ဆိုးလ်၊ သြဂုတ် ၄ ။ ။ တောင်ကိုရီးယား အမျိုးသားအဆိုတော်အဖွဲ့ BIGBANG အဖွဲ့ကို တောင်ကိုရီးယားယဉ်ကျေးမှု ၊ အားကစား နှင့် ခရီးသွားလုပ်ငန်း ဝန်ကြီးဌာနက “ Creative Icon” အဖြစ် သတ်မှတ်ခဲ့ကြောင်း သတင်းတစ်ရပ်တွင် ဖော်ပြထားသည်။
ယဉ်ကျေးမှု ၊ အားကစား နှင့် ခရီးသွားလုပ်ငန်း ဝန်ကြီးဌာနက BIGBANG အဖွဲ့ကို “ Creative Korea” သံတမန်အဖြစ် ခန့်အပ်သွားမည်ဖြစ်ကြောင်း သြဂုတ် ၂ရက်က ထုတ်ပြန်ကြေညာခဲ့သည်။BIGBANG အဖွဲ့သည် ကမ္ဘာတစ်ဝန်းတွင် အောင်မြင်မှုရရှိခဲ့ပြီး ကိုရီးယားတေးဂီတနှင့်ယဉ်ကျေးမှုကို ပျံ့နှံ့အောင် လုပ်ဆောင်နိုင်ခဲ့ခြင်းကြောင့် “ Creative Icon” အဖြစ် ရွေးချယ်ခဲ့ခြင်းဖြစ်ကြောင်း ဝန်ကြီးဌာနက ပြောကြားသည်။
ဖန်တီးမှုသံတမန် BIGBANG အဖွဲ့သည် သြဂုတ်လတွင်ကျင်းပပြုလုပ်မည့် ရီအိုနွေရာသီ အိုလံပစ်ပြိုင်ပွဲတွင် ပါဝင်သွားမည်ဖြစ်သည့်အပြင် ၂၀၁၈ PyeongChang ဆောင်းရာသီ အိုလံပစ်ပြိုင်ပွဲတွင်လည်း ပါဝင်သွားမည်ဖြစ်သည်။
“ Creative Icon” BIGBANG အဖွဲ့၏ လုပ်ဆောင်မှုများမှတစ်ဆင့် နေရာအနှံ့အပြားတွင် “ Creatvie Korea” ကို မြှင့်တင်ရန် လုပ်ဆောင်နိုင်မည်ဟု ယုံကြည်ကြောင်း ဝန်ကြီးဌာနက ပြောကြားသည်။ BIGBANG အဖွဲ့သည် ကိုရီးယားနိုင်ငံ၏ ပုံရိပ်ကို မြှင့်တင်ရာတွင် ကြီးမားသောအခန်းကဏ္ဍမှ ပါဝင်ဆောင်ရွက်သွားမည်ဖြစ်သည်။
