ရှစ်လေးလုံး မဟာအရေးတော်ပုံစိတ်ဓါတ် အဓွန့်ရှည်ပါစေ

ရှစ်လေးလုံး မဟာအရေးတော်ပုံစိတ်ဓါတ် အဓွန့်ရှည်ပါစေ
ဓာတ်ပုံ-သူရ မဇ္ဈိမ

လွန်ခဲ့သည့် (၂၈) နှစ်က မိမိတို့နိုင်ငံတွင် ဒီမိုကရေစီရေး၊ စစ်အာဏာရှင်စနစ် ဆန့်ကျင်ရေးအတွက် လူထုအုံကြွမှုကြီးဖြစ်ခဲ့သည်။ ၁၉၈၈ ခု သြဂုတ်လ ၈ ရက်နေ့တွင် တိုင်းပြည်နှင့်အဝှမ်း ဆန္ဒပြပွဲများပြုလုပ်ခဲ့ကြသည်။ ကမ္ဘာကျော် ဒီမိုကရေစီအုံကြွမှုကြီးအဖြစ် ထင်ရှားခဲ့သည်။ ထို့ကြောင့် ၈.၈.၈.၈ ( ရှစ်လေးလုံး) အရေးတော်ပုံကြီးအဖြစ် သမိုင်းတွင်ခဲ့သည်။

ယင်း ရှစ်လေးလုံးအရေးတော်ပုံကြီးမှာ ၁၉၆၂ ခုနှစ်မှစတင်ကာ တိုင်းပြည်ကို တပါတီအာဏာရှင်စနစ်ဖြင့် အုပ်ချုပ်ခဲ့ကြသည့် စစ်အာဏာသိမ်းအစိုးရကို လက်နက်မဲ့ အကြမ်းမဖက် လူထုအင်အားဖြင့် ဖြုတ်ချနိုင်ခဲ့သည့် သမိုင်းဝင်အရေးတော်ပုံကြီးဖြစ်သည်။  ၂၉ နှစ်တာ တိုင်းပြည်အပေါ် ဖိနှိပ်အုပ်ချုပ်ကာ ထင်ရာစိုင်းကိုယ်ကျိုးစီးပွားရှာသူများ၊ အာဏာကို လက်နက်ဖြင့် မတရားရယူလိုစိတ်အဓိက အားကိုးသူများကို လူထုကြီးက မလိုလားမနှစ်သက်ကြောင်း၊ ယင်းတို့၏ အုပ်ချုပ်မှုစနစ်ကို မှားယွင်းနေပြီဖြစ်ကြောင်း ဆန္ဒထုတ်ဖေါ်ခဲ့ကြသည့် အရေးတော်ပုံကြီးဖြစ်သည်။

သို့သော် ဝမ်းနည်းဖို့ကောင်းသည်မှာ ၂၆ နှစ်တာ တိုင်းပြည်ကို ဓါးမိုးအုပ်ချုပ်သူများ အာဏာပလ္လင်ပေါ်က ဆင်းပေးလိုက်ကြရသော်လည်း ယင်းတို့၏ လက်ပါးစေ စစ်ဝါဒီနောက်လိုက်များက ဆန္ဒပြပြည်သူများကို ရက်စက်စွာ ဖိနှိပ်သတ်ဖြတ် လူစုခွဲလျက် နောက်ဆုံးတွင် နောက်ထပ် စစ်အာဏာသိမ်းမှု တည်းဟူသော နိုင်ငံရေးရာဇဝတ်မှုကြီးကို ကျူးလွန်လိုက်ကြပြန်သည်။ သည်လိုနှင့် စစ်အာဏာရှင်များ ပုံစံအမျိုးမျိုးဖြင့် အုပ်ချုပ်သော အာဏာရှင်စနစ်မှာ ဆက်လက် အသက်ရှင်လျက် ပြည်သူများမှာ ဆင်းရဲတွင်းနက်သထက် နက်ခဲ့ကြရပြန်သည်။ ပညာရေး၊ စီးပွားရေး၊ နိုင်ငံရေး၊ အစရှိသော နယ်ပယ်အသီးသီးတွင် အနှုတ်လက္ခဏာများ ဆထက်တံပိုး နိမ့်ပါးကာ ကမ္ဘာ့အလယ်တွင် မျက်နှာငယ်သထက် ငယ်ခဲ့ကြရပြန်သည်။

ရှစ်လေးလုံး အရေးတော်ပုံကာလက စစ်ဝါဒီများရဲ့လက်ချက်ကြောင့် ပြည်သူ ထောင်ပေါင်းများစွာ သေကြေခဲ့ကြရသည်မှန်သော်ငြားလည်း၊ ပြည်သူ ထောင်ပေါင်းများစွာ အကျဉ်းထောင်တွေအတွင်း   ရောက်ရှိခဲ့ကြသော်ငြားလည်း၊ ပြည်သူ ထောင်ပေါင်းများစွာ မိတကွဖတကွဲ ဖြစ်ကြရသော်ငြားလည်း ရှစ်လေးလုံး အရေးတော်ပုံကြီးရဲ့ အရင်းမူလ အရေးတော်ပုံစိတ်ဓါတ်မှာ ငြိမ်းချမ်းရေးဖြစ်သည်။ ဖွံ့ဖြိုးတိုးတက်ရေးဖြစ်သည်။ တိုင်းပြည်တိုးတက်ရေးအတွက် အတူလက်တွဲ ငြိမ်းချမ်းစွာ အလုပ်လုပ်ကိုင်နိုင်ရေးဖြစ်သည်။ လက်စားချေရေးနှင့် ရန်လိုမုန်းတီးမှုကို အခြေခံသည့် ကျဉ်းမြောင်းသော နိုင်ငံရေးအယူအဆအပေါ် အခြေမခံခဲ့ပါချေ။

ထို့ကြောင့် ပြည်သူတစ်ရပ်လုံးသည် စစ်အာဏာရှင်စနစ် ဖြုတ်ချရေးနိုင်ငံရေးလမ်းကြောင်းပေါ်တွင် အကင်းပါးစွာ အစဉ်တစိုက်ရပ်တည်လျက် ဒီမိုကရေစီရေးအတွက် ဆက်လက်ချီတက်ခဲ့ကြသည်။ လက်စားချေ အမြစ်ပြတ်ချေမှုန်းရေးအစွန်းတဖက်နှင့် လက်နက်ချအရှုံးပေးရေး အခြားအစွန်းတဖက်တို့ကို ကျွမ်းကျင်ပါ်းနပ်မှန်ကန်စွာ ရှောင်ရှားနိုင်ခဲ့ကြသည်။ ဒီမိုကရေစီနည်းလမ်းအသွယ်သွယ်ကို မရရအောင် ရှာဖွေဖေါ်ဆောင်ကာ အာဏာရှင်စနစ်ကို နယ်မြေကျဉ်းစေခဲ့သည်။ ဖြစ်ပေါ်လာသော အခွင့်အခါနှင့် အခြေအနေကို ပါးနပ်ကျယ်ပြန့်စွာ အမိအရဆုပ်ကိုင်လျက် ဒီမိုကရေစီနိုင်ငံတော်သစ်လမ်းစပေါ် အောင်မြင်အောင် သယ်ဆောင်ချမှတ်လာနိုင်ခဲ့သည်။

ယခုအခါ အားလုံးသိသည့်အတိုင်း စံတော်ဝင် ဒီမိုကရေစီစနစ်ကို မရောက်ရှိသေးသည့်တိုင်စစ်အာဏာရှင်စနစ်ကို ရာနှုန်းပြည့်မဖယ်ရှားနိုင်သေးသည့်တိုင် ဒီမိုကရေစီအခြေခံကောင်းများနှင့် တိုင်းပြည်တိုးတက်ရေးအတွက် စတင်ဦးတည်နိုင်ခဲ့ပြီဖြစ်သည်။ ဝမ်းမြောက်ဖွယ် အခွင့်အရေးမှာ အမျိုးသားပြန်လည် ရင်ကြားစေ့ရေးမူဘောင်အပေါ်တွင် ပြည်တွင်းငြိမ်းရေးကျိုးပမ်းမှုများ   ခေါင်းထောင်နိုင်ခွင့်ရရှိလာနေခြင်းပင်ဖြစ်သည်။

ယခုအခါ ရှစ်လေးလုံး မဟာအရေးတော်ပုံစိတ်ဓါတ်ဖြစ်သည့် စစ်အာဏာရှင်စနစ်ချုပ်ငြိမ်းရေး၊ အမျိုးသားပြန်လည်သင့်မြတ်ရေး၊ ငြိမ်းချမ်းရေးနှင့် ဖွံ့ဖြိုးတိုးတက်ရေး ရည်မှန်းချက်များမှာ တစတစ အကောင်အထည်ဖေါ်လာနိုင်ခဲ့ပြီဖြစ်သည်ဟု ဆိုရပါမည်။ သို့သော် ရာနှုန်းပြည့် အောင်မြင်မှုရဖို့အတွက် ဆထက်ထမ်းပိုး တိုး၍ ဆောင်ရွက်ကြရဦးမည်ဖြစ်သည်။

သို့သော် မဟာရှစ်လေးလုံးအရေးတော်ပုံစိတ်ဓါတ်ဖြစ်သည့် ဒီမိုကရေစီရေး၊ ငြိမ်းချမ်းရေး၊ ဖွံ့ဖြိုးတိုးတက်ရေးလမ်းကြောင်းပေါ်မှ လွဲချော်မသွားစေရေးကိုမူ အထူးသတိပြုကြရမည်ဖြစ်သည်။ ထို့ကြောင့် ရှစ်လေးလုံး မဟာအရေးတော်ပုံစိတ်ဓါတ် အဓွန့်ရှည်ရေးအတွက် နိုင်ငံရေးအသိ မှန်ကန်မြင့်မားစွာ ဆက်လက်ကိုင်ဆွဲထားကြဖို့ လိုအပ်ကြောင်း မဟာရှစ်လေးလုံး အရေးတော်ပုံနေ့ကို ဂုဏ်ပြုရင်း မဇ္ဈိမက တိုက်တွန်းနှိုးဆော်လိုက်ပါသည်။

Mizzima Weekly