နေပြည်တော်၊ ဇူလိုင် ၁၁ ။    ။ အမျိုးသမီးများ၏ ကျန်းမာရေးနှင့် ၎င်းတို့၏ အခွင့်အရေးတို့ကို ယခုထက်ပိုပြီး နှစ်ဆပိုမို ကာကွယ်စောင့်ရှောက်ပေး ရန်နိုင်ငံတကာ အသိုင်းအဝန်းသို့ ကုလသမဂ္ဂက တိုက်တွန်းလိုက်သည်။

 ၂၀၁၅ ခုနှစ်၊ ဇူလိုင် ၁၁ရက်က ကျရောက်သည့် “ကမ္ဘာ့လူဦးရေနေ့” တွင် ကုလသမဂ္ဂ လက်ထောက်အထွေထွေ အတွင်းနှင့် ကုလသမဂ္ဂ လူဦးရေရန်ပုံငွေအဖွဲ့ အမှုဆောင် ဒါရိုက်တာတို့က နိုင်ငံတကာအသိုင်းအဝန်းသို့ သဝဏ်လွှာပေးပို့ကာ တိုက်တွန်း ထားခြင်းဖြစ်သည်။

 အဆိုပါ သဝဏ်လွှာတွင် “အမျိုးသမီးနှင့် ဆယ်ကျော်သက်အရွယ် မိန်းကလေးတို့သည် ပဋိပက္ခနှင့် သဘာဝဘေးအန္တရာယ် ကြုံတွေ့ချိန်တွင် နှိပ်စက်ညှင်းပန်းမှု၊ လိုင်ပိုင်းဆိုင်ရာ ခေါင်းပုံဖြတ် အမြတ်ထုတ်မှု၊ အကြမ်းဖက်မှုနှင့် အတင်းအဓမ္မ လက်ထပ် ထိမ်းမြားခံရမှု စသည်တို့ကို ကြုံတွေ့ ရင် ဆိုင်ရနိုင်ခြေ ပိုမိုများပြားသည်” ဟု ရေးသားထားသည်။

 ထို့ပြင် ငြိမ်းချမ်းရေးဆွေးနွေးပွဲများ၊ ငြိမ်းချမ်းရေးတည်ဆောက်မှုများနှင့် ပြည်လည်ထူထောင်ရေး လုပ်ငန်းတို့တွင် အမျိုးသမီးများ၊ ဆယ်ကျော်သက်အရွယ်မိန်းကလေးများနှင့် လူငယ်တို့ အပြည့်အဝ ပူးပေါင်းပါဝင်မှု ရရှိစေရေးအတွက်လည်းကောင်း၊ အစိုးရများ အနေဖြင့် အပြည်ပြည်ဆိုင်ရာ ဥပဒေ များကို လိုက်နာမှုရှိစေရေးအတွက်လည်းကောင်း၊ လိင်ပိုင်းဆိုင်ရာ အကြမ်းဖက်မှုကျူးလွန် သူတို့ကို တရားဥပဒေ ဘောင်အတွင်း အရေးယူနိုင်စေရေးအတွက်လည်းကောင်း ဆောင်ရွက်ပေးရန် လိုအပ်သည်ဟုလည်း သဝဏ်လွှာတွင် ဖော်ပြထားသေးသည်။

 ကမ္ဘာ့လူဦးရေနေ့ အခမ်းအနားကိုလည်း မြန်မာနိုင်ငံ၊ နေပြည်တော်ရှိ Hotel Royal ACE တွင် ကျင်းပခဲ့ပြီး အခမ်းအနားသို့ တက်ရောက်ခဲ့သည့် ဒုတိယသမ္မတ ဒေါက်တာစိုင်းမောက်ခမ်းက “အမျိုးသမီးတစ်ဦး၏ အသက်တစ်ချောင်းသည် မည်သည့်အချိန် မည်သည့်အခြေအနေတွင်မဆို ခြွင်းချက်မရှိ တန်ဖိုးရှိနေစေရမည်” ဟု အဖွင့်မိန့်ခွန်းတွင် ထည့်သွင်းပြောဆိုသွားသည်။

 အရေးပေါ်အခြေအနေကျရောက်သည့် အချိန်တွင် အမျိုးသမီးများနှင့် မိန်းကလေးငယ်များကို ပိုမိုထိခိုက်နိုင်ပြီး ၎င်းတို့အတွက် လိုအပ်ချက်များမှာလည်း လစ်လျူရှုခံနေရသည်ဟု ဒေါက်တာစိုင်းမောက်ခမ်းက ပြောသည်။

ကျန်းမာရေးဝန်ကြီးဌာန၏ အချက်အလက်များအရ မြန်မာနိုင်ငံတွင် တစ်နှစ်လျှင် ကိုယ်ဝန် ဆောင်မိခင် (၉) သိန်းကျော် ရှိပြီး မွေးဖွားမှုပြဿနာကြောင့် သေဆုံးရသည့် မိခင် (၂၀၀၀)ကျော်ခန့် ရှိသည်။

 မြန်မာနိုင်ငံတွင် အမျိုးသမီးများအပေါ် လိင်ပိုင်းဆိုင်ရာအကြမ်းဖက်ခံရမှုများအပြင် အိမ်တွင်း အကြမ်းဖက်ခံရမှုများကို ဆိုးရွားစွာ ကြုံတွေ့နေရသည်ဟုလည်း အမျိုးသမီး အခွင့်အရေးလှုပ်ရှားသူများက အစဉ်တစိုက် ပြောဆိုလျက်ရှိသည်။

ကမ္ဘာ့လူဦးရေ သန်း ၅၀၀၀ပြည့်သည့် ၁၉၈၇ခုနှစ်၊ ဇူလိုင် ၁၁ရက်ကို ကမ္ဘာ့လူဦးရေနေ့အဖြစ် စတင်သတ်မှတ်ခဲ့ ခြင်းဖြစ်သည်။