ဇွန် ၂၄ ။ ။ ဥရောပသမဂ္ဂ (အီးယူ) ကနေ ဗြိတိန်နိုင်ငံ နှုတ်ထွက်ဖို့ မဲခွဲဆုံးဖြတ်ခဲ့တဲ့အပေါ် ကမ္ဘာတစ်ဝန်းက ထင်ရှားသည့် ခေါင်းဆောင် တစ်ချို့၏ ပြောကြားချက်များ ထွက်ပေါ်လာခဲ့သည်။
" ဒီကနေ့ ဖြစ်စဉ်နောက်ပိုင်းမှာဆိုရင် အီးယူအဖွဲ့ဝင် နိုင်ငံပေါင်း ၂၇ နိုင်ငံသာကျန်တော့တဲ့အချိန်ရောက်လာပါပြီ၊ ဒါကြောင့် ဒီ ၂၇ နိုင်ငံက ခေါင်းဆောင်တွေရဲ့ကိုယ်စားပြောချင်တာကတော့ ကျန်ရှိနေတဲ့ ၂၇ နိုင်ငံစလုံးအနေနဲ့ ဆက်လက်ပြီး စုစည်းညီညွတ်မှုတစ်ခုကို ထိန်းသိမ်းသွားဖို့ပဲဖြစ်ပါတယ်" -ဒေါ်နယ်တက်စ် ( ဥရောပ ကောင်စီ ဥက္ကဌ)
"ဒီ ဖြစ်စဉ်ဟာ တကယ့်ကို ကြီးကျယ်ကောင်းမွန်တဲ့ ကိစ္စတစ်ခုပါ၊ ဗြိတိန်သူ ဗြိတိန်သားတွေဟာ သူတို့ နိုင်ငံကို သူတို့ ပြန်ထိန်းထားနိုင်လိုက်ပါပြီ" - ဒေါ်နယ် ထရန့် (အမေရိကန် ရီပတ်ဘလစ်ကန် သမ္မတကိုယ်စားလှယ်လောင်း)
" ခုချိန်မှာ ကျွန်တော်တို့အတွက် တကယ့်ကို အရေးကြီးတဲ့ အချိန်ကို ကျရောက်လို့လာခဲ့ပါပြီ၊ ဒေးဗစ် ကင်မရွန်းအနေနဲ့ သူ့နိုင်ငံအတွက် သူ့တာဝန်ကို သူယူပါလိမ့်မယ်၊ အဲဒီအတိုင်းပဲ ကျွန်တော်တို့ကလည်း အီးယူရဲ့ အနာဂတ်အတွက် ကျွန်တော်တို့ရဲ့ ကိုယ်စီတာဝန်တွေကို ကျေအောင်ထမ်းရလိမ့်မယ်၊ ခုချိန်မှာ ဈေးကွက်ထဲမှာ စတာလင်ပေါင်ငွေကြေး အခြေအနေဘယ်လိုရှိနေပြီလဲဆိုတာ ခင်ဗျားအမြင်ပဲလေ၊ ကျွန်တော်တု့ိ ယူရိုငွေကိုတော့ အဲဒီအတိုင်းမဖြစ်စေချင်ဘူး" - မာတင် စခူးလ် ( အီးယူပါလီမန် ဥက္ကဌ)
" ဗြိတိန်နိုင်ငံသားတွေအတွက် ဝမ်းမြောက်မိပါတယ်၊ ခုချိန်မှာ ကျွန်တော်တို့အလှည့်ရောက်လာခဲ့ပါပြီ၊ ဒက်ချ်တွေရဲ့ ဆန္ဒခံယူပွဲလုပ်ဖို့ အချိန်ကျလာပါပြီ"- ဂရိ ဝိုင်ဒါစ် ( ဒက်ချ် လွတ်မြောက်ရေးပါတီခေါင်းဆောင်)
" ခင်ဗျားတို့ မြင်တွေ့ခဲ့ရတဲ့ ဗြိတိန်တို့ရဲ့ မကျေနပ်ချက်တွေလိုမျိုးက တစ်ခြား နိုင်ငံတွေမှာလဲ ရှိနေတာပါ၊ ကျွန်တော်တို့ နိုင်ငံမှာလဲ ရှိနေပါတယ်၊ ပြုပြင်ပြောင်းလဲမှုတွေလုပ်ဖို့လည်း လိုနေပါပြီ" မာ့ခ် ရူ့သ် ( ဒက်ချ် ဝန်ကြီးချုပ်)
" ကျွန်တော်တို့ စပိန်နိုင်ငံအနေနဲ့ကတော့ အီးယူမှာပဲ ဆက်ရှိနေဦးမှာဖြစ်ပါတယ်" - မာရီနို ရာဂျိုင်း (စပိန် ဝန်ကြီးချုပ်)
" အီးယူအဖွဲ့ဝင်နိုင်ငံတွေအနေနဲ့ ဥရောပဒေသရဲ့ အနာဂတ်အတွက် ဦးစားပေးအချက်တွေ ချမှတ်သင့်နေပါပြီ" ချားလ်စ် မိုက်ကယ် (ဘယ်လ်ဂျီယံ ဝန်ကြီးချုပ်)
" ဒါဟာ တကယ့်ကို စိတ်မကောင်းစရာပါပဲ၊ ဒါပေမယ့်လည်း ခုချိန်မှာတော့ ကျွန်တော်တို့ရဲ့ စီးပွားရေးအတွက်ပဲ အာရုံစိုက်ထားရပါလိမ့်မယ်၊ ခုလို ဆန္ဒခံယူပွဲကနေ ဒီရလဒ်ထွက်သွားပေမယ့်လည်း ဗြိတိန်အနေနဲ့ ဥရောပဒေသ နိုင်ငံတွေအကြားမှာ ဆက်ပြီးတော့ ညီညီညွတ်ညွတ် နဲ့ ဥရောပရဲ့ စံနှုန်းတွေကို ဆက်ထိန်းသွားမယ်လို့ ယုံကြည်ပါတယ်" ပီထရို ပိုရိုရှန်ကို (ယူကရိန်းသမ္မတ)
