ကယားအမျိုးသမီးထုရဲ့အသံ ကြားရဖို့အရေး ဆွေးနွေး

23 November 2016
ကယားအမျိုးသမီးထုရဲ့အသံ ကြားရဖို့အရေး ဆွေးနွေး

ကယားပြည်နယ်ဟာ အခြားပြည်နယ်တွေထက် နှိုင်းယှဉ်လိုက်ရင် အမျိုးသမီးတွေရဲ့အသံဟာ တိတ်ဆိတ်နေပါတယ်။

ကယားပြည်နယ်အတွင်း မြို့နယ်ခုနှစ်ခုက အမျိုးသမီးတွေရဲ့အသံကို ဖော်ထုတ်ပြနိုင်မယ့် ညီလာခံတစ်ခုကို လွိုင်ကော်မြို့မှာ ၃ ရက်တိုင် ပြုလုပ်ခဲ့ပါတယ်။ 

ကယားပြည်နယ်မှာ နေထိုင်ကြတဲ့ အမျိုးသမီးတွေရဲ့ဘဝ လုံခြံုဖို့ ငြိမ်းချမ်းရေးနဲ့ နိုင်ငံရေး ဆွေးနွေးပွဲတွေမှာ ပါဝင်နိုင်ခွင့် စတဲ့ အကြောင်းအရာတွေကို အများပြည်သူတွေ သိရှိနိုင်ဖို့အတွက် ကရင်နီပြည်နယ် အမျိုးသမီးများရဲ့အသံ ညီလာခံကို ပြုလုပ်လိုက်ပါတယ်။ ဒီညီလာခံကို စက်တင်ဘာလ ၁၉ ရက်ကနေ ၂၁ ရက်နေ့အထိ ကယားပြည်နယ် လွိုင်ကော်မြို့မှာ ကျင်းပသွားတာဖြစ်ပြီး ကယားပြည်နယ်အတွင်း ကျေးလက်ဒေသ အသီးသီးက အမျိုးသမီးတွေကိုယ်တိုင် တက်ရောက် ဆွေးနွေးခဲ့ကြပါတယ်။

မမီးမီး (အတွင်းရေးမှူး၊ ကရင်နီပြည်နယ်၊ အမျိုးသမီးအဖွဲ့အစည်း)

အမတို့ပြည်နယ်က အခြားပြည်နယ်တွေထက်စာရင် တအားကို တိတ်နေတယ်။ ဆိုတော့ ပြည်နယ်မှာရှိတဲ့ အမျိုးသမီးတွေက တကယ်မခံစားနေရဘူးလားဆိုတော့ ခံစားနေရတယ်။   ကျေးလက်ဒေသမှာ ရှိတဲ့ အမျိုးသမီးတွေထိကို တရားဥပဒေစိုးမိုးမှုတွေ တရားရေးဆိုင်ရာ လက်လှမ်းမှီမှုတွေ မရှိနေဘူး။ မရှိနေတဲ့အတွက် ဒီအမျိုးသမီးတွေရဲ့ အသံတွေပါအောင်လို့ အမတို့က ကျေးလက်အထိကို သွားပြီးတော့သ စုစည်းမှုတွေလုပ်တယ်။ ကျေးရွာက အမျိုးသမီးတွေ အမျိုးသားတွေနဲ့ ဆွေးနွေးညှိနိုင်းမှုတွေလုပ်ပြီးတော့ သူတို့က သူတို့ပြည်နယ်မှာဖြစ်နေတဲ့ ပဋိပက္ခတွေ ပြဿနာတွေနဲ့ သူတို့လိုချင်တဲ့ သူတို့ရဲ့ အိပ်မက်တွေကို သူတို့တွေ ပွင့်ပွင့်လင်းလင်း ပြောဆို ထုတ်ဖော်လို့ရတဲ့ နေရာလေးတစ်ခုဖြစ်အောင် အဲလိုရည်ရွယ်ချက်နဲ့ ကရင်ပြည်နယ် အမျိုးသမီးများရဲ့အသံဆိုတဲ့ ညီလာခံကို ကျင်းပရခြင်းဖြစ်ပါတယ်။

မဇ္ဈိမ

ဒီညီလာခံကို ကယားပြည်နယ်အတွင်းက လွိုင်ကော်မြို့၊ ဒီမောဆိုမြို့၊ ဖရူဆိုမြို့၊ ရှားတောမြို့၊ ဘောလခဲမြို့၊ မယ်ဆည်မြို့နဲ့ ဖားဆောင်းမြို့ စတဲ့ မြို့နယ် ခုနှစ်မြို့နယ်က အမျိုးသမီးတွေအပြင် အမျိုးသားတွေပါ တက်ရောက်ခဲ့ကြပါတယ်။ အမျိုးသားတွေကိုပါ ညီလာခံတက်ရောက်ဖို့ ဖိတ်ကြားတာနဲ့ ပတ်သက်ပြီး မမီးမီးကပဲ ဆက်ပြီးတော့ ရှင်းပြပါတယ်။

မမီးမီး (အတွင်းရေးမှူး၊ ကရင်နီပြည်နယ်၊ အမျိုးသမီးအဖွဲ့အစည်း)

ဘာဖြစ်လို့ အမျိုးသားတွေကိုပါ အထူးထည့်ဖိတ်ရသလဲဆိုတော့ များသောအားဖြင့် ကျွန်မတို့ဒေသမှာဆိုရင် ဆုံးဖြတ်ချက် ချတဲ့နေရာမှာ အမတို့ဒေသမှာမှမဟုတ်ပါဘူး အခြားဒေသတွေမှာပါ အမျိုးသားတွေပဲ ဦးဆောင်နေတာများပါတယ်။ အဲတော့ အမျိုးသမီးတွေရဲ့ ဘဝလုံခြံုဖို့အတွက် အမျိုးသမီးတွေရဲ့ ကာကွယ်မှု ရဖို့အတွက်ကို အကြမ်းဖက်မှုတွေ လျော့ချဖို့အတွက်ဆို ဆုံးဖြတ်ချက်ချနေတဲ့ အမျိုးသားတွေကလည်း ဝိုင်းပြီးတော့ ကာကွယ်ဖို့လိုတယ်။ အဲလိုကာကွယ်ဖို့အတွက် ဆုံးဖြတ်ချက်ချနေတဲ့ အမျိုးသားတွေ အာဏာရှိနေတဲ့ အမျိုးသားတွေကလည်း ဒီညီလာခံကို တက်ခြင်းအားဖြင့် အမျိုးသမီးတွေရဲ့ အသံတွေ ခံစားချက်တွေကို ကြားပြီးတော့ သူတို့ကလည်း တစ်ဖက်တစ်လမ်းကနေ ပံ့ပိုး ကူညီနိုင်လိမ့်မယ်လို့ မျှော်လင့်ပြီးတော့ အမျိုးသားတွေကို ဖိတ်ရခြင်းဖြစ်ပါတယ်။ ရ မြို့နယ်က အမျိုးသားတွေရော အမျိုးသမီးတွေရော ပါတာပေါ့။

မဇ္ဈိမ

ညီလာခံမှာ နိုင်ငံရေးဆွေးနွေးမှု မူဘောင်ကို ကျားမရေးရာ ရှုထောင့်မှ တင်ပြဆွေးနွေးခြင်းဆိုတဲ့ စကားဝိုင်းတစ်ခုကိုလည်း ညီလာခံ ဒုတိယနေ့မှာ ပြုလုပ်ခဲ့ကြပါတယ်။ ဒါ့အပြင် ညီလာခံကျင်းပနေတဲ့ ၃ ရက်တာအတွင်းမှာလည်း တက်ရောက်လာတဲ့ မြို့နယ်အသီးသီးက အမျိုးသမီး အမျိုးသား အစုအဖွဲ့က ကယားပြည်နယ်က အမျိုးသမီးတွေရဲအသံကို ကဏ္ဍအလိုက် ဖော်ထုတ် ဆွေးနွေးတာတွေ အမျိုးသမီး ငြိမ်းချမ်းရေးနဲ့ လုံခြံုရေး အကြောင်းအရာတွေကို တင်ပြ ဆွေးနွေးတာတွေနဲ့ တက်ရောက်လာသူတွေကလည်း အပြန်အလှန် ဆွေးနွေးမှုတွေ ပြုလုပ်ခဲ့ကြပါတယ်။

နော်မာဂရက်စိန် (မော်ချီဒေသ)

ပြည်နယ်အပါအဝင် ဒေသဆိုရင် ဝေးလည်းဝေးတယ်။ နောက်ပြီးတော့ စစ်ဘေးဒဏ်တွေလည်း အရမ်းသင့်ခဲ့တယ်။ အခု လာတက်တဲ့အတွက် ဌာနငါးခုလုံးကို ထင်ထင်ရှားရှား သိရတာပေါ့နော်။ ပြီးရင် ပညာရေးနဲ့ အမျိုးသမီးပေါ့နော်၊ နိုင်ငံရေးနဲ့ အမျိုးသမီး နောက်ပြီးတော့ သဘာဝသယံဇာတနဲ့ အမျိုးသမီးပေါ့နော်။ ဒီလို ကဏ္ဍငါးခုမှာ ကိုယ်က ဘယ်ဘက်မှာ အခု ကျွန်မတို့ဘက်က လုပ်ဆောင်နေတာ ကတော့ ပညာရေး၊ ကျန်းမာရေးနဲ့ လူ့အခွင့်အရေးပေါ့နော်။ အခြား နိုင်ငံရေးမှာ နိုင်ငံရေးအားနည်းတဲ့ဟာတွေကို အခုလာတက်တဲ့ ညီလာခံမှာဆိုရင်တော့ ပိုပြီးတော့ လုပ်ရမယ်ဆိုတာကို ပိုသိလာ တာပေါ့။

မဇ္ဈိမ

၃ ရက်တာ ကျင်းပသွားတဲ့ ကရင်နီ အမျိုးသမီးများရဲ့ ညီလာခံကို ပြည်နယ်ဝန်ကြီးချုပ်ကိုယ်တိုင် တက်ရောက်ပြီး အဖွင့်မိန့်ခွန်းစကား ပြောပေးသွားပါတယ်။ ဒါ့အပြင် ပြည်နယ်အဆင့် အစိုးရနဲ့ လွှတ်တော် တာဝန်ရှိသူတွေ တိုင်းရင်းသား လက်နက်ကိုင်အဖွဲ့က ပုဂ္ဂိုလ်တွေအပြင် အရပ်ဖက်အဖွဲ့အစည်းတွေပါဝင်တဲ့ ကိုယ်စားလှယ် ၃၅၀ ကျော် တက်ရောက်ခဲ့ကြပါတယ်။

 

Mizzima Weekly