လက်တွေ့ဆန်ပြီး အမျိုးချစ်သည့် ဒေါ်အောင်ဆန်းစုကြည်ဟု တရုတ်သတင်းစာရေး

လက်တွေ့ဆန်ပြီး အမျိုးချစ်သည့် ဒေါ်အောင်ဆန်းစုကြည်ဟု တရုတ်သတင်းစာရေး
ဓာတ်ပုံ-သက်ကို မဇ္ဈိမ

 နိုင်ငံတော်၏ အတိုင်ပင်ခံပုဂ္ဂိုလ်နှင့် နိုင်ငံခြားရေးဝန်ကြီး ဒေါ်အောင်ဆန်းစုကြည်သည် သူမ၏ ငါးရက်တာ အလည်အပတ် ခရီးစဉ်အဖြစ် တရုတ်နိုင်ငံသို့ သြဂုတ် ၁၇ ရက်တွင် ရောက်ရှိမည်ဖြစ်သည်။   မြန်မာ့ ထိပ်တန်းခေါင်းဆောင် တစ်ဦးအနေဖြင့် စက်တင်ဘာလလယ် အမေရိကန်ခရီးစဉ်မတိုင်မီ တရုတ်သို့ ဦးစွာ လာရောက်ခြင်းလည်း ဖြစ်သည်။

သူမသည် တာဝန် စတင်ထမ်းဆောင်ခဲ့ပြီးနောက်ပိုင်း နိုင်ငံခြားခရီးစဉ်သုံးခု သွားရောက်ထားခဲ့ရာ ယင်းခရီးစဉ်များ အားလုံးသည် အာဆီယံဒေသတွင်း နိုင်ငံများသာဖြစ်ခဲ့သည်။ ယခု တစ်ကြိမ်တွင်မူ NLD အစိုးရ ဦးဆောင် ဖွဲ့စည်းထားသော မြန်မာအစိုးရသစ် အနေဖြင့် အိမ်နီးချင်း ဦးစားပေး မူဝါဒကို ရွေးချယ်ကိုင်ဆွဲ ခဲ့ခြင်းအားဖြင့် အင်အားကြီး နိုင်ငံများအကြား ဘက်လိုက်ခြင်းမရှိဘဲ သာတူညီမျှ ရှိစေရန် လုပ်ဆောင်နေလျက်ရှိသည်။

ထွက်ပေါ်နေသော သတင်းများအရ ဒေါ်အောင်ဆန်းစုကြည်၏ ယခုတရုတ်ခရီးစဉ်နှင့် အမေရိကန် ခရီးစဉ်များ နောက်တွင်လည်း မြောက်ကိုရီးယား၊ ပြင်သစ်နှင့် ဂျာမနီ နိုင်ငံခရီးစဉ်များလည်း ရှိနေသေးသည်ဟု သိရခြင်းအားဖြင့် သူမ၏ အစိုးရမှာ ဘက်မလိုက်သော ဒီမိုကရေစီ လှိုင်းသစ်တစ်ရပ်ကို ဖော်ဆောင်သွားမည့်သဘော ဆောင်နေလျက် ရှိသည်။

ဒေါ်အောင်ဆန်းစုကြည်သည် လက်တွေ့ဆန်သော မျိုးချစ်စိတ်အပြည့်ရှိသည့် နိုင်ငံရေးသမား တစ်ဦးဖြစ်သည်။ သူမသည် အနောက်တိုင်းစံနှုန်းများကို ထောက်ခံသကဲ့သု့ိ မြန်မာနိုင်ငံ၏ အမျိုးသားရေးပိုင်းနှင့် ပတ်သက်၍လည်း ရှင်းလင်းစွာ သဘောပေါက်နားလည်ထားသည်။ " အားလုံးသိကြတဲ့အတိုင်း ကျွန်မတို့ နိုင်ငံဟာ တောင်အာရှနဲ့ အရှေ့တောင်အာရှ ၊ မြောက်ဘက်မှာ တရုတ်တို့ ဆုံတဲ့အမှတ်မှာ တည်ရှိနေတာဖြစ်ပါတယ်" ဟုလည်း သူမက နိုင်ငံခြား သံတမန်များနှင့်တွေ့ဆုံစဉ် ပြောထားသည်။

အိမ်နီးချင်းနိုင်ငံများနှင့် ချစ်ကြည်ရင်းနှီးရန် အရေးကြီးကြောင်း သူမက အလေးပေးပြောကြားထားသကဲ့သို့ ငြိမ်းချမ်းရေးနှင့် သာယာဝပြောရေးဆိုင်ရာ အခွင့်အလမ်းများရရှိရန် လိုကြောင်း ဆိုထားသည်။ သူမ၏ သံတမန် ဆက်ဆံရေးမူကို ကြည့်လျင် အားလုံးအပေါ်တွင် သာတူညီမျှ ရှိစေသည်ကို ဖော်ပြနေသည်။ မြန်မာအတွက် အကြီးဆုံးသော အိမ်နီးချင်းနိုင်ငံဖြစ်နေသော တရုတ်၏ နိုင်ငံခြားရေးဝန်ကြီး ဝမ်ယီမှာ အစိုးရသစ် တက်လာပြီး နိုင်ငံသို့လာရောက်ရန် ပထမဆုံး ဖိတ်ကြားခံရသော ပုဂ္ဂိုလ် ဖြစ်ခဲ့သည်။

ယင်းနောက်ပိုင်း သမ္မတ ဦးထင်ကျော်နှင့် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့သည် အင်အားချိန်ခွင်လျှာ တစ်ခုကို ထိန်းသိမ်းနိုင်ရန် ၎င်းတို့၏ ပထမဆုံးပြည်ပခရီးစဉ်အဖြစ် တရုတ် သို့မဟုတ် အခြား အင်အားကြီးနိုင်ငံများကို ကျော်ကာ လာအိုနိုင်ငံကို ရွေးချယ်သွားရောက်ခဲ့သည်။

 NLD အစိုးရ ဦးဆောင်ဖွဲ့စည်းထားသော မြန်မာအစိုးရအနေဖြင့် တရုတ်နိုင်ငံကိုရော အမေရိကန်နှင့်ပါ ထိန်းသိမ်း ဆက်ဆံနေခဲ့ပြီး တစ်ဘက်တွင်လည်း အာဆီယံနိုင်ငံများနှင့်ပါ လိုက်လျောညီထွေ ဆက်ဆံပေးနေသည်ကိုလည်း တွေ့မြင်နိုင်မည်ဖြစ်သည်။ ယင်းမှာ တည်ငြိမ်မှုအရှိဆုံး ဒီမိုကရေစီ မဟာဗျူဟာတစ်ရပ် ဖြစ်မည်ဖြစ်သည်။ ယင်းဗျူဟာအရ အားလုံးအပေါ် သာတူညီမျှရှိစေသော ဒီမိုကရေစီ သံတမန်ဆက်ဆံမှုကို ဖော်ဆောင်ခြင်းဖြင့် နိုင်ငံခြား အကူအညီများ ဘက်စုံဒေါင့်စုံမှ ရရှိနိုင်လာစရာ ရှိနေသည်။

NLD အစိုးရအနေဖြင့် တရုတ်နှင့် ဆက်ဆံမှုပိုင်းကို များစွာ အလေးထားလုပ်ဆောင်ခဲ့သည်။ လက်ရှိအချိန်တွင် တရုတ်သည် မြန်မာနိုင်ငံ၏ အကြီးဆုံး ကုန်သွယ်ဘက်နိုင်ငံဖြစ်ကာ နှစ်နိုင်ငံကုန်သွယ်မှု ပမာဏသည် မြန်မာ၏ စုစုပေါင်း နိုင်ငံခြားကုန်သွယ်မှု၏ ၄၀ ရာခိုင်နှုန်း ရှိနေသည်။ အလားတူ တရုတ်သည် မြန်မာနိုင်ငံတွင် အကြီးဆုံးသော ရင်းနှီးမြုပ်နံှသူ နိုင်ငံလည်းဖြစ်သည်။ တရုတ်၏ ရင်းနှီးမြုပ်နှံမှုများသည် မြန်မာနိုင်ငံရှိ စုစုပေါင်း နိုင်ငံခြား ရင်းနှီးမြုပ်နှံမှုများ၏ ၅၀ ရာခိုင်နှုန်း ရှိနေသည်။

နိုင်ငံတွင် ဖွံ့ဖြိုးတိုးတက်ရန် လိုအပ်နေသေးသော အခြေခံအဆောက်အအုံ ကဏ္ဍအတွက် တရုတ်ဦးဆောင်သော အာရှ အခြေခံအဆောက်အအုံ ရင်းနှီးမြုပ်နံှမှုဘဏ်ထံမှ များပြားသည့် ကူညီထောက်ပံ့မှုများလည်း ရရှိနိုင်စရာရှိသည်။ တစ်ဘက်တွင်လည်း တရုတ်တို့ဘက်က မြန်မာ၏ အမျိုးသား ပြန်လည်ရင်ကြားစေ့ရေးနှင့် ငြိမ်းချမ်းရေး ဆွေးနွေးမှုများအတွက် ရှေ့တိုးလုပ်ဆောင်နေမှုများကို အပြည့်အ၀ ထောက်ခံပေးလျက်ရှိသည်။

ဇူလိုင်လက လာအိုနိုင်ငံ ဗီယန်ကျင်းတွင် ဒေါ်အောင်ဆန်းစုကြည်နှင့် တွေ့ဆုံစဉ် တရုတ် နိုင်ငံခြားရေးဝန်ကြီးက ၎င်းတို့ နိုင်ငံအနေဖြင့် မြန်မာနိုင်ငံ၏ ယုံကြည်အားကိုးခြင်းခံရသော ပူးပေါင်းဘက်ဖြစ်လိုရန် ဆန္ဒရှိကြောင်း ပြောဆိုထားသည်။ နှစ်နိုင်ငံအကြား ကဏ္ဍပေါင်းစုံတွင် လက်တွေ့ကျကျပူးပေါင်းရေး၊ ပြည်သူအချင်းချင်း ဆက်ဆံမှုပိုင်းနှင့် ယဉ်ကျေးမှု ဖလှယ်မှုများ တိုးမြင့်ရေးတု့ိတွင်လည်း တိုးမြင့်လုပ်ဆောင်ရေး ၎င်းက ပြောကြားထားသည်။

သို့သော်လည်း နှစ်နိုင်ငံဆက်ဆံရေးပိုင်းကို အနည်းနှင့်အများ ထိခိုက်စေခဲ့ရသော နယ်စပ်ဒေသ လုံခြုံမှုပိုင်းဆိုင်ရာ ကိစ္စရပ်များကိုလည်း လျစ်လျူရှုထား၍ မရပါ။

အလားတူ ဦးသိန်းစိန်အစိုးရလက်ထက်က ရပ်ဆိုင်းထားခဲ့သည့် မြစ်ဆုံဆည်စီမံကိန်းသည်လည်း နှစ်နိုင်ငံ စီးပွားရေး တိုးမြင့်ပူးပေါင်းရေးအတွက် အတားအဆီး တစ်ခုကဲ့သို့ တည်ရှိနေလျက်ရှိသည်။ ယင်းကိစ္စနှင့် ပတ်သက်၍ မြန်မာအစိုးရက ယင်းဆည်စီမံကိန်းနှင့်ပတ်သက်၍ သုံးသပ်ရန် ကော်မတီတစ်ရပ်ဖွဲ့စည်းပေးထားလိုက်ပြီဖြစ်ကာ သက်ဆိုင်ရာတာဝန်ရှိသူများ တိုင်ပင်ဆုံးဖြတ်စစ်ဆေးပြီးသည်နှင့် ဆုံးဖြတ်ချက်တစ်ခုကို လုပ်ဆောင်သွားရတော့မည်ဖြစ်သည်။

အဓိကအင်အားကြီးနိုင်ငံများဖြစ်သော တရုတ်နှင့် အမေရိကန်တို့ကြားတွင် ချိန်ခွာလျှာညှိရင်း ကြီးမားသော နိုင်ငံခြားရင်းနှီးမြုှပ်နှံမှုစီမံကိန်းများကို ကိုင်တွယ်ဖြေရှင်းရန်အတွက်ကမူ NLD အစိုးရသစ်၏ လုပ်ဆောင်နိုင်မှုကို စမ်းသပ်တိုင်းတာသွားမည်ဖြစ်သည်။

Mizzima Weekly