ဇန်နဝါရီ ရ ။ ။ ပြီးခဲ့သည့် နို၀င်ဘာရွေးကောက်ပွဲ၌ ဒေါ်နယ်ထရန့်ရရှိခဲ့သည့် အနိုင်မဲရလဒ်များ မှန်ကန်သေချာကြောင်း အမေရိကန် ကွန်ဂရက်လွှတ်တော်က ဇန်နဝါရီ ၆ ရက်တွင် တရားဝင်ထောက်ခံ အတည်ပြုပေးလိုက်ပြီဖြစ်သည်။
ကွန်ဂရက်၏ ယခုအတည်ပြုချက်ကြောင့်လည်း ဒီမိုကရက်တစ်အမတ်များ၏ မဲရလဒ်များအပေါ် စောဒကတက် ကန့်ကွက်နေမှုများလည်း ပြယ်လွင့်အဆုံးသတ်သွားခဲ့ရပြီဖြစ်သည်။
အမေရိကန် ဥပဒေပြုလွှတ်တော် အမတ်များသည် ပြီးခဲ့သည့်လက ရေတွက်ထားခဲ့သည့် မဲရလဒ်များကို အတည်ပြုပေးလိုက်ကာ နိုင်ငံ၏ ၄၅ ဦးမြောက် သမ္မတအဖြစ် ဒေါ်နယ်ထရန့်အား တရားဝင်အတည်ပြု ထောက်ခံပေးလိုက်သည်။
" နိုင်ငံရဲ့ သမ္မတရာထူးအတွက် ရွေးချယ်ရာမှာတော့ ဒေါ်နယ်ထရန့်က ၃၀၄ မဲ၊ ပြိုင်ဘက် ဟီလာရီ ကလင်တန်က ၂၂၇ မဲ ရပါတယ်" ဟု လက်ရှိဒုသမ္မတ ဂျိုးဘိုင်ဒင်က ကြေညာပေးသွားသည်။
မဲဆန္ဒနယ်ခုနစ်တွင် ယင်းတို့၏ ပြည်နယ်မဲရလဒ်များနှင့်ပတ်သက်၍ စောဒကတက်မှုများ ရှိခဲ့သော်လည်း ယခုနောက်ဆုံး ရလဒ်အပေါ် ထိခိုက်နိုင်တော့မည်မဟုတ်ကြောင်း သိရသည်။
" တရားဝင်ရေတွက်ပြီးစီးထားပြီဖြစ်တဲ့ ရလဒ်တွေအရ ထရန့်ဟာ လုံလုံလောက်လောက်ကို အနိုင်ရသွားပါပြီ၊ သူနဲ့ ရွေးကောက်ခံ ဒုသမ္မတ မိုက်ပန့်စ် တို့ လာမယ့် ဇန်နဝါရီ ၂၀ မှာ ကျမ်းကျိန် ရပါတော့မယ်" ဟု ဒုသမ္မတ က ပြောသည်။
အလားတူ လွှတ်တော်ဥက္ကဌ ပေါရိုင်ယန်ကလည်း ဒေါ်နယ်ထရန့်အား နိုင်ငံ၏ ၄၅ ဦးမြောက် သမ္မတဖြစ်လာခဲ့ပြီဖြစ်ကြောင်း တရားဝင်ကြေညာပေးသွားခဲ့သည်။
တစ်ချိန်တည်းမှာပင် ပြည်ပအင်အားစုများ၏ ဆိုက်ဘာတိုက်ခိုက်မှုကြောင့် အမေရိကန်ရွေးကောက်ပွဲအပေါ် ထိခိုက်စေနိုင်စရာအကြောင်းမရှိကြောင်း ဒေါ်နယ်ထရန့်က ပြောကြားလိုက်သည်။
ပြီးခဲ့သည့်ရွေးကောက်ပွဲကာလက ရုရှတို့အနေဖြင့် ဟီလာရီကလင်တန်ကို အိမ်ဖြူတော်သို့ ခြေမချနိုင်စေရန် ရည်ရွယ်လုပ်ဆောင်ခဲ့သည်ဟု အမေရိကန်ထောက်လှမ်းရေးများ၏ အစီရင်ခံစာ ပေါ်ထွက်လာပြီးနောက် ထရန့်က အထက်ပါအတိုင်း ပြောကြားလိုက်ခြင်းဖြစ်သည်။
