လွှတ်တော်ကို အလစ်မပေးတဲ့ လွှတ်တော်ဥက္ကဋ္ဌ

လွှတ်တော်ကို အလစ်မပေးတဲ့ လွှတ်တော်ဥက္ကဋ္ဌ
NLDအမတ်များ အများဆုံးနေရာရထားသည့် ဒုတိယအကြိမ်လွှတ်တော် သက်တမ်း ပထမဆုံးနေ့အဖြစ် နေပြည်တော်ရှိ ပြည်သူ့လွှတ်တော်တွင် ဖေဖော်ဝါရီ ၁ရက်၊ နံနက် ၁၀နာရီကစပြီး ကျင်းပလျက်ရှိသည်။ (ဓာတ်ပုံ သက်ကို)

ဇွန် ၈ က ကျင်းပခဲ့သည့် ပြည်သူ့လွှတ်တော်အစည်းအဝေးတွင် ဧည့်သည်များသည် ပြည်သူ့ ကိုယ်စားလှယ်များထက် များပြားလေသည်။ ပြည်သူများက လွှတ်တော်အစည်းအဝေးများကို စိတ်ဝင် စားကြသည်ဟု ဧည့်သည်များပြားမှုကို ထောက်ထား၍ ရိုးရှင်းသော ကောက်ချက်ချနိုင်ပေသည်။ ပြည်သူ့အသံကို လွှတ်တော်က ထင်ဟပ်နိုင်လေ ကောင်းလေ ဖြစ်သည်။

ဒုတိယအကြိမ် လွှတ်တော်များ၏ ပြည်သူ့လွှတ်တော် ပထမအကြိမ် ပုံမှန်အစည်းအဝေးများ ကျင်းပလာသည်မှာ ရက်ပေါင်း ၄၀ ပင် ကျော်လာခဲ့ပြီဖြစ်သည်။ အမှန်တော့ ဒုတိယအကြိမ် လွှတ်တော်များသည် ဖေဖော်ဝါရီ ၁ က စတင်ခဲ့သဖြင့် လွှတ်တော်သက်တမ်း တွက်စစ်သော် သက်တမ်းအားဖြင့် လေးလကျော်လာခဲ့ပြီဖြစ်သည်။ အင်န်အယ်လ်ဒီလွှတ်တော်များ၏ ရုပ်လုံးသည် လည်း ပို၍ပုံပေါ်လာခဲ့ပြီး ပင်နီရောင်လွှမ်း လွှတ်တော်များဖြစ်သဖြင့် ပုံသဏ္ဍာန်အားဖြင့် ပို၍ပေါ်လွင် သည်ဟု ဆိုရမည်ဖြစ်သည်။

လွှတ်တော်များ ပင်နီရောင်လွှမ်းခြင်းမှာလည်း ဒေါ်အောင်ဆန်းစုကြည်ကြောင့်ဖြစ်သည်၊ ဒေါ်အောင်ဆန်းစုကြည်က အင်န်အယ်လ်ဒီအမတ်များကို ပင်နီရောင်ဝတ်စေချင်သဖြင့် အမတ်များ ကလည်း လိုက်နာပြီး ဝတ်ဆင်နေကြပုံပေါ်သည်။ ပင်နီရောင်ကို လူထုသမ္မတဦးထင်ကျော်ကလည်း တခါတရံ ဝတ်ဆင်တတ်သလို ယနေ့လွှတ်တော်တွင် ပို့ဆောင်ရေးနှင့် ဆက်သွယ်ရေးဝန်ကြီး ဦးသန့် စင်မောင်လည်း ဝတ်ဆင်ထားသည်ကို တွေ့ရသည်။ ပုံသဏ္ဍာန်အားဖြင့် အင်န်အယ်လ်ဒီလွှတ်တော် ပီပြင်ပြီးဖြစ်လျှင် အနှစ်သာရအားဖြင့် မည်သို့ ရှိလေသနည်း။

သက်တမ်း လေးလကျော်လာပြီဖြစ်သည့် ပြည်သူ့လွှတ်တော်နှင့် အမျိုးသားလွှတ်တော် နှစ်ရပ် ကိုကြည့်လျှင် ပြည်သူ့လွှတ်တော်သည် ပို၍ သိပ်သိပ်သည်းသည်းရှိပြီး အလုပ်ကို စေ့စပ်သေချာစွာ လုပ်ကိုင်ပုံရသော လွှတ်တော်ဥက္ကဋ္ဌ ဦးဝင်းမြင့်၏ ပဲ့ကိုင်မှုအောက်တွင် လွှတ်တော်အမတ်များဖြစ် သော ပြည်သူ့ကိုယ်စားလှယ်များသည် ဖိအားရှိနေပုံရသည်။  လွှတ်တော်ဥက္ကဋ္ဌ၏ တင်းမာပုံပေါ်သော မျက်နှာထားနှင့် ၎င်းပြောဆိုသည့် တိကျသေချာသော စကားလုံးများကို ထောက်ထားသော် ဥက္ကဋ္ဌ သည် လွှတ်တော်ကို အာရုံစူးစိုက်မှု အပြည့်ပေးထားသည်ကို သတိပြုမိသည်။  လွှတ်တော်ဥက္ကဋ္ဌက လွှတ်တော်ကို အချိန်မလပ် ဂရုစိုက်သည်တွင် လွှတ်တော်အမတ်များမှာလည်း ပို၍ပင် သပ်သပ်ရပ်ရပ် ကြိုးစားဆောင်ရွက်ကြရသည်။ တချို့က တော်သည်၊ တချို့ကား ကြိုးစားရဦးမည် ဖြစ်သည်။

ဇွန် ၈ ပြည်သူ့လွှတ်တော်အစည်းအဝေးတွင် လွှတ်တော်ကိုယ်စားလှယ်တဦးက ကန့်သတ်ချိန် အတွင်း မေးခွန်းမေးမြန်းရာတွင် စကားလက်စမသိမ်းနိုင်သဖြင့် လွှတ်တော်ဥက္ကဋ္ဌက နှစ်ကြိမ်တိုင်တိုင် နိဂုံးချုပ်ခိုင်းသော်လည်း စကားဆက်နေသဖြင့် ဥက္ကဋ္ဌက ပြင်းထန်စွာ တူထုပြီး သတိပေးခဲ့သည်ကို တွေ့ရသည်။ ဇွန် ၈ တွင်ပင် ဆောက်လုပ်ရန် ပြင်ဆင်ဆောင်ရွက်နေသော လုပ်ငန်းစီမံကိန်းတခု ရပ်ဆိုင်းရန် တိုင်းပြည်နှင့်လူထုအကျိုးကို ရည်သန်၍ အဆိုကို တင်သွင်းခဲ့သူ လွှတ်တော်အမတ်က အဆိုအောင်မည်ကို သိရှိလိုက်သဖြင့် အပျော်လွန်ခဲ့ရာ လွှတ်တော် ဥက္ကဋ္ဌက အဆိုကို မည်သို့ ဆောင်ရွက်စေချင်ကြောင်း ရှင်းရှင်းလင်းလင်း ပြောပါရန် ထပ်မံ၍ ပြောဆို မေးမြန်းရသည်။

ပြည်သူ့လွှတ်တော် ဥက္ကဋ္ဌက လွှတ်တော်ကို စေ့စေ့စပ်စပ် တိတိကျကျနှင့် အချိန်ကုန်သ လောက် အလုပ်တွင်စေရန် လွှတ်တော်နှင့် လွှတ်တော်အမတ်များအား အလစ်မပေးဘဲ ဆောင်ရွက်   နေသည့်အတွက် မြန်မာ့မျက်လုံး၊ မြန်မာ့နား၊ မြန်မာ့စိတ်ခံစားမှုနှင့် တိုက်စစ်သော် တခါတရံတွင် လွန်သည်ဟု ထင်နိုင်စရာကောင်းသော်လည်း တာဝန်နှင့် အလုပ်ကို ဦးစားပေးထားသူပီပီ တိုင်းပြည် နှင့် လူထုအကျိုးရည် ဆောင်ရွက်ခြင်းဖြစ်သည်ဟု ယုံကြည်ပါသဖြင့် ခွင့်လွှတ်နိုင်ကောင်းသည်ဟု မဇ္ဈိမက ရှုမြင်သည်။

Mizzima Weekly