ဇန်နဝါရီ ၁၀၊ လန်ဒန်။ ။ ပြီးခဲ့သည့် ၂၀၁၅-၁၆ ရာသီတွင် ၎င်းမှာ ၀ိညာဉ်တစ်ခုကဲ့သို့ ဖြစ်ခဲ့ကြောင်း ချယ်လ်ဆီးတိုက်စစ်မှူး ဟက်ဇက်က ၀န်ခံပြောဆိုလိုက်သည်။
ဟက်ဇက်သည် ၂၀၁၄-၁၅ ရာသီတွင် ချယ်လ်ဆီးအသင်းအတွက် အကောင်းဆုံးခြေစွမ်းပြခဲ့ပြီး ပရီးမီးယားလိဂ်ချန်ပီယံဆုကြီးကို ရရှိခဲ့သလို ပီအက်ဖ်အေ၏ တစ်နှစ်တာ အကောင်းဆုံး ကစားသမားဆုကိုလည်း ရရှိခဲ့သည်။ သို့သော် ၂၀၁၅-၁၆ ရာသီတွင် ဆိုးဆိုးရွားရွားခြေစွမ်းကျဆင်းခဲ့ပြီး နည်းပြမော်ရင်ဟိုထွက်ခွာသွားခဲ့သည့်အချန်အထိ ပရီးမီးယားလိဂ်တွင် ဂိုးသွင်းယူနိုင်ခြင်းပင် မရှိခဲ့ပေ။
သို့သော် ယခုနှစ်ရာသီသစ်တွင် နည်းပြသစ်ကွန်တီ၏ လက်အောက်၌ ဟက်ဇက် ပြန်လည်ခြေစွမ်းပြလာခဲ့ပြီး ချယ်လ်ဆီးအသင်းကို အမှတ်ပေးဇယားထိပ်တွင် ရပ်တည်နိုင်အောင် ကူညီပေးထားနိုင်သည်။
ထို့ကြောင့် ဟက်ဇက်က ‘လွန်ခဲ့တဲ့ ၂ နှစ်တုန်းကတော့ ကျွန်တော်က အကောင်းဆုံးကစားသမားဖြစ်ခဲ့ပါတယ်။ ဒါပေမဲ့ ပြီးခဲ့တဲ့ ရာသီတုန်းကတော့ ၀ိညာဉ်တစ်ခုလိုပါပဲ။ နောက်တစ်ကြိမ်ခြေစွမ်းပြပြီး ဆုဖလားတွေ ရယူလိုပါတယ်။
ဒီရာသီမှာ အမှတ်ပေးချန်ပီယံဆုက အရေးကြီးသလို ကျွန်တော်တစ်ခါမှ မရဖူးသေးတဲ့ အက်ဖ်အေဖလားကလည်း အရေးကြီးပါတယ်’ ဟု ပြောဆိုခဲ့သည်။
ရည်ညွှန်း ဆော်ကာဝေး
