ဆိုးလ် စက်တင်ဘာ ၂ ။ ။ တောင်ကိုရီးယား၏ Samsung Electronics ကုမ္ပဏီသည် ဈေးကွက်တွင်းသို့ ရောင်းချထားပြီးဖြစ်သည့် ယင်း၏ နောက်ဆုံးထွက်ရှိထားသော Galaxy Note 7 ဖုန်းများကို ပြန်သိမ်းတော့မည်ဟု ကြေညာသွားခဲ့သည်။
ဖုန်းတစ်ချို့မှာ ဘထ္ထရီအားသွင်းစဉ် ပေါက်ကွဲမှုများဖြစ်ပေါ်ခဲ့သည့် သတင်းများ ထွက်ခဲ့ပြီးနောက် ယခုကဲ့သို့ ဈေးကွက်တွင်းမှ ပစ္စည်းများ ပြန်သိမ်းရသည်အထိ ဖြစ်ပေါ်ခဲ့ရခြင်းဖြစ်ကြောင်း ရိုက်တာသတင်းဌာနက စက်တင်ဘာ ၁ ရက်တွင် ဖော်ပြသည်။
ကနဦးအစောပိုင်းထွက်ပေါ်ထားသော သတင်းများအရလည်း ယင်းဖုန်းများကို မကြာမီ ကုမ္ပဏီက ပြန်သိမ်းတော့မည်ဟု ဖော်ပြထားရှိခဲ့သည်။
ပေါက်ကွဲမှုဖြစ်ပွားရခြင်းမှာ ဘထ္ထရီနှင့် ဆက်စပ်နေကြောင်း အမည်မဖော်လိုသူ Samsung တာဝန်ရှိသူတစ်ဦးကို ကိုးကား၍ စက်တင်ဘာလ ၁ ရက် အစောပိုင်းတွင် ယွန်ဟပ် သတင်းအေဂျင်စီက ဖော်ပြထားသည်။
ယင်း သတင်းရင်းမြစ်အရ Samsung သည် ယင်းပေါက်ကွဲမှုဖြစ်ပွားရခြင်း၏ အကြောင်းကို စုံစမ်းစစ်ဆေးပြီး ရလဒ်ကို ကြေညာသွားမည်ဟု သိရှိရသည်။
အလားတူ ပေါက်ကွဲစေတတ်သော ဘထ္ထရီများကြောင့်လည်း Samsung အနေဖြင့် ယင်း၏ Galaxy Note 7 ဖုန်း ပြည်ပတင်ပို့မှုများ နှောင့်နှေးကြန့်ကြာခဲ့ရပြီး ကမ္ဘာ့ဦးဆောင်စမတ်ဖုန်းထုတ်လုပ်သူ ကုမ္ပဏီ၏ ဈေးကွက်အတွင်း ဒေါ်လာ ၇ ဘီလီယံထိ နစ်နာခဲ့ရသည်ဟု ရိုက်တာသတင်းတစ်ရပ်တွင် ဖော်ပြထားသည်။