လယ်ယာမြေပြဿနာများတွင် လယ်သမားများဘက်က ရပ်တည် ဖြေရှင်းရပါမည်

လယ်ယာမြေပြဿနာများတွင် လယ်သမားများဘက်က ရပ်တည် ဖြေရှင်းရပါမည်
ပဲခူးတိုင်းဒေသကြီး ဒိုက်ဦးမြို့နယ်အတွင်း လယ်သမား ဦးကြီးများနှင့် ကောက်စိုက်သမများအား ဇွန်လ ၁၉ ရက်က တွေ့ရစဉ်။ (ဓာတ်ပုံ - ဟောင်ဆာ(ရာမည)၊ မဇ္ဈိမ)

အစိုးရသစ် တက်ရောက်လာပြီးနောက်ပိုင်း ပြိုလဲပျက်စီးလုဖြစ်နေသော မြန်မာ့လယ်ယာမြေ ကိစ္စ မည်ကဲ့သို့ကိုင်တွယ်ဖြေရှင်းသွားမည်ဆိုသည်ကို လူတိုင်း စိတ်ဝင်စားကြမည် ထင်ပါသည်။

မတ်လ ၁၃ ရက်နေ့က စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးကျော်ဝင်း၏ ပြောစကားမှာလည်း စိတ်ဝင်စားဖို့ကောင်းပါသည်။ သူက လုပ်ငန်းရှင်ကြီးများအနေဖြင့် လယ်သမား များ၏လယ်ကို သိမ်းယူမည့်အစား လယ်သမားကို ရှယ်ယာပေး၍ လယ်ယာမြေလုပ်ငန်း လုပ်စေလိုတဲ့ အကြောင်း ထုတ်ဖေါ်ပြောဆိုချက်ဟာ လက်ရှိ လယ်သိမ်းမြေသိမ်းကိစ္စကို ဖြေရှင်းဖို့ ကြိုးစားတဲ့ ကြိုးပမ်းချက်များအနက်က ကြိုးပမ်းချက်တစ်ခု သဘောပဲဖြစ်သည်။ သို့သော်ငြားလည်း ယင်း ဖြေရှင်း နည်းက တွေးဆအကြံပြုချက်သဘောသာဖြစ်သည့်အတွက် လုပ်ငန်းရှင်ကြီးများက လက်မခံပါက လက်တွေ့အားဖြင့် အောင်မြင်လာစရာအကြောင်းမရှိသော ဖြေရှင်းနည်းသဘော သက်ရောက်နေပြန် ပါသည်။

တကယ်တော့လည်း တောင်သူလယ်သမားဦးရေမှာ  နိုင်ငံ့လူဦးရေ၏ ၇၀ ရာခိုင်နှုန်းခန့်ရှိသည့် အတွက် ယင်းလယ်သမားများ၏ပြဿနာကို မှန်ကန်နိုင်နင်းအောင် မဆောင်ရွက်နိုင်သမျှ မိမိတို့ နိုင်ငံ သည်လည်း တိုးတက်ပြောင်းလဲစရာ အကြောင်းမရှိသောကြောင့် အရေးတကာထက် ပိုမိုအရေးကြီး သော ပြဿနာဖြစ်သည်ကို မည်သူမျှ ငြင်းနိုင်လိမ့်မည် မဟုတ်ချေ။

မိမိတို့တိုင်းပြည် လတ်တလောဖြေရှင်းရမည့် တောင်သူလယ်သမား ပြဿနာများစွာအနက် မတရား သိမ်းဆီးခံထားရသည့် လယ်ယာမြေများပြဿနာသည် ထိတ်ဆုံးမှဖြစ်သည်။ ယခင်အစိုးရ များလက်ထက် လုပ်ငန်းရှင်များ၊ အစိုးရဌာနများက အကြောင်းအမျိုးမျိုးပြကာ သိမ်းဆီးထားခဲ့သည့် မြေယာများ၊ ထိခိုက်ပျက်စီးရသည့် မြေယာများအတွက် ယခုအခါ တောင်သူလယ်သမားများကလည်း နည်းလမ်းပေါင်းစုံဖြင့် ပြန်လည်တောင်းဆိုခြင်း အရေးဆိုခြင်းများ တောက်လျှောက် လုပ်လာနေပြီ လည်း ဖြစ်သည်။

ထိုအခါ မိမိတို့ မဇ္ဈိမ၏ အမြင်မှာ အစိုးရအနေဖြင့် သို့မဟုတ် သက်ဆိုင်ရာ ဝန်ကြီးဌာနများ အနေဖြင့် သိမ်းဆည်းခံရသည့် လယ်ယာမြေများပြဿနာကို ဖြေရှင်းသည့်အခါ လယ်သမားများ ဘက်မှ ပြတ်ပြတ်သားသား ရပ်တည်သည့်မူကို ကိုင်စွဲသင့်သည်ဟု မြင်ပါသည်။ ဤသည်မှာ အစိုးရ တိုင်း၏ ရပ်တည်သင့်သော ရပ်တည်ချက်ပင်ဖြစ်သည်။ တလျောက်လုံး မှားယွင်းလာသည့် လယ်ယာ မြေစနစ်ကြောင့် ပျက်စီးမှုရှည်ကြာ ခိုင်မာလာနေသည့်အနေအထားကို ရုတ်တရက် တဒေါင်ဆစ်ချိုး ပြုပြင်ပြောင်းလဲလို့ မရနိုင်သည် မှန်သော်ငြားလည်း ဖြစ်လာသည့်

ဖြေရှင်းရန်လိုအပ်သည့်မြေယာပြဿနာများအားလုံးကို ကိုင်တွယ်ရာတွင် လယ်သမားများ ဘက်က မူအရ ရပ်တည်စဉ်းစားခြင်းဖြင့်သာ မှန်သည့် ဖြေရှင်းနည်းဖြစ်လာမည်ပင်ဖြစ်သည်။

ထို့ကြောင့် လယ်ယာမြေပိုင်ဆိုင်ခွင့်ဥပဒေများကဲ့သို့သော လယ်သမားများရဲ့ ပိုင်ဆိုင်ခွင့်များ ကို ကာကွယ်သည့်ဥပဒေများ၊ လယ်ယာမြေလုပ်ကိုင်ခွင့်နှင့် ဖွံ့ဖြိုးတိုးတက်ရေးဆိုင်ရာ ဥပဒေများကို လည်း ပြင်ဆင်ပြဌာန်းကြရမည် ဖြစ်သည်။ လယ်သမားတို့၏အခွင့်အရေးကို ကာကွယ်သည့်ဥပဒေများ ပြဌာန်းသည့်နည်းတူ လယ်ယာလုပ်ငန်း ဖွံ့ဖြိုးတိုးတက်ရေးအတွက်လည်း ဥပဒေများ ပြဌာန်းဆောင် ရွက်ကြရမည် ဖြစ်သည်။

လောလောဆယ်တွင်မူ လယ်သမားများ၏ အခွင့်အရေး ကာကွယ်ဖို့မပြောနှင့် လယ်ယာလုပ် ငန်း ဖွံ့ဖြိုးတိုးတက်ရေး ဥပဒေမျာပြဌာန်း ဆောင်ရွက်နိုင်ရေးမပြောနှင့် လယ်သိမ်းယာသိမ်းခံရသည့်   တောင်သူလယ်သမားများရဲ့ တိုင်စာများ၊ မကြေနပ်မှုများ၊ အလွန်အကျွန်ခရီးရောက်နေသည့် မြေယာ အဓမ္မ သိမ်းဆည်းမှုများအရေးကိုပင်လျင် ပြေလည်အောင် ဆောင်ရွက်ပေးနိုင်ခြင်း မရှိသေးချေ။

အဆိုးဝါးဆုံးပြဿနာမှာ ဌာနဆိုင်ရာများက အကြောင်းအမျိုးမျိုးဖြင့် လျှော်ကြေး အနည်းငယ် မျှဖြင့်လည်းကောင်း၊ လုံးဝလျော်ကြေးမပေးပဲဖြင့်လည်းကောင်း သိမ်းယူထားသည့် မြေယာများအ တွက်ပင်လျင် ပြေလည်ဆောင်ရွက်ပေးနိုင်ခြင်း မရှိသေးချေ။

မည်သု့ိပင်ဖြစ်စေ မြေယာပြဿနာ သို့မဟုတ် တောင်သူလယ်သမား အရေးအရာကိစ္စများကို အစိုးရအနေဖြင့်၊ တာဝန်ရှိသူများအနေဖြင့် ကိုင်တွယ်ဆောင်ရွက် ဖြေရှင်းသည့်အခါ တောင်သူလယ် သမားများဘက်က ရပ်တည်ဆောင်ရွက်သည့် ပြတ်သားသည့်မူကို အခြေခံပြီးမှသာ ဖြေရှင်းဖို့လိုအပ် ကြောင်း မဇ္ဈိမက တိုက်တွန်းလိုက်ပါသည်။

Mizzima Weekly