အုတ်သူခိုးများရန်မှ ကာကွယ်ရန် ကမ္ဘာကျော် မဟာတံတိုင်းကြီးတွင် တရုတ်အာဏာပိုင်များက လုံခြံုရေးတိုးမြင့်ထား

အုတ်သူခိုးများရန်မှ ကာကွယ်ရန် ကမ္ဘာကျော် မဟာတံတိုင်းကြီးတွင် တရုတ်အာဏာပိုင်များက လုံခြံုရေးတိုးမြင့်ထား

ဇူလိုင် ၃၀ ။          ။ တရုတ်နိုင်ငံရှိ မဟာတံတိုင်းကြီးမှာ ကမ္ဘာ့အလယ်တွင် ထင်ပေါ်ကျော်ကြားလှသည့် ရှေ့ဟောင်းလက်ရာတစ်ခုဖြစ်သော်လည်း လက်ရှိအချိန်တွင် တံတိုင်းကြီးဆီမှ အုတ်များ တစ်ချပ်ပြီး တစ်ချပ် ဖြုတ်ခိုးခံနေရခြင်းကြောင့် အရေးပေါ်ထိန်းသိမ်းကာကွယ်ရန် လိုအပ်လာနေပြီဖြစ်ကြောင်း တရုတ်အာဏာပိုင်များက ပြောသည်။

တရုတ် အင်ပါယာကို ကာကွယ်ရန် တည်ဆောက်ထားခဲ့သည့် ရှည်လျားလွန်းလှသော အဆိုပါ မဟာတံတိုင်းကြီးမှာ မြင်ရသူအပေါင်း၏ စိတ်အာရုံတွင် ခမ်းနားထည်ဝါလွန်းလှသည့် ထင်ရမည်ဖြစ်သော်လည်း ယခုအခါ အုတ်သူခိုးများကြောင့် တံတိုင်းကြီး၏ အစိတ်အပိုင်းတော်တော်များများမှာ တစ်စတစ်စ ပျက်စီးယိုယွင်းမှုများ ရှိလာခဲ့သည်။

တံတိုင်းကြီးဆီမှ အုတ်ချပ်များကို အိမ်ဆောက်ရာတွင် အသုံးပြုရန်အတွက်လည်းကောင်း၊ စိုက်ပျိုးရေးလုပ်ငန်းတွင် အသုံးပြုရန်နှင့် နိုင်ငံခြား ခရီးသွားများကို အမှတ်တရပစ္စည်းအဖြစ် ခိုးရောင်းနေခြင်းများ ရှိနေခဲ့သည်ဟု ဆိုသည်။ အလားတူ မိုးသည်းထန်ခြင်း၊ လေပြင်းနှင့် သဲမုန်တိုင်းများကျရောက်ခြင်းတို့ကြောင့်လည်း တံတိုင်းကြီး၏ တည်တံ့မှုကို တိုက်စားစေခဲ့သည်ဟု သိရသည်။

ယင်းအတွက်ကြောင့် ယခုအခါ တရုတ်အာဏာပိုင်များက နိုင်ငံမြောက်ပိုင်းတစ်လျှောက် ဖြန့်ကျက်တည်ရှိနေသော ယင်းတံတိုင်းကြီးကို သူခိုးအဖျက်အမှောင့်သမားများရန်မှ ကာကွယ်ရန် စီမံချက်တစ်ခု ချမှတ်လုပ်ဆောင်နေပြီဖြစ်သည်။

ယခု ကင်းလှည့်စီမံချက်တွင် ရှောင်တခင် သွားရောက်စစ်ဆေးခြင်း၊ ပုံမှန်လှည့်လည်စစ်ဆေးခြင်း၊ မသင်္ကာဖွယ် ခိုးယူဖျက်ဆီးနေမှုများကို တွေ့ရှိသူ တာဝန်သိပြည်သူများက အသိပေးနိုင်ရန် ဖုန်းလိုင်းထားရှိပေးခြင်းတို့ ပါဝင်မည်ဟု သိရသည်။

သို့သော် တာဝန်ရှိသူများ၏ တွက်ချက်မှုများအရ မင် မင်းဆက်လက်ထက်က တည်ဆောက်ထားခဲ့သည့် အပိုင်းအခြားထဲမှ ၃၀ ရာခိုင်နှုန်းခန့်မှာ ပျောက်ကွယ်နှင့်နေပြီဖြစ်ပြီး ၁၀ ရာခိုင်နှုန်းပင်မရှိတော့သည့် အပိုင်းကိုသာ ကောင်းကောင်းပြုပြင်ထိန်းသိမ်းထားနိုင်ကြောင်း သိရသည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly