မော်စကို၊ မေ၊ ၁ ။ ။ ဆီးရီးယားရှိ ရှေးဟောင်းမြို့တော် ပယ်လ်မိုင်ရာကို အစွန်းရောက်အကြမ်းဖက်များလက်မှ ပြန်လည်သိမ်းပိုက်ရာတွင် ပါဝင်တိုက်ခိုက်ရင်းအသက်စွန့်သွားခဲ့သည့် ရုရှားစစ်သားတစ်ဦးကို ရုရှားသမ္မတပူတင်က သူရဲကောင်းဘွဲ့ချီးမြှင့်ခဲ့သည်။
အလက်ဇန်ဒါးပရိုကိုရန်ကို ဟုအမည်ရသောယင်းစစ်သားသည် ပယ်လ်မိုင်ရာမြို့တိုက်ပွဲတွင် ISIS အကြမ်းဖက်သမားများ အဝိုင်းခံရသည့်အချိန်၌ အသေခံပြီး ၎င်းရှိနေသည့်နေရာကို လေကြောင်းမှတိုက်ခိုက်ရန်အကူအညီတောင်းခံခဲ့သူ ဖြစ်သည်။
ပရိုကိုရန်ကိုသည် သေဆုံးချိန်၌ အသက် ၂၅ နှစ်အရွယ်သာရှိသေးပြီး သူ၏ကိုယ်ဝန်ကိုလွယ်ထားရသည့် ဇနီးတစ်ယောက် ကျန်ရစ်ခဲ့သည်။
၎င်း၏ ရဲရင့်သည့်လုပ်ရပ်ကြောင့် ရုရှားရမ်ဘိုဟု တင်စားခေါ်ဝေါ်ခံခဲ့ရပြီး သမ္မတဗလာဒီမာပူတင်ကလည်း ရုရှားနိုင်ငံ၏ သူရဲကောင်းဘွဲ့ချီးမြှင့်ကာ ဂုဏ်ပြုခဲ့သည်။
ထို့ပြင် ပရိုကိုရန်ကိုတက်ရောက်ခဲ့သည့်အလယ်တန်းကျောင်းကို သူ၏နာမည်ပေးရန်လည်း ကျောင်းရှိတာဝန်ရှိသူများနှင့် ဆရာ၊ဆရာမများက တာဝန်ရှိသူများထံ တင်ပြထားသေးသည်။
ပရိုကိုရန်ကို၏ ကြွင်းကျန်ရစ်သောရုပ်အလောင်းကို ပြီးခဲ့သောအပတ်အတွင်းက ရုရှားနိုင်ငံသို့ ပြန်လည်သယ်ဆောင်ခဲ့ပြီး ဖြစ်သည်။
