စက်တင်ဘာ ၁၅ ။ ။ အင်ဒိုနီးရှားနိုင်ငံ ဘာလီနှင့် လွန်ဘော့ဂ်ကျွန်းများအကြား ပြေးဆွဲပေးနေသည့် စက်လှေတစ်စီး စက်တင်ဘာလ ၁၅ ရက်က ပေါက်ကွဲမှုဖြစ်ပွားခဲ့ရာ နှစ်ဦးသေဆုံးပြီး ၁၃ ဦး ထိခိုက်ဒဏ်ရာရရှိခဲ့ကြောင်း ရဲများက ပြောသည်။ စက်လှေတွင် နိုင်ငံခြားသားများအပါအဝင် ခရီးသွား ၃၅ ဦးထိ လိုက်ပါစီးနင်းခဲ့ပြီး ဒက်ချ်နိုင်ငံသားတစ်ဦးနှင့် အင်ဒိုနိုင်ငံသား တစ်ဦးတို့ သေဆုံးသွားခဲ့သည်။
" နှစ်ယောက်သေတယ်၊ ၁၃ ယောက် ဒဏ်ရာရတယ်" ဟု ဘာလီကျွန်း ရဲတပ်ဖွဲ့ ပြောခွင့်ရပုဂ္ဂိုလ် မာဒီ ဆူဒါနာက ပြောသည်။ စက်လှေပေါက်ကွဲမှုသည် လွန်ဘော့ဂ်ကျွန်း အပြင် ကမ်းရိုးတန်းတွင် ဖြစ်ပွားခြင်းဖြစ်သည်။
" လှေပေါ်မှာ ပေါက်ကွဲစေတတ်တဲ့ ပစ္စည်းတစ်မျိုးမျိုး ပါလာပုံရပါတယ်၊ ဒါကြောင့်ပေါက်ကွဲတာဖြစ်နိုင်ပါတယ်" ဟု ဆိုသည်။ ယင်းလှေပေါ်တွင် သြစတြေးလျ၊ ဗြိတိန်၊ ကိုရီးယား၊ ပြင်သစ်နှင့် ဂျာမန်နိုင်ငံ သားများလည်း လိုက်ပါစီးနင်းခဲ့ကြောင်း သိရသည်။ ဘာလီနှင့် လွန်ဘော့ဂ်ကျွန်းများသည် အင်ဒိုနီးရှား၏ အကျော်ကြားဆုံး ခရီးသွားနေရာများဖြစ်ကြသည်။
လက်ရှိအချိန်ထိ စက်လှေပေါက်ကွဲရခြင်း၏ အကြောင်းရင်းကို ရှင်းရှင်းလင်းလင်း မသိရသေးဘဲ အာဏာပိုင်များက စုံစမ်း စစ်ဆေးမှုများ လုပ်ဆောင်နေလျက်ရှိသည်။
