ဇူလိုင် ၉၊ ရန်ကုန်။ ။ မြန်မာ့လက်ရွေးစင်ဘောလုံးသမားနှစ်ဦးကို ထိုင်းပရီးမီးယားလိဂ်သို့စေလွှတ်ရန် ထိုင်းဘောလုံးအဖွဲ့ချုပ် ဥက္ကဋ္ဌ ဝိုရာဝီမာကူဒီက မြန်မာနိုင်ငံဘောလုံး အဖွဲ့ချုပ်ကို တရားဝင် ကမ်းလှမ်းခဲ့သည်။
ဝိုရာဝီမာကူဒီနှင့်မြန်မာနိုင်ငံဘောလုံးအဖွဲ့ချုပ်တာဝန်ရှိသူများ တိုယိုတာမဲခေါင်ကလပ်ချန်ပီယံရှစ်ပြိုင်ပွဲ သတင်းစာရှင်းလင်းပွဲတွင် ဆုံတွေ့ခဲ့စဉ်က ထိုကဲ့သို့ပြောကြားခဲ့ခြင်းဖြစ်ပြီး ကလပ်အသင်းများနှင့်ညှိုနှိုင်းကာ ဆက်သွယ်မှုပြုလုပ်မည်ဟု လည်း၎င်းကပြော သည်။
“ဝိုရာဝီက ကျွန်တော်တို့ကို မြန်မာကစားသမား နှစ်ယောက် ထိုင်းပရီးမီးယားလိဂ်မှာကစားဖို့လွှတ်ပေးနိုင်မလားလို့ပြောတယ်။ တကယ်လို့ လွှတ်ပေးမယ်ဆိုရင် အသင်းတွေနဲ့ညှိုနှိုင်းပြီး တရားဝင်ကမ်းလှမ်းမယ်လို့ပြောတယ် ကစားသမားတွေကိုတော့ နာမည်မပြောဘူး။
အသင်းတွေလိုချင်တဲ့ကစားသမားကိုကမ်းလှမ်းမှာပါ။ ခြေမစမ်းပါဘူး။ တခါတည်းစာချုပ်ခေါ်မှာပါ။ ထိုင်းပရီးမီးယားလိဂ်မှာ ပဲကစားရမှာပါ။”ဟု မြန်မာနိုင်ငံဘောလုံးအဖွဲ့ချုပ်တွဲဖက်အတွင်းရေးမှူး ဦးကိုကိုသိန်းကပြောသည်။
မြန်မာကစားသမားများထဲတွင် ၁၉၉၀ ဝန်းကျင်က မျိုးလှိုင်ဝင်း၊သန်းတိုးအောင်၊ကြည်လွင်၊ ဝင်းအောင်၊ သန်းဝေ၊ ဆန်းဝင်း၊ စိုးနိုင်စသည့်ကစားသမားများ ထိုင်းနိုင်ငံတွင်ကြေးစားသွားရောက်ကစားခဲ့ဖူးပြီး နောက်ပိုင်းတွင် လာကျဲအိုလွယ်၊ စည်သူသန်း၊ ပိုင်စိုး စသည့်ကစားသမားများ ထိုင်းပထမတန်းတွင် ကစားခဲ့ဖူးသည်။