အင်္ဂလိပ်ထုံး နှလုံးမူမလား

အင်္ဂလိပ်ထုံး နှလုံးမူမလား

မြန်မာများက အင်္ဂလိပ်ကို မုန်းသည်။ မမုန်းခံနိုင်ရိုးလား၊ အင်္ဂလိပ်သည် မြန်မာကို ကျွန်ပြု ကိုလိုနီလုပ်သည်။ ပညာတတ်နိုင်ငံရေးသမားများကမူ အင်္ဂလိပ်ကို မုန်းစရာမလို၊ ကိုလိုနီစနစ်ကိုသာ မုန်းရသည်ဟု ရှင်းလင်းပြသည်။ သို့တိုင် အင်္ဂလိပ်က ကမ္ဘာ့နိုင်ငံအများအပြားကို မတရားကျူးကျော် တိုက်ခိုက်သိမ်းဆည်း ကျွန်ပြုခဲ့သဖြင့် အင်္ဂလိပ်ကိုလည်း မုန်းထိုက်သည်၊ မမှန်သည့်စနစ်နှင့် ယင်းမမှန်သည့်စနစ်ကို သုံးသူကို မုန်းထိုက်သည်သာဖြစ်သည်။

မျက်မှောက်မြန်မာ့နိုင်ငံရေးတွင်လည်း တိုင်းပြည်ကို စီမံခန့်ခွဲနေသော အင်န်အယ်လ်ဒီအစိုးရ ၏ ခေါင်းဆောင်များနှင့် စစ်အာဏာရှင်များ အလိုကျအချိန်ယူ အဓမ္မအတည်ပြု ပြဋ္ဌာန်းကျင့်သုံးနေ သော ၂၀၀၈ ဖွဲ့စည်းပုံ အခြေခံဥပဒေအရ အာဏာများရယူထားသော စစ်ခေါင်းဆောင်များသည် တိုင်းပြည်အကျိုးအတွက် ပူးတွဲအလုပ်လုပ်နိုင်ရေး နှစ်ဖက်ဆက်ဆံရေးကောင်းကို တည်ဆောက်နိုင် ရန် ကြိုးပမ်းနေကြသည်။ အင်န်အယ်လ်ဒီ-စစ်တပ်-တိုင်းရင်းသားများ ပါဝင်သော ဆက်ဆံရေးကို အရပ်ဖက်-စစ်ဖက်ဆက်ဆံရေးဟု နိုင်ငံရေးဝေဖန်သုံးသပ်သူတချို့က ဆိုကြသည်။

ဤတွင်လည်း မြန်မာပညာတတ်များက ပြောပြန်သည်။ စစ်တပ်ကို မုန်းစရာမလို၊ မဟုတ်တာ မမှန်တာလုပ်သော ကိုယ်ကျိုးရှာသော စစ်ဘောင်ချဲ့ရန် ကြိုးပမ်းနေသော စစ်အာဏာရှင်များကိုသာ မုန်းရမည်ဟူ၏။ စစ်တပ်သည် စည်းကမ်းနှင့် အမိန့်အခြေပြုသော အဖွဲ့အစည်းယန္တရားဖြစ်ပြီး၊ စစ်ခေါင်းဆောင်တို့က ထိန်းချုပ်မောင်းနှင်သူများဖြစ်သည်။ မောင်းနှင်သူအကြိုက် ယန္တရားက အလုပ် လုပ်သော် အင်္ဂလိပ်နှင့် ကိုလိုနီစနစ်ကဲ့သို့ပင် ဖြစ်ချေမည်။ 

အင်္ဂလိပ်၊ ကိုလိုနီစနစ်၊ စစ်အာဏာရှင်နှင့် စစ်တပ်အကြောင်း အနုတ်ဖက်က ပြောပြီးသော် အပေါင်းဖက်က ကောင်းတာမှန်တာများလည်း ပြောထိုက်သည်။ အင်္ဂလိပ်တန်ဖိုးဟူသည် ရှိသေး၏။ သဘောကား အင်္ဂလိပ်လူမျိုးများ တန်ဖိုးထားသော နှုန်းစံများဟူ၍ဖြစ်သည်။ မြန်မာများက အင်္ဂလိပ်ကို ကိန်းကြီးခန်းကြီးနိုင်သည်၊ လူဝါးဝသည်၊ အနိုင်ကျင့်သည်ဟု ပြောဆိုပြီးသည့်နောက်တွင် အင်္ဂလိပ် သည် စည်းကမ်းကြီးသည်၊ စနစ်ကျသည်၊ အရှက်နှင့် ဂုဏ်သိက္ခာကို တန်ဖိုးထားသည်၊ လုပ်နည်း ကြံနည်း နည်းစုံသည်ဟု အကောင်းဖက်က ထုတ်ဖော်နိုင်သည်။ အင်္ဂလိပ်အချင်းချင်း တိုက်ခိုက်ရင် ဆိုင် ဓားချင်းယှဉ်ခုတ်ရင်း တဖက်က ဓားလွတ်ကျသွားလျှင် တဖက်က ဆက်မခုတ်တော့ဘဲ ဓားပြန်ကောက်စေသည်မှာ အင်္ဂလိပ်ကို ချီးပသည့် အချီးအကျူးဟု ပြောစမှတ်ပြုကြသည်။

မြန်မာတွင်တော့ စစ်အာဏာရှင်များသည် ဂုဏ်သိက္ခာကို တန်ဖိုးမထားပါ၊ အားနည်းသူကို အနိုင်ကျင့်သည်ကိုလည်း သမိုင်းအထောက်အထားများအရ တွေ့နိုင်ပေသည်။ လက်ရှိအစိုးရဖြစ် နေသော အင်န်အယ်လ်ဒီ ဥက္ကဋ္ဌ ဒေါ်အောင်ဆန်းစုကြည်၊ နာယက ဗိုလ်ချုပ်ကြီးဟောင်း ဦးတင်ဦးနှင့် အင်န်အယ်လ်ဒီခေါင်းဆောင်များကို စစ်အာဏာရှင်များက ဂုဏ်သိက္ခာမဲ့ အနိုင်ကျင့်ခဲ့ကြသည်။ နည်းမျိုးစုံ ဒုက္ခပေးကာ နောက်ဆုံး အသက်သေသည်အထိ လုပ်ကြံခဲ့ကြသည်။ စစ်တန်းလျားပြန်မည်၊ ဆွေးနွေးညှိနှိုင်းကြမည်၊ ပူးပေါင်းလုပ်ကိုင်ကြမည် စသည့် ပေးသောကတိ၊ ပြောသောစကား၊ လုပ်သော လုပ်ရပ်တို့သည်လည်း တဗိုလ်တက် တမျိုးပြောင်းဖြင့် အမျိုးမျိုးဖောက်ပြန် ပြောင်းလဲခဲ့ကြ သည်ချည်းဖြစ်သည်။

အင်္ဂလိပ်သည် တခေတ်တခါက နေမဝင် အင်ပါယာကို တည်ထောင်ခဲ့သည်။ တိုင်းပြည်ကြီး ငယ်များကို အနိုင်ကျင့်ဗိုလ်ကျ သိမ်းယူအမြတ်ထုတ်ခဲ့သည်။ မြန်မာစစ်အာဏာရှင်များသည်လည်း အင်အားနည်းသူများအပေါ် အနိုင်ကျင့်ဗိုလ်ကျပြီး သယံဇာတများကို ထင်တိုင်းကျဲ ထုတ်ယူသုံးစွဲ အမြတ်ထုတ် သိမ်းယူခဲ့ကြသည်။ ဇွန် ၂၃ ကကျင်းပခဲ့သော အင်္ဂလိပ်အများစုနေထိုင်ရာ "ယူကေနိုင်ငံ ဥရောပသမဂ္ဂမှ ထွက်မထွက် လူထုဆန္ဒခံယူပွဲ" တွင် အင်္ဂလိပ်အများစုက ထွက်ရန်ဆုံးဖြတ် လိုက်ရာ မထွက်ကြပါရန် အမြဲတိုက်တွန်းနှိုးဆော် စည်းရုံးဟောပြောနေသူ ယူကေဝန်ကြီးချုပ် ဒေးဗစ်ကင် မရွန်းက ထွက်ပေါ်လာသော ရလဒ်အပေါ် တာဝန်ယူတာဝန်ခံပြီး ဝန်ကြီးချုပ်ရာထူးမှ နုတ်ထွက်မည် ဟု ပြောကြားလိုက်သည်။ ဥရောပသမဂ္ဂမှထွက်မည်ဆိုလျှင် ယူကေသည် ခေါင်းဆောင်သစ်နှင့်သာ စခန်းသွားရန် သင့်တော်မည်ဖြစ်ကြောင်း ကင်မရွန်းက ခေါင်းဆောင်ပီပီ၊ ယောက်ျားပီပီ တာဝန်ယူ သည်၊ စကားတည်သည်၊ ကတိအတိုင်း ဆောင်ရွက်လိုက်သည်။

အင်န်အယ်လ်ဒီသည် ကုန်ခဲ့သည့်နှစ်ပေါင်း ၅၀ ကျော်ကာလအတွင်းတွင် ပထမဆုံးပေါ်ပေါက် လာသော ပြည်သူ့ရွေးချယ်ခံ အရပ်သားအစိုးရဖြစ်သည်။ ကမ္ဘာ့အဆင့်အတန်းမီခေါင်းဆောင် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ဦးဆောင်သော အင်န်အယ်လ်ဒီအစိုးရသည် တိုင်းပြည်နှင့်လူထုကို မျက်နှာမူ၍ နိုင်ငံသစ်အတွက် အားကုန်ကြိုးပမ်းလုပ်ဆောင်နေသည်။ သို့တိုင် အတိုက်အခိုက်၊ အခုအခံ၊ အဆီးအတားများကား ရှိနေသည်သာဖြစ်သည်။

အင်္ဂလိပ်ခေါင်းဆောင်များကား ဂုဏ်သိက္ခာနှင့်ယှဉ်လာလျှင် ရာထူးအာဏာစည်းစိမ်ကို မမက် ကြပါ၊ ရှက်ကြသည်။ နှစ်ပေါင်း ၅၀ ကျော်ကြာ နာမည်ပျက်ခဲ့သော ပြည်သူ့ချဉ်ပတ် စစ်အာဏာရှင် များအား နှောင်းလူတို့သည် အတုမယူဘဲ မိုင် ၅၀၀၀ ကျော် အဝေးက အင်္ဂလိပ်၏ဂုဏ်သိက္ခာထုံးကို နှလုံးမူကြရန် မဇ္ဈိမက နှိုးဆော်သည်။

Mizzima Weekly