အောက်တိုဘာ ၄ ။ ။ ဆီးရီးယား အရှေ့မြောက်ခြမ်းတွင် အောက်တိုဘာ ၃ ရက်က အသေခံဖောက်ခွဲရေးသမားတစ်ဦးက မင်္ဂလာဆောင်အခမ်းအနားတစ်ခုကို ပစ်မှတ်ထားဖောက်ခွဲတိုက်ခိုက်သွားခဲ့ရာ လူ ၂၂ ဦးထက်မနည်း သေဆုံးသွားကြောင်း ဆီးရီးယားလူ့အခွင့်အရေးစောင့်ကြည့်အဖွဲ့က ပြောသည်။
" မင်္ဂလာဆောင်ကို လာပြီး အသေခံဖောက်ခွဲရေးသမားက သူ့ကိုယ်သူ ဖောက်ခွဲသွားတာပါ၊ ၂၂ ဦး သေသွားပါတယ်၊ ဒီမင်္ဂလာဆောင်က ဆီးရီးယား ဒီမိုကရက်တစ် အင်အားစု အဖွဲ့သားတစ်ဦးရဲ့ မင်္ဂလာဆောင်လည်းဖြစ်ပါတယ်" ဟု စောင့်ကြည့်အဖွဲ့ခေါင်းဆောင် ရန်မီအဘဒယ်လ် ရာမင်က ပြောသည်။
ဆီးရီးယားဒီမိုကရက်တစ်အင်အားစု SDF အဖွဲ့သည် နိုင်ငံမြောက်ခြမ်းရှိ အိုင်အက်စ်စစ်သွေးကြွများကို တိုက်ခိုက်နေသော အာရက်ဘ်-ကားဒစ်ရှ် ညွှန့်ပေါင်းအဖွဲ့တစ်ခုလည်း ဖြစ်သည်။
သတို့သားဖြစ်သူလည်း ယင်းတိုက်ခိုက်မှုကြောင့် သေဆုံးသွားကြောင်း ရာမင်က ပြောသည်။
နိုင်ငံအရှေ့မြောက်ပိုင်းရှိ ဟက်ဆက်ခါမြို့ ဆေးရုံဝန်ထမ်းတစ်ဦး၏ အဆိုအရ ယင်းဖြစ်စဉ်ကြောင့် လူ ၂၀ ကျော်သေဆုံးပြီး ဒါဇင်ပေါင်းများစွာ ဒဏ်ရာရခဲ့သည်ဟု သိရသည်။
ကားဒစ်ရှ်တို့ ထိန်းချုပ်ထားသော အဆိုပါမြို့မှာ ရံဖန်ရံခါဆိုသကဲ့သို့ အိုင်အက်စ်တို့၏ ပစ်မှတ်ထားတိုက်ခိုက်ခံရသည့် နေရာတစ်ခုလည်း ဖြစ်နေခဲ့သည်။