ရန်ကုန်၊ စက်တင်ဘာ ၃ ။ ။ နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်သည် စက်တင်ဘာလ ဒုတိယပတ်အတွင်း အမေရိကန်ခရီးစဉ် သွားရောက်မည် ဖြစ်ကြောင်း နိုင်ငံခြားရေး ဝန်ကြီးဌာနမှ သိရသည်။
ဒေါ်အောင်ဆန်းစုကြည်အနေဖြင့် အမေရိကန်သို့ မသွားရောက်မှီတွင် စက်တင်ဘာ ၂ ရက်မှ ၈ ရက်နေ့အထိ ကျင်း ပမည့် အာဆီယံအစည်းအဝေးကိုလည်း ၅ ရက်နေ့နောက်ပိုင်းတွင် တက်ရောက် သွားမည်ဖြစ်ကြောင်း နိုင်ငံခြားရေး ဝန်ကြီးဌာန နိုင်ငံခြားရေးရာ ဦးစီးဌာ နက ညွှန်ကြားရေးမှူးချုပ် ဦးကျော်ဇေယျ က မဇ္ဈိမကို အတည်ပြုပြောကြားသည်။
"အာဆီယံ အရင်သွားပါလိမ့်မယ်။ အာဆီယံက စလုပ်တာက ၂ ရက်ကနေ ၈ ရက်နေ့ဆိုတော့ summit ပိုင်းသွားမှာပါ။ summit က နောက်ပိုင်းကျတာပေါ့။ အဲ့ဒါပြီးရင် မြန်မာပြည်ပြန်လာမယ်။ ပြီးရင် အမေရိကန် သွားဖို့ ရှိပါမယ်" ဟု ဦး ကျော်ဇေယျက ပြောသည်။
ဒေါ်အောင်ဆန်းစုကြည်သည် ရခိုင်ပြည်နယ်အကြံပေး ကော်မရှင်ဥက္ကဋ္ဌ ကိုဖီအာနန်နှင့် စက်တင်ဘာ ၅ ရက်နေ့ တွင် တွေ့ဆုံသွားမည် ဖြစ်သည်။
သူမ၏ အမေရိကန် ခရီးစဉ်အတွင်း ဝါရှင်တန်ဒီစီသို့ ချစ်ကြည်ရေး အလည်အပတ်ခရီး သွားရောက်မည် ဖြစ်ပြီး နယူးယောက် မြို့တွင် ကျင်းပမည့် ကုလသမဂ္ဂအထွေထွေညီလာခံသို့ တက်ရောက်မည်ဖြစ်ပြီး ဥရောပသမဂ္ဂသို့သွားရောက်ကာ သံအ မတ်ကြီး များနှင့် တွေ့ဆုံမည် ဖြစ်ကြောင်း ဦးကျော်ဇေယျက ပြောသည်။
နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် သြဂုတ်လ ၁၇ က တရုတ်နိုင်ငံသို့ ငါးရက်ကြာသွားရောက် ခဲ့ပြီး တရုတ်သမ္မတ ရှီကျင့်ဖျင့်နှင့် တွေ့ဆုံခဲ့သေးသည်။
အောက်တိုဘာလအတွင်း၌လည်း ဘရာဇီး၊ ရုရှ၊ အိန္ဒိယ၊ တရုတ်နှင့် တောင်အာ ဖရိက (BRICS) နယ်ကျော် ကူညီ ထောက်ပံ့မှုများ ညီလာခံသို့ တက်ရောက်ရန် အိန္ဒိယနိုင်ငံသို့ သွားရောက်မည်ဖြစ်ကြောင်း အိန္ဒိယနိုင်ငံခြားရေး ဝန်ကြီး ဌာနက သြဂုတ်လ ၂၆ ရက်နေ့က သတင်းထုတ်ပြန်ထားသည်။
