စျေးမှာလည်းရောင်း မိသားစုလည်းစား ရုံးပတီသီး စိုက်ကြမလား

23 December 2016
စျေးမှာလည်းရောင်း မိသားစုလည်းစား ရုံးပတီသီး စိုက်ကြမလား

ဒီနေ့မှာတော့ ရုံးပတီသီး စိုက်ပျိုးရေးအကြောင်းကို တင်ဆက်ပေးသွားမှာပဲ ဖြစ်ပါတယ်။ ရုံးပတီပင်ကတော့ အနွေးကြိုက် သီးနှံ့ပင်ပဲ ဖြစ်ပါတယ်။ နှစ်ရှည်ပင်ဖြစ်ပေမယ့် နှစ်ချင်း စိုက်ပြီးတော့ စားသုံးနိုင်ပါတယ်။ အသီးကိုသာ စားသုံးရပြီးတော့ အပင်အမြင့်က ၂ ပေကနေ ၈ ပေအထိ ရှိပါတယ်။ အပင်အကျယ်ကတော့ ၁ ပေကနေ ၂ ပေအထိ ကျယ်ပါတယ်။ အပွင့်ကတော့ အဝါနုရောင် ရှိပါတယ်။ မျိုးစေ့များကတော့ အရောင်စုံရှိပြီး အရွယ်ရောက်ပြီးအပင်တွေကတော့ သေးငယ်ကြပါတယ်။ ပန်းပွင့်ပွင့်ပြီး အသီးသီးပြီးတော့ အသီးရဲ့အရောင်ကတော့ အစိမ်းရောင်ရှိပါတယ်။ အသီးကိုတော့ အတို့အမြှုပ်အဖြစ် စားသုံးနိုင်ပြီးတော့ ဟင်းချိုချက်၍သော်လည်ကောင်း၊ ကင်၍သော်လည်ကောင်း စားသုံးနိုင်ပါတယ်။

ရုံးပတီသီးရဲ့ မူရင်းဒေသက တောင်အာဖရိကတိုက်ကပဲ ဖြစ်ပြီးတော့ အခုအခါမှာတော့ ကမ္ဘာ့အရပ်ရပ်မှာ စိုက်ပျိုးနေကြပါတယ်။ ရုံးပတီပင်ကိုတော့ တိုက်ရိုက် အစေ့ချ၍ဖြစ်စေ ပျိုးထောင်၍ဖြစ်စေ စိုက်ပျိုးနိုင်ပါတယ်။ မြေဆီလွှာအပူချိန် အနည်းဆုံး ၆၀ ဒီဂရီဖာရင်ဟိုက် ရှိရင်တော့ စိုက်ပျိုးနိုင်ပါတယ်။ မြေရဲ့ ချဉ်ဖန်ဓာတ် PH 6.0 နဲ့ 6.8 အတွင်းမှာဆိုရင်တော့ ပိုမိုဖြစ်ထွန်းပါတယ်။ မြေရဲ့ချဉ်ဖန်ဓာတ် 6.3 မှ 6.8 အတွင်းမှာဆိုရင်တော့ ပိုမိုဖြစ်ထွန်းပါတယ်။

 စိုက်ပျိုးမယ့်မြေပေါ်မှာတော့ ၂ လက်မှ ဒါမှမဟုတ် ၃ လက်မထိထူအောင် သဘာဝမြေသြဇာ ဒါမှမဟုတ်ရင် မြေဆွေးများကို ထည့်ပေးရပါတယ်။ ရာသီဥတု အေးတယ်ဆိုရင်တော့ မြောင်းပေါင်များကို   နှစ်ပတ်ခန့် ကြိုပြီးတော့ ပလက်စတစ်အိတ် အနက်ရောင်နဲ့ ဖုံးထားပေးရမှာပါ။

ရုံးပတီပင်က ရေငတ်တဲ့ဒဏ်ကို ခံနိုင်ပါတယ်။ အမြဲတမ်း စိုစွတ်မှုကိုတော့ မနှစ်သက်ပါဘူး။ အစေ့ကို တိုက်ရိုက်ချ စိုက်ပျိုးမယ်ဆိုရင်တော့ အနက် ၁ လက်မခွဲခန့် ထားပြီး တစ်ကျင်းနဲ့တစ်ကျင်းကိုတော့ ၆ လက်မကနေ ၈ လက်မအထိ ခွာပြီး စိုက်ပျိုးရမှာပါ။ ပျိုးပင်ကို ပြောင်ရွှေ့စိုက်ပျိုးမယ်ဆိုရင်တော့ တစ်ပင်နဲ့တစ်ပင်ကို တစ်ပေခန့် ခြားပြီး တစ်တန်းနဲ့တစ်တန်းကိုတော့ ၂ ပေခန့် ခြားပေးရမှာဖြစ်ပါတယ်။

ပျိုးပင်များကို ပြောင်းရွှေ့ စိုက်ပျိုးမယ်ဆိုရင်တော့ အမျှင်များ မနာစေရန်အတွက် အထူး ဂရုပြုသင့်ပါတယ်။ ပန်းပွင့်ချိန်နဲ့ အသီးဖြစ်ထွန်းချိန်တွေမှာ ရေကို များစွာ လိုအပ်ပါတယ်။ ဓာတ်မြေသြဇာကိုလည်း အချိုးညီညီ သုံးပြီးတော့ တစ်လ တစ်ကြိမ်ခန့် သုံးပေးရမှာပါ။ ပေါင်းမြတ်များကိုတော့ အမြဲတမ်း ရှင်းလင်းပေးရန် လိုအပ်ပါတယ်။

အသီးများကို ဆွတ်ယူတော့မယ်ဆိုရင်တော့ ၂ လက်မကနေ ၄ လက်မအထိ ရှည်တဲ့အခါ ဒါမှမဟုတ်ရင် ပန်းပွင့်ပြီးတော့ ၄ ရက်ကနေ ၆ ရက်အထိ ကြာတဲ့အခါမှာ ခူးဆွတ်ရမှာပါ။ အသီးတောင့်များဟာ ရင့်လွယ်တဲ့အတွက် ပူတဲ့အချိန်မှာဆိုရင်တော့ နေ့စဉ် ခူးဆွတ်ပေးရမှာဖြစ်ပြီး ပုံမှန်အားဖြင့်တော့ ၂ ရက်တစ်ကြိမ် ခူးဆွတ်ပေးရမှာဖြစ်ပါတယ်။

ရုံးပတီပင်မှာ ကျရောက်တတ်တဲ့ ရောဂါပိုးတွေကတော့ ပြပိုး၊ အနှံဆိုး ၊ကျမ်းပိုးနဲ့ မုန်လာထုတ် လောက်ကောင်တို့ပဲ ဖြစ်ပါတယ်။ စွတ်စိုထိုင်းမှိုင်းတဲ့ ရာသီဥတုတွေမှာဆိုရင်တော့ ညှိုးသေရောဂါများ ကျရောက်တက်ပါတယ်။ ပိုးမွှားများကိုတော့ ပိုးသတ်ဆေးသုံးပြီး နှိမ်နှင်းနိုင်ပြီးတော့ ကျရောက်တက်တဲ့ ရောဂါကိုတော့ အသီးအနှံ့များကို အလှည့်ကျ စိုက်ပျိုးခြင်းဖြင့် ကာကွယ်နိုင်ပါတယ်ခင်ဗျာ။

Mizzima Weekly