ဇန်နဝါရီ ၁၃ ။              ။ လစ်ဗျားနိုင်ငံ မြို့တော် ထရီပိုလီတွင် အခြေစိုက်သည့် အစိုးရဝန်ကြီးရုံး သုံးခုသို့ ဇန်နဝါရီ ၁၂ ရက်က လက်နက်ကိုင်များက ဝင်စီးရန် ကြိုးပမ်းခဲ့သော်လည်း ၎င်းတို့၏ အစီအစဉ် အထမမြောက်ခဲ့ကြောင်း ကုလထောက်ခံထားသည့် လစ်ဗျားအမျိုးသားအစိုးရအဖွဲ့ GNA မှ ပြောရေးဆိုခွင့် ရှိသူတစ်ဦးက ပြောသည်။

" လက်နက်ကိုင်တွေဆိုတာက GNA ကို ဆန့်ကျင်ပြီး လစ်ဗျားအမျိုးသားလွတ်မြောက်ရေး အစိုးရဆိုပြီး သူတို့ဘာသာ ကြေညာထားတဲ့ အဖွဲ့က လူတွေပါ၊ သူတို့ နဲ့ ဒီက အစိုးရတပ်ဖွဲ့ဝင်တွေ အပြန်အလှန်ပစ်ခတ်မှု ဖြစ်ပွားခဲ့ပါတယ်၊ နောက်တော့သူတို့ ပြန်ဆုတ်သွားပါတယ်" ဟု GNA မှ ပြောရေးဆိုခွင့် ရှိသူ Ashraf al-Thulthi က ပြောသည်။

လက်နက်ကိုင်များမှ လွတ်နေသည့် ကာကွယ်ရေးဝန်ကြီးဌာနအဆောက်အအုံအပြင် အလုပ်သမားဝန်ကြီးဌာန နှင့် အခြား အစိုးရဝန်ကြီးရုံးတစ်ခုတို့အား ဝင်ရောက်စီးနင်းထိန်းချုပ်ရန် ကြိုးပမ်းခဲ့ခြင်း   ဖြစ်ကြောင်းလည်း သိရသည်။

ယင်းနိုင်ငံတွင် လစ်ဗျားအမျိုးသားလွတ်မြောက်ရေးအစိုးရဟု ဆိုကာ ကိုယ့်ဘာသာထုတ်ဖော်ကြေညာထားသည့် Khalifa Ghaweil ဦးဆောင်သော အဖွဲ့မှာမူ ကုလထောက်ခံသည့် GNA အစိုးရအဖွဲ့ကို အသိအမှတ်ပြုလက်ခံရန် ငြင်းဆန်ထားခဲ့သည်။