တို့ တပ်တွေကို ဒီစစ်ရေးပိုင်း အရှုပ်အရှင်းထဲပါခိုင်းမှာမဟုတ်ပါဘူး၊ ခုဖြစ်နေတာက နိုင်ငံရေး အကျပ်အတည်းတစ်ခုပါ၊ ကျွန်တော့်စစ်သားတွေကို ဒီလိုအဓိပ္ပါယ်မဲ့တဲ့ တိုက်ပွဲထဲ ဝင်ပါခိုင်းမှာမဟုတ်ပါဘူး၊ ကျွန်တော့်လူတွေကို တန်ဖိုးထားပါတယ်" ဟု ဂမ်ဘီယာ စစ်ဦးစီးချုပ် Ousman Badjie က ပြောသည်။
" တကယ်လို့ သူတို့ (ဆီနီဂေါ) တပ်တွေ ဝင်လာတယ်ဆိုရင်လည်း ကျွန်တော်တို့က ဒီမှာ ဒီလိုမျိုး ရှိနေမှာပါ" ဟု ၎င်းက လက်နက်ချသည့် အပြုအမှုဖြစ်သည့် လက်မြှောက်ပြသည့် အမူအရာကို ပြသသွားခဲ့သည်။
ယင်းနိုင်ငံတွင် ပြဌာန်းချက်များအရ ရွေးကောက်ပွဲရှုံးနိမ့်သွားသည့် Jammeh ၏ တရားဝင်သတ်တမ်းမှာ ဒေသစံတော်ချိန် ညသန်းခေါင်ယံအချိန်တွင် ကုန်ဆုံးသွားခဲ့ပြီဖြစ်သော်လည်း ပြိုင်ဘက် Adama Barrow ကို ရှုံးနိမ့်ထားသည့် ရလဒ်ကို လက်မခံဘဲ ရာထူးမှ ဆင်းပေးရန် ငြင်းဆန်နေလျက်ရှိသည်။
ယခုအခါ နိုင်ဂျီးရီးယားကလည်း ဆီနီဂေါတပ်ဖွဲ့များထံသို့ ယင်း၏ တပ်ဖွဲ့ဝင်များနှင့် တိုက်လေယာဉ်များ ပေးပို့ထားလျက်ရှိပြီး အခြားသော အာဖရိကနိုင်ငံများကလည်း ဂမ်ဘီယာပြဿနာကို အင်အားသုံး ဖိအားပေးရန် ပြင်ဆင်လာနေလျက်ရှိသည်။
