ရန်ကုန်၊ မေ ၂၈ ။ ။ စီးပွားရေးနှင့် ပတ်သက်၍ မူဝါဒများချမှတ်ရာတွင် ရေရှည်အသုံးကျသည့် မူဝါဒများဖြစ်ရန်လိုအပ်ပြီး အစိုးရ ထိန်းကျောင်းမှုပါသော ဈေးကွက်စီးပွားရေးစနစ်မျိုး ဖြစ်ရန်လိုအပ်ကြောင်း အားမာန် Economic Institute ဥက္ကဋ္ဌ ဦးဇော်ဖေဝင်းက ပြောသည်။
၎င်းက Socio-Economic Development in Myanmar မူဝါဒဆိုင်ရာ ဆွေးနွေးပွဲတွင် ယင်းကဲ့သို့ ပြောကြားခဲ့ခြင်းဖြစ်သည်။ အဆိုပါဆွေးနွေးပွဲကို Action Aid မြန်မာ နှင့် မဇ္ဈိမမီဒီယာတို့ ဦးစီးကာ မေလ ၂၈ရက်က ကန်တော်ကြီးပဲလေ့စ်ဟိုတယ်တွင် ပြုလုပ်ခဲ့ခြင်းဖြစ်သည်။
"ထုံးစံအတိုင်းကတော့ ကျွန်တော်တို့က ဈေးကွက်စီးပွားရေးစနစ်တည်ဆောက်ရမှာပါ။ ဈေးကွက်စီးပွားရေးစနစ် ဆိုလို့ အစိုးရက ဘာမှ ဝင်မပါတော့ဘဲ ဈေးကွက်ကို ကြိုက်သလိုလုပ်ကြဆိုပြီးတော့ လွှတ်ထားတဲ့ ဈေးကွက် စီးပွားရေးစနစ်မျိုးမဟုတ်ဘဲနဲ့ အစိုးရ ထိန်းကျောင်းမှုပါသော ဈေးကွက်စီးပွားရေးစနစ် လိုအပ်တယ်လို့ ကျွန်တော်ထင်ပါတယ်" ဟု ၎င်းက ပြောသည်။
ထို့ပြင် မြန်မာနိုင်ငံတွင် ဖြစ်ပေါ်နေသော ငွေကြေးဖောင်းပွမှုကြောင့် အခြေခံလူတန်းစားတွေက အလူးအလဲ ခံစား နေရပြီး နိုင်ငံအတွင်းရှိ အသေးစားအလတ်စား စီးပွားရေးလုပ်ငန်းများကို အစိုးရအနေဖြင့် အကူအညီပေးရန်လို အပ်ကြောင်း ၎င်းက ထည့်သွင်းပြောကြားသွားသည်။
"ငွေဖောင်းပွမှုကြောင့် လူချမ်းသာတွေအတွက် သိပ်မထိခိုက်နိုင်ပါဘူး။ ဘယ်သူတွေထိခိုက်နိုင်မလဲဆိုတော့ ပုံမှန် လက် လုပ်လုပ်စားတွေ၊ လစာနည်းနည်းပဲရတဲ့ ဝန်ထမ်းတွေ။ သာမန်လက်လုပ်လက်စားတွေဟာ ငွေဖောင်းပွ မှု ဒဏ်ကို အလူးအလဲခံရပါတယ်။ နောက်လည်း ဆက်ပြီး ခံရမယ့် သဘောရှိပါတယ်။ ဘာကြောင့်လဲဆိုရင် ငွေ ဖောင်းပွမှုက ဆက်ပြီး ရှိနေလို့ပါပဲ။ " ဟု ဆိုသည်။
ငွေကြေးဖောင်းပွမှုက ၂၀၁၁-၁၂ မှာ ၂.၈ % မြင့်တက်ခဲ့ပြီး ၂၀၁၅-၁၆ ဘဏ္ဍရေးနှစ်၏ ငွေဖောင်းပွမှုနှုန်းမှာ ၂၀၁၄-၁၅ ဘဏ္ဍနှစ် နှင့် နှိုင်းယှဉ်လျှင် ၁၄.၆ % ဖောင်းပွလိမ့်မည်ဟု ဆိုသည်။
မူဝါဒဆိုင်ရာ ဆွေးနွေးပွဲတွင် Development consultant ဦးမြင့်အောင်ကလည်း "စက်မှုနိုင်ငံဖြစ်ဖို့ဆိုတာ SMEsတွေ မတိုးတက်လို့ မရဘူး။ SMEs တွေမတိုးတက်ဘဲ industry မတိုးတက်ဘူး။ SMEs တွေဟာ Backbone of the every industry ပဲ။ ဘာဖြစ်လို့လဲဆိုရင် FDI (နိုင်ငံခြားရင်းနှီးမြှုပ်နှံမှု) ဝင်လာ တဲ့အခါမှာ လိုအပ်တဲ့ပစ္စည်းတွေကို "က"ကနေ "အ" အထိ မထုတ်နိုင်ဘူး။ " ဟု ပါဝင်ဆွေးနွေးခဲ့သည်။
မြန်မာနိုင်ငံအစိုးရအနေဖြင့် ကုန်ထုတ်လုပ်မှုတိုးတက်ရေး၊ ကုန်ဈေးနှုန်းတည်ငြိမ်ရေး၊ အလုပ်လက်မဲ့ လျော့ပေါ့ရေး ၊ဆင်းရဲ ချမ်းသာကွာခြားမှုလျော့ပါးရေး၊ နိုင်ငံခြား မှီခိုမှုလျော့ပေါ့ရေး၊ ပြည်တွင်းသုံးငွေ တန်ဖိုးတည်ငြိမ်ရေး၊ ပြည်ပ ငွေပေးငွေယူ ရှင်းတန်းဘက်ညီရေး၊ သဘာဝပတ်ဝန်းကျင် ထိန်းသိမ်းစောင့်ရှောက်ရေး စသည့် အချက်များကို စီးပွားရေး မျှော်မှန်းချက်တစ်ရပ်အနေနှင့် ချမှတ်လုပ်ဆောင်သင့်ကြောင်း ဦးဇော်ဝင်းဖေက ဆွေးနွေးခဲ့ပြီး The European Chamber of Commerce မှ Executive Director of Eurocham Myanmar - Mr.Filip Lauwerysen ကလည်း မြန်မာနိုင်ငံသည် နိုင်ငံတကာရင်းနှီးမြှုပ်နှံမှုများ လာရောက်ရန် ကမ္ဘာပေါ်တွင် အဆိုးရွားဆုံး အခြေအနေမျိုးဖြစ်နေသည်ဟု မြင်ကြောင်းနှင့် အစိုးရသစ်အနေဖြင့် လိုအပ်သည့် ဖန်တီးမှုများ လုပ်ဆောင်ပေးရန် မျှော်လင့်ကြောင်း ပြောကြားခဲ့သည်။
