ရန်ကုန်၊ နိုဝင်ဘာ ၁ ။ ။ ဘင်္ဂလားပင်လယ်အော် အနောက်အလယ်ပိုင်းတွင် နောက်သုံးရက်အတွင်း မုန်တိုင်း တစ်လုံးဖြစ်လာနိုင်သည်ဟု မိုးလေဝသပညာရှင် ဒေါက်တာ ထွန်းလွင်က သတိပေးပြောကြားလိုက်သည်။
ဘင်္ဂလားပင်လယ်အော် အရှေ့တောင်ဘက်ပိုင်းမှ အရှေ့လေပွေလှိုင်းတစ်ခု အနောက် မြောက်က ရွေ့လာကာ ပိုမိုအားကောင်းလာပြီး နိုဝင်ဘာ ၃ ရက်နေ့ နောက် ၇၂ နာရီ မုန်တိုင်းငယ်အဆင့်သို့ ရောက်လာနိုင်ကြောင်း ၎င်းကဆိုသည်။
အဆိုပါ မုန်တိုင်းငယ်သည် အိန္ဒိယနိုင်ငံ၏ အရှေ့မြောက်ပိုင်းကို ရွေ့လျားသွားပြီး လဆန်း ၅ ရက် ၆ ရက်တွင် အိန္ဒိယ နိုင်ငံအရှေ့မြောက်ပိုင်း ကမ်းခြေကို ဖြတ်ကျော်ဝင်ရောက်နိုင်ကြောင်း ဦးထွန်းလွင်က ဆိုသည်။
“ မြန်မာနိုင်ငံကို ဝင်ဖို့တော့ မရှိပါဘူး။ ဒါပေမယ့်လည်း စောင့်တော့ကြည့်ပေါ့နော် ။ လမ်းကြောင်းဆိုတာတော့ ပြောင်းလဲနိုင်တာပေါ့။ လောလောဆယ်တော့ မဝင်ပါဘူး " ဟု ၎င်းက ပြောသည်။
ယခုနှစ်အတွင်း မုန်တိုင်း ၃ လုံးမှ ၅ လုံးထိ ဖြစ်နိုင်သည်ဟု ခန့်မှန်းထားကြောင်း ဒေါက်တာထွန်းလွင်က ပြောဆိုထားသည်။
အဆိုပါ ကိစ္စနှင့် ပက်သက်၍ မိုးလေဝသနှင့် ဇလဗေဒညွှန်ကြားမှု ဦးစီးဌာနမှ တစ်စုံတစ်ရာ ထုတ်ပြန်ထားခြင်း မရှိသေးပေ။