ဟံသာဝတီအသင်း အိမ်ကွင်းဖွင့်ပွဲကို ပရိသတ် ငါးထောင်ကျော် လာရောက်အားပေးခဲ့

ဟံသာဝတီအသင်း အိမ်ကွင်းဖွင့်ပွဲကို ပရိသတ် ငါးထောင်ကျော် လာရောက်အားပေးခဲ့
တောင်ငူကွင်းတွင် ဟံသာဝတီနှင့် မကွေးအသင်းတို့ယှဉ်ပြိုင်ကစားနေစဉ်။ (ဓာတ်ပုံ- MFF)

ဇွန် ၁၂ ၊ ရန်ကုန်။            ။ ၂၀၁၆ မြန်မာနေရှင်နယ်လိဂ်ဒု-အကျော့ပွဲစဉ်များကို ယာယီအိမ်ကွင်းအဖြစ် လက်ခံကျင်းပမည့် ဟံသာဝတီယူနိုက်တက်အသင်း၏ တောင်ငူမြို့ရှိ မိုင်ဒါကွင်းဖွင့်ပွဲကို ပရိသတ် ငါးထောင်ကျော်လာရောက် ကြည့်ရှုအားပေးခဲ့သည်။

တောင်ငူကွင်းဖွင့်ပွဲအဖြစ် အိမ်ရှင် ဟံသာဝတီယူနိုက်တက်အသင်းနှင့် မကွေးအသင်းတို့ယှဉ်ပြိုင်ကစားခဲ့ရာ ဟံသာဝတီအသင်းက ၄-၁ဂိုးဖြင့်ဂိုးပြတ်ရှုံးနိမ့်ခဲ့သော်လည်း အိမ်ရှင်ပရိသတ်များ စည်းကမ်းရှိစွာ အားပေးခဲ့ကြ သည်။ အသင်းအနေနဲ့ အိမ်ကွင်းပရိသတ်တွေရှေ့မှာ ဂိုးပြတ်ရှုံးခဲ့ရတဲ့အတွက် တောင်းပန်ပါတယ်။ ကျွန်တော်တို့အသင်း မကွေးနဲ့ပွဲမှာ ပုံမှန်ခြေစွမ်းမရခဲ့ပါဘူး။   နောက်ပွဲတွေအတွက် ဆက်ပြင်ဆင်ရမှာပါ။ ချန်ပီယံဖြစ်ဖို့ကတော့ လက်ရှိအနေအထားမှာ မလွယ်ကူတော့ပါဘူး။ ဟု ဟံသာဝတီယူနိုက်တက်အသင်းနည်းပြချုပ် ဦးငွေထွန်းကပြောသည်။

ဟံသာဝတီယူနိုက်တက်အသင်းမှာ မြန်မာနေရှင်နယ်လိဂ် ပွဲစဉ်(၁၄) ပွဲစဉ်အဖြစ် အိမ်ကွင်းတွင် ဧရာဝတီယူနိုက်တက်အသင်းနှင့် ဆက်လက်ကစားရမည်ဖြစ်သည်။

Mizzima Weekly