ဇန်နဝါရီ ၁၁ ။ ။ လက်ရှိအချိန်တွင် ကမ္ဘာကြီး ပူနွေးလာနေမှုဖြစ်စဉ်၏ အမှန်တရားကို မျက်ကွယ်ပြုထားလိုက်မည်ဆိုပါက နောင်အနာဂတ်တွင်မွေးဖွားကြီးပြင်းလာကြမည့် မျိုးဆက်သစ်တို့အပေါ် သစ္စာဖောက်ရာ ရောက်လိမ့်မည်ဖြစ်ကြောင်း အမေရိကန်သမ္မတ ဘရက်ခ် အိုဘားမားက ၎င်း၏ နောက်ဆုံးနှုတ်ဆက်မိန့်ခွန်းထဲတွင် ထည့်သွင်း သတိပေးသွားခဲ့သည်။
ကမ္ဘာ့ရာသီဥတုပြောင်းလဲနေမှုအပေါ် လျစ်လျူရှုမထားဘဲ အရေးယူကိုင်တွယ်ဖြေရှင်းမှုများ လုပ်ဆောင်နိုင်ရေး အိုဘားမားက ရည်ညွန်းပြောကြားခြင်းလည်း ဖြစ်သည်။
" ကျွန်တော်တို့အနေနဲ့ ဒီပြဿနာကို ဖြေရှင်းဖို့အတွက် အကောင်းဆုံးသော နည်းလမ်းနဲ့ ချဉ်းကပ်လုပ်ဆောင်သင့်ပါတယ်၊ လုပ်လည်းလုပ်နိုင်ရပါလိမ့်မယ်" ဟု ချီကာဂိုရှိ လူထုနှုတ်ဆက်ပွဲတွင် အိုဘားမားက ပြောကြားသွားသည်။
" ဒါပေမယ့်လည်း ဒီလိုမှမဟုတ်ဘဲ ဒီပြဿနာကို မျက်ကွယ်ပြုထားဖို့ပဲ လုပ်နေတော့မယ်ဆိုရင်တော့ ဒါဟာ အနာဂတ်မျိုးဆက်သစ်တွေအပေါ် သစ္စာဖောက်ရုံတင်မကပါဘူး၊ ဒီနိုင်ငံမှာ ရှိကိုရှိရမယ့် အနှစ်သာရကိုလည်း ဖောက်ပြန်ရာ ကျပါလိမ့်မယ်" ဟု အိုဘားမားက သတိပေးသွားသည်။
မကြာမီ သမ္မတ ရာထူးတာဝန်ကနေ ဆင်းပေးတော့မည့် အိုဘားမားအနေဖြင့် ၎င်း၏ နောက်ဆုံးနှုတ်ဆက်မိန့်ခွန်းကို ချီကာဂိုမြို့တွင်ပြောကြားခဲ့ခြင်းလည်း ဖြစ်သည်။
