မုံရွာ၊ ဇန်နဝါရီ ၁၈။ ။ စစ်ကိုင်းတိုင်းဒေသကြီး၊ ပုလဲမြို့နယ်တွင် တရားမဝင်သစ်သယ်ဆောင်လာသူများအား ဖမ်းဆီးနေစဉ် သစ်တင်ကားပြန်လည် လုယက်ခံရခဲ့ကြောင်း တိုင်းဒေသကြီး ရဲတပ်ဖွဲ့မှူးရုံးမှ သိရသည်။
ဖြစ်စဉ်မှာ ပုလဲမြို့နယ်၊ အုန်းမွန်တောကျေးရွာအနီး လမ်းပေါ်တွင် ဇန်နဝါရီ ၁၅ ရက်နေ့က ရပ်တန့်ထားသော ၆ ဘီးယာဉ်အား မြို့နယ်အုပ်ချုပ်ရေးအဖွဲ့မှ မသင်္ကာ၍ စစ်ဆေးစဉ် ယာဉ်အနီးမှ လူ ၇ ဦးမှာ ထွက်ပြေးသွားခဲ့သည်။
ကျေးရွာအုပ်ချုပ်ရေးမှူးအဖွဲ့၊ နယ်မြေရဲစခန်း၊ အရန်မီးသက်တပ်ဖွဲ့တို့မှ လာရောက်ကာ စစ်ဆေးနေကြစဉ် အမည်မသိလူ ၂၅ ဦးခန့်မှ တုတ်၊ဓါး၊ လက်နက်များဖြင့် လာရောက် လုယက်ခဲ့ကြခြင်းဖြစ်သည်။
အဆိုပါ အမည်မသိလူများမှ ဌာနပိုင်ယာဉ်အား ရိုက်ချိုး၊ ဖျက်ဆီးကာ အသက်အန္တရာယ် ပြုခဲ့သဖြင့် အုပ်ချုပ်ရေးအဖွဲ့နှင့် နယ်မြေရဲတပ်ဖွဲ့တို့မှာ ထွက်ပြေးခဲ့ကြရကြောင်း ရဲမှတ်တမ်းတွင် ဖော်ပြထားသည်။
ထို့ပြင် အမည်မသိလူများက ဖမ်းဆီးစစ်ဆေးနေသော ၆ ဘီးယာဉ်ပေါ်မှ တရားမဝင်သစ်များအား အောက်သို့ချကာ ကားကိုယူဆောင်မောင်းနှင်သွားခဲ့ကြောင်း ရဲစစ်ချက်အရသိရသည်။
ယင်းကြောင့် ကားအားပြန်လည်လုယက်ခဲ့ သူ အမည်မသိလူ ၂၅ ဦးခန့်အား ဖော်ထုတ်အရေးယူရန်အတွက် ပုလဲမြို့မရဲစခန်းမှ ရာဇသက်ကြီးပုဒ်မ ၃၅၃၊ ၅၀၆၊ ၄၂၇ တို့ဖြင့် ဇန်နဝါရီ ၁၆ ရက်က အမှုဖွင့်လှစ်ထားခဲ့ကြောင်း တိုင်းဒေသကြီးရဲတပ်ဖွဲ့မှူးရုံးမှ သိရသည်။
