စစ်တပ်နှင့် အကဲဆတ်ဒီမိုကရေစီ

စစ်တပ်နှင့် အကဲဆတ်ဒီမိုကရေစီ

အင်န်အယ်လ်ဒီအစိုးရသစ် တက်လာပြီးနောက်တွင် အမျိုးသားပြန်လည်သင့်မြတ်ရေးကို ဦးထိပ်ထား ပြောလာခဲ့သည်၊ လက်တွေ့ကျသော နိုင်ငံရေးဖြစ်သဖြင့်လည်း အင်န်အယ်လ်ဒီကို   ထောက်ခံကြသူများက လက်ခံကြလိမ့်မည်ဟု ယူဆရသည်။ သို့သော် အမျိုးသားပြန်လည်သင့်မြတ် ရေးမှာ အတိုင်းအဆရှိပြီး ဖြောင့်မတ်မှန်ကန်သော အမျိုးသားပြန်လည်သင့်မြတ်ရေးမျိုး   ဖြစ်သင့်သည်။ လက်နက်ကိုင်ထားသူများကို မသိမသာမှသည် သိသိသာသာကြောက်ရသည်မျိုးဆိုလျှင် ပြည်သူများ က ဘဝင်ကျမည်မဟုတ်ပါ၊ သို့တိုင် ယင်းသည်လည်း အရှိတရား ဖြစ်နေပြန်သည်။

အစိုးရသစ်တက်ခါစတွင် လွှတ်တော်တွင်း၌ အင်န်အယ်လ်ဒီနှင့် စစ်တပ်တို့ ထိပ်တိုက်တွေ့ခဲ့ ညကြသည်၊ ခါးခါးသီးသီး ပြင်းပြင်းထန်ထန် ထိပ်တိုက်ရင်ဆိုင်လိုက်ကြရသည်။ အကြောင်းမှာ စစ်အာ ဏာရှင်များ အလိုကျအချိန်ယူ ရေးဆွဲခဲ့ပြီး အဓမ္မအတည်ပြု ပြဋ္ဌာန်းခဲ့သော ၂၀၀၈ ဖွဲ့စည်းပုံအခြေခံ ဥပဒေက ၂၀၁၅ အထွေထွေရွေးကောက်ပွဲတွင် သောင်ပြိုကမ်းပြို အနိုင်ရရှိထားသည့် အင်န်အယ်လ်ဒီ ဥက္ကဋ္ဌနှင့် လူထုခေါင်းဆောင် ဒေါ်အောင်ဆန်းစုကြည်ကို သမ္မတမဖြစ်စေရန် တမင်တကာ တားဆီး ပိတ်ပင်ထားသောကြောင့် ယင်းအခြေခံဥပဒေပါ ပုဒ်မတခုကို ကိုင်စွဲရင်း ဒေါ်အောင်ဆန်းစုကြည်က လွှတ်တော်မှတဆင့် ဥပဒေသစ်တခုပြုဋ္ဌာန်း၍ နိုင်ငံတော်၏အတိုင်ပင်ခံပုဂ္ဂိုလ်ရာထူးကို ရယူလိုက် သည့်အတွက် ဖြစ်သည်။

လွှတ်တော်တွင်း အဖြစ်အပျက်နောက်ပိုင်းတွင် အင်န်အယ်လ်ဒီသည် စစ်တပ်နှင့်ဆက်ဆံရေး ကို ပြန်လည်သုံးသပ် ထိန်းညှိခဲ့သည်ကို တွေ့ရသည်။ ဇွန် ၁၀ ဒုတိယအကြိမ် လွှတ်တော်သက်တမ်း ၏ ပထမအကြိမ်အစည်းအဝေးပွဲများအပြီးတွင် ကျင်းပသော သတင်းစာရှင်းလင်းပွဲ၌ ပြည်သူ့လွှတ် တော် ဥက္ကဋ္ဌက အမျိုးသားပြန်လည်သင့်မြတ်ရေးကို အရင်သွားပြီးမှ ၂၀၀၈ ဖွဲ့စည်းပုံအခြေခံဥပဒေကို ပြင်၍ရမည်ဖြစ်ကြောင်း ပြောသွားသည်။ စစ်တပ်သည် အင်အားကြီးမားနေဆဲဖြစ်ကြောင်းနှင့် အရှိတရားအရ စိတ်ထင်တိုင်း မပေါက်နိုင်သေးကြောင်းကို အင်န်အယ်လ်ဒီ၏ ထိပ်ပိုင်းခေါင်းဆောင် တဦးလည်းဖြစ်သူ လွှတ်တော်ဥက္ကဋ္ဌက ထုတ်ဖော်ပြောဆိုခဲ့ခြင်း ဖြစ်သည်ဟု ယူဆရသည်။

ဇွန် ၁၄  မှ ၁၉ အထိ ရန်ကုန်တွင် ကျင်းပနေသော စတုတ္ထအကြိမ်မြောက် လူ့အခွင့်ရေး၊ လူ့ဂုဏ်သိက္ခာ နိုင်ငံတကာ ရုပ်ရှင်ပွဲတော်တွင် ရှမ်းစော်ဘွားတယောက်နှင့် သူ၏မဟာဒေဝီအကြောင်း ရိုက်ကူးထားသော Twilight Over Burma ရုပ်ရှင်ဇာတ်ကားကို ရုပ်ရှင်ဆင်ဆာအဖွဲ့က ခွင့်မပြုသော ကြောင့် ဖွင့်ပွဲနေ့တွင် မပြသနိုင်ခဲ့ပါ။ ဇာတ်ကားထဲတွင် မြန်မာစစ်တပ်နှင့်ပတ်သက်၍ ပြကွက်များ သည် အမျိုးသားပြန်လည်သင့်မြတ်ရေးကို ထိခိုက်နိုင်သည့်အတွက် ပြသခွင့်မပြုဟု အကြောင်းပြ သည်။

အင်န်အယ်လ်ဒီအစိုးရလက်ထက်တွင် ဒီမိုကရေစီနှင့် လူ့အခွင့်အရေးများကို ယခင်ကထက် ပိုမိုတိုးတက်ရရှိလိမ့်မည်ဟု ပြည်သူတရပ်လုံးက မျှော်လင့်အားထား ယုံကြည်ကြသည်။ သို့တိုင် အမျိုးသားပြန်လည်သင့်မြတ်ရေး အကြောင်းပြချက်ဖြင့် မဟုတ်တာမမှန်တာ လုပ်ခဲ့သူများကို အပြစ် တင် ဝေဖန်ပြောဆိုခြင်းပင် မလုပ်နိုင်ပါဟု တားမြစ်ပါက လွတ်လပ်စွာထုတ်ဖော် ပြောဆိုခွင့်၊ တင်ပြခွင့် ကို ပိတ်ပင်ရာကျသည်။ တဦးတဖွဲ့ကြောင့် ပြည်သူအများ၏ မူလအခွင့်အရေးများ ဆုံးရှုံးရသည်ဆို လျှင် ယင်းအမျိုးသားပြန်လည်သင့်မြတ်ရေးမှာ အဓိပ္ပာယ်ရှိမည် မဟုတ်ပါ။

အင်န်အယ်လ်ဒီအစိုးရသစ်လက်ထက်တွင် အရေးတကြီးနှင့် အဆောတလျင် ကိုင်တွယ်ရမည့် ပြဿနာနှင့် အရှုပ်အထွေးပေါင်း မြောက်များစွာရှိသည်။ ယင်းတွင် ငြိမ်းချမ်းရေးရရှိရေးနှင့် တိုင်းပြည် ၏ သယံဇာတနှင့် ဘဏ္ဍာငွေများကို အလွဲသုံးစားပြုခဲ့မှုများကို အမြန်ဆုံး တားဆီးကန့်သတ်ရေးပင် ဖြစ်သည်။ အင်န်အယ်လ်ဒီအစိုးရနှင့် လွှတ်တော်သည် စစ်တပ်နှင့်ပတ်သက်လျှင် ယခုနောက်ပိုင်းတွင် ထိန်းထိန်းသိမ်းသိမ်း ဆောင်ရွက်နေသည်ကို တွေ့ရသည်။ သို့သော် အရပ်ဖက်-စစ်ဖက်ဆက်ဆံရေး ဆိုသည်မှာလည်း စစ်တပ်ကို အမြဲတမ်း အသားပေးဆက်ဆံရမည်ချည်း မဟုတ်ပါ။

မြန်မာ့ဒီမိုကရေစီသည် နုသစ်သီဆိုသည်မှာ မှန်ပါသည်၊ အဖူးအငုံဟုလည်း ဆိုနိုင်သည်။ ပိုးမွေးသလို မွေးယူနေရသော မြန်မာ့ဒီမိုကရေစီကို ကြမ်းကြမ်းတမ်းတမ်း စိတ်နှလုံးနှင့် အတွေးအခေါ် ရှိသူများကြောင့် တခုခုလွဲချော်သွားလေမည်လားဟု အင်န်အယ်လ်ဒီက စိုးရိမ်စိတ်ရှိနေသည်ကိုလည်း လက်ခံသည်။ သို့တိုင် ဒီမိုကရေစီအကဲဆတ်မှုကြောင့်ချည်း အမျိုးသားပြန်လည်သင့်မြတ်ရေး အမည် နာမဖြင့် စစ်တပ်ရေဒါနှင့် လွတ်ကင်းအောင်နေရေးကိုမူ ကောင်းစွာ နားမလည်နိုင်သလို ယေဘုယျ အားဖြင့် လက်ခံနိုင်ဖွယ်ရာလည်း မရှိဟု မဇ္ဈိမက ထင်မြင်သည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly