မဇ္ဈိမသည် အီတလီသံအမတ်ကြီး မစ္စတာ Mr Pier Giorgio Aliberti အား မကြာသေးမီက အင်တာဗျူး ပြုလုပ်ခဲ့ရာ၊ အီတလီ-မြန်မာ ဆက်ဆံရေး၊ အဆင့်မြင့်အရာရှိများ၏ ချစ်ကြည်ရေး ခရီးစဉ်များ နှင့် မြန်မာနိုင်ငံအတွင်း ဒီမိုကရေစီ အသွင်ကူးပြောင်းမှှု စသည့်အကြောင်းအရာများကို ပြောကြားခဲ့သည်။

အီတလီ သံအမတ်ကြီးအား မဇ္ဈိမ အယ်ဒီတာချုပ် ဦးစိုးမြင့်က မတ်လ အတွင်းက မေးမြန်း ခဲ့ခြင်းဖြစ်သည်။

အီတလီနဲ့ မြန်မာ နှစ်နိုင်ငံ အပြန်အလှန် ဆက်ဆံရေးမှာ အဓိက အစိတ်အပိုင်းတွေက ဘာတွေဖြစ်မလဲ။

အီတလီနဲ့ မြန်မာမှာ တူညီတဲ့အချက်တွေ အများကြီး ရှိတယ်လို့ ကျွန်တော်ထင်ပါတယ်။ ကျွန်တော်တို့ နှစ်နိုင်ငံလုံးမှာ ရှည်လျားလွန်းတဲ့ သမိုင်းကြောင်း ရှိကြပြီး၊ ရှေးကာလကတည်းက တိုးတက်တဲ့ လူ့အဖွဲ့အစည်းတွေ ရှိခဲ့ကြပါတယ်။ ကျွန်တော်တို့ နှစ်နိုင်ငံရဲ့ အကြိုက်တွေလည်း တူညီကြပါတယ်။ မိသားစု၊ အစားအသောက်၊ ယဉ်ကျေးမှုနဲ့ ဘောလုံးပွဲတို့ကို ကျွန်တော်တို့ နှစ်သက်ကြပါတယ်။ ဒီလို အကြိုက်တွေ တူနေတာမို့ ခင်မင် ရင်းနှီးဖို့လည်း လွယ်ကူပါတယ်။ ကျွန်တော်တို့ရဲ့ အပြန်အလှန် ဆက်ဆံရေးမှာ အထူးသဖြင့် ယဉ်ကျေးမှုဟာ အလွန်အရေးကြီးတဲ့ အခန်းကဏ္ဍတစ်ခု ဖြစ်တယ်လို့ ကျွန်တော်ထင်ပါတယ်။

မြန်မာနိုင်ငံမှာလိုပဲ အီတလီမှာ အလွန်ရှေးကျတဲ့ ဘာသာရေးဆိုင်ရာ တည်နေရာတွေ အများကြီး ရှိနေပါတယ်။ အီတလီမှာတော့ ခရစ်ယာန်ဘုရားကျောင်းတွေရှိတာပါ။ ဒီမြန်မာနိုင်ငံမှာတော့ ဘုရားတွေပေါ့။ နှစ်နိုင်ငံလုံးမှာ ယဉ်ကျေးမှု အမွေအနှစ်တွေ အလွန်ကြွယ်ဝတဲ့အတွက် ခရီးသွားလုပ်ငန်းအတွက် အလားအလာတွေ အများကြီးရှိနေပါတယ်။  ဒီအလားအလာတွေ ဖွံ့ဖြိုးတိုးတက်လာအောင် ကြံဆောင် အသုံးချတဲ့နေရာမှာ မြန်မာနိုင်ငံဟာ အများကြီးလုပ်ရဦးမယ်လို့ ကျွန်တော်ထင်ပါတယ်။ ဒါကြောင့် အဲဒါနဲ့ပတ်သက်ပြီး ကျွန်တော်တို့ဟာ မြန်မာနိုင်ငံကို ကူညီသွားမှာလို့ ကျွန်တော်ထင်ပါတယ်။ ယဉ်ကျေးမှု ရှုထောင့်ကနေ ရှုမြင်တာဟာ ကျွန်တော်တို့အတွက် အလွန် အရေးကြီးတယ်လို့ ဆိုချင်ပါတယ်။ ပြီးတော့ ကျွန်တော်တို့မှာ ခိုင်မာတဲ့ နိုင်ငံရေး၊ စီးပွားရေး ဆက်ဆံမှုတွေ ရှိနေပါတယ်။ ဒါပေမဲ့ ယဉ်ကျေးမှု ကဏ္ဍကတော့ ကျွန်တော်တို့ နှစ်နိုင်ငံဆက်ဆံရေးအတွက် အထူးအရေးပါတယ်လို့ ကျွန်တော်ထင်ပါတယ်။ ဖွံ့ဖြိုးရေး ပူးပေါင်းဆောင်ရွက်မှုမှာလည်း အရေးပါပါတယ်။ အဲဒါဟာလည်း ကျွန်တော်တို့ ဒီမှာရှိနေရခြင်းရဲ့ အဓိကကျတဲ့ နောက်ထပ် အစိတ်အပိုင်းတစ်ခုပါ။

ဥပမာအားဖြင့် ယူနက်စကို ကမ္ဘာ့အမွေအနှစ် စာရင်းအကြောင်းကို တွေးကြည့်ပါ။ ပထမဆုံးအကြိမ်အဖြစ် မြန်မာနိုင်ငံက နေရာတစ်ခု (ပျူရှေးဟောင်းမြို့တွေ) ယူနက်စကို စာရင်းဝင်ရေးအတွက် ကျွန်တော်တို့ ကူညီခဲ့ပါတယ်။ အခု အဲဒီစာရင်းထဲမှာ ဒုတိယမြောက်အဖြစ် (ပုဂံ) စာရင်းဝင်ဖို့ ကျွန်တော်တို့ ကြိုးပမ်းနေကြပါတယ်။

အီတလီနဲ့ မြန်မာနိုင်ငံ ညှိနှိုင်းဆောင်ရွက်မှုနဲ့ ပတ်သက်ပြီး ပြောရမယ်ဆိုရင်၊ ဥရောပသမဂ္ဂနဲ့ မြန်မာ ညှိနှိုင်းဆာင်ရွက်မှုနဲ့ အီတလီ-မြန်မာ နိုင်ငံအချင်းချင်း ညှိနှိုင်း ဆောင်ရွက်မှုကို   နှိုင်းယှဉ်ကြည့်မယ်ဆိုရင် ဘယ်လိုအခြေအနေ ရှိပါသလဲ။

အီတလီဟာ ဥရောပသမဂ္ဂကို တည်ထောင်ခဲ့တဲ့ နိုင်ငံ ခြောက်နိုင်ငံထဲက တစ်ခုပါ။ ကျွန်တော်တို့မှာ ရှည်လျားတဲ့ သမိုင်းကြောင်းတစ်ခု ရှိပြီး ဒီစီမံကိန်းကို အယုံကြည်ဆုံး နိုင်ငံတွေထဲက တစ်ခုလည်း ဖြစ်ပါတယ်။ ရှုပ်ထွေးပြီး ထူးခြားတဲ့ ကြိုးပမ်းအားထုတ်မှု တစ်ခုလည်း ဖြစ်ပါတယ်။ ဒါဟာ နိုင်ငံတကာ အဖွဲ့အစည်း တစ်ရပ် ဖြစ်ရုံတင်မကဘဲ နိုင်ငံနယ်နိမိတ်ဘောင်တွေကို ကျော်လွန်တဲ့ အဖွဲ့လည်းဖြစ်ပါတယ်။ ဒါကြောင့်မို့ အခြေခံအားဖြင့် ပြောရမယ်ဆိုရင် ကျွန်တော်တို့ဟာ အချုပ်အခြာအာဏာ တချို့တဝက်ကို ဘရပ်ဆဲ(လ်)က ဥရောပသမဂ္ဂဆီကို ပေးအပ်ထားတာပါ။ ဒီတော့ စီမံကိန်းတစ်ခုကို ဥရောပသမဂ္ဂက ဆုံးဖြတ်လိုက်ပြီဆိုရင် အီတလီဟာလည်း ဥရောပသမဂ္ဂရဲ့ အစိတ်အပိုင်းအဖြစ် ပါဝင်ပတ်သက်ပါတယ်။ စီမံကိန်းကို ကျွန်တော်တို့အားလုံး ထောက်ခံတယ်၊ ဒါကြောင့် ဒီစီမံကိန်းတွေကို အဖွဲ့ဝင်နိုင်ငံ ၂၈ နိုင်ငံလုံးက အတူတကွ ထောက်ခံကြတယ်ဆိုတဲ့ သဘောပါ။

အီးယူ ရန်ပုံငွေအားလုံးရဲ့ ၁၃ ရာခိုင်နှုန်းလောက်ဟာ အီတာလျံ အခွန်ပေးဆောင်သူတွေဆီက လာတာဖြစ်တယ်ဆိုတဲ့ အချက်ကို စဉ်းစားကြည့်မယ်ဆိုရင်၊ အဖွဲ့ထဲမှာ ကျွန်တော်တို့ရဲ့ ပြောရေးဆိုခွင့် အသေအချာ ရှိနေတာကို တွေ့ရမှာပါ။ ဒါပေမဲ့ အီတလီမှာရော၊ တခြားအဖွဲ့ဝင် နိုင်ငံတွေမှာပါ ကျွမ်းကျင်ရာ နယ်ပယ်တွေ၊ ကြိုက်နှစ်သက်မှုတွေ ကိုယ်စီ ရှိနေကြတာပါ။ အထူးသဖြင့် အီတလီဟာ အဓိက ကဏ္ဍသုံးခုအတွက် ဖွံ့ဖြိုးရေးဆိုင်ရာ ပူးပေါင်းဆောင်ရွက်မှုမှာ အရမ်း တက်တက်ကြွကြွ ပါဝင် ဆောင်ရွက်နေပါတယ်။ ကျေးလက်ဖွံ့ဖြိုးရေး၊ အုပ်ချုပ်ရေးနဲ့၊ အသေးစားနဲ့ အလတ်စား စီးပွားရေး လုပ်ငန်းတွေ၊ အထူးသဖြင့် ခရီးသွားလုပ်ငန်းနဲ့ ယဉ်ကျေးမှု အမွေအနှစ် ဆိုင်ရာ နယ်ပယ်တွေမှာ ပံ့ပိုးကူညီနေပါတယ်။

အဲဒီနယ်ပယ်တွေနဲ့ ပတ်သက်ပြီး ကျွန်တော်တို့မှာ ကျွမ်းကျင်မှုတွေ ပိုရှိတာမို့ အဲဒီနယ်ပယ်တွေက ကျွန်တော်တို့ရဲ့ အတွေ့အကြုံတွေကို မျှဝေပေးနေပါတယ်။ တချို့နယ်ပယ်တွေမှာတော့ ကျွန်တော်တို့ဟာ တိုက်ရိုက်ဖြစ်စေ၊ ကုလသမဂ္ဂ အဖွဲ့အစည်းတွေ၊ အီတလီ အန်ဂျီအိုတွေကနေ တစ်ဆင့်ဖြစ်စေ အပြန်အလှန် နည်းလမ်းအားဖြင့် ဆောင်ရွက်နေပါတယ်။ တခြားနယ်ပယ်တွေမှာတော့ ကျွန်တော်တို့ဟာ အီးယူလုပ်ငန်းစဉ်တွေကို ကူညီပံ့ပိုးနေပါတယ်။သူတို့နဲ့ ပြိုင်တူ ဆောင်ရွက်နေတယ်လို့ ကျွန်တော် ပြောချင်ပါတယ်။ ဒါပေမဲ့ ခင်ဗျားအနေနဲ့ အီးယူအကြောင်းကို တွေးပြီဆိုရင် အဲဒါဟာ သီးခြားအဖွဲ့အစည်း တစ်ခု ဆိုရုံမျှ မဟုတ်သလို၊ နောက်ထပ်ကိုယ်စားလှယ်အဖွဲ့ ဆိုရုံမျှလည်း မကပါဘူး။ အဲဒါဟာ အဖွဲ့ဝင် ၂၈ နိုင်ငံလုံးနဲ့ ပတ်သက်နေပါတယ်။ တကယ်တော့ အီးယူရဲ့ပါဝင်ကူညီမှုဟာ လူအများစုထင်ထားတာထက် အများကြီး ပိုကြီးမားပါတယ်။ အဲဒါဟာ အဖွဲ့ဝင် ၂၈ နိုင်ငံ အပြင်၊ အီးယူ ကိုယ်စားလှယ်အဖွဲ့ပါ ပေါင်းစပ် ကူညီနေတာပါ။

စီးပွားရေးနဲ့ ပတ်သက်ပြီး မေးရမယ်ဆိုရင် အီတလီနဲ့ မြန်မာအကြား နှစ်နိုင်ငံ ကုန်သွယ်မှုနဲ့ ဝန်ဆောင်မှု တွေအကြောင်း ကျွန်တော်တို့ကို ပြောပြနိုင်မလား။

ကျွန်တော်တို့ရဲ့ ဖြစ်နိုင်ခြေ အလားအလာတွေကို မပြည့်မီသေးတာ ထင်ရှားတယ်လို့ ကျွန်တော် ယူဆပါတယ်။ ကျွန်တော်တို့ ဒီထက်ပိုလုပ်နိုင်တယ်လို့ ကျွန်တော်ယုံကြည်ပါတယ်။

ဒါဟာ ကျွန်တော် ဦးစားပေးလုပ်ကိုင်ချင်တဲ့ နယ်ပယ်တွေထဲက တစ်ခုဖြစ်ပါတယ်။ ကျွန်တော်တို့ အများကြီး ပိုလုပ်နိုင်လိမ့်မယ်လို့ ကျွန်တော်ထင်ပါတယ်။ အခုဆိုရင် ကျွန်တော်တို့ဟာ ထိပ်တန်းကုန်သွယ်ဘက် ၁၅ နိုင်ငံထဲမှာ ပါဝင်နေပါပြီ။ ကျွန်တော်တို့ရဲ့ ကုန်စည်ဖလှယ်မှှုဟာ အမေရိကန်ဒေါ်လာ သန်းပေါင်း ၁၂၀ ဝန်းကျင် ရှိပြီးတော့၊ ပိုငွေ အမေရိကန်ဒေါ်လာ သန်း ၇၀ ဝန်းကျင် ရှိပါတယ်။  ကျွန်တော်တို့ အများကြီး ပိုလုပ်ရဦးမယ်လို့ ကျွန်တော်ထင်ပါတယ်။

ကျွန်တော်တို့ဟာ အဝတ်အထည်၊ ငါး နဲ့ ဆန်တွေကို အဓိက တင်သွင်းပြီး၊ စက်ပစ္စည်း၊ စိုက်ပျိုးရေးဆိုင်ရာ စက်ပစ္စည်း၊ ယာဉ်တွေနဲ့ တခြားပို့ကုန်တွေကို တင်ပို့ရောင်းချပါတယ်။ အထူးသဖြင့် စိုက်ပျိုးရေးဆိုင်ရာ စက်ပစ္စည်းတွေဟာ ဒီနိုင်ငံမှာ အခိုင်အမာ နေရာရလာပြီး ထွန်စက်နဲ့ စက်ပစ္စည်းတွေ အများအပြား ရှိနေပါတယ်။ အီတလီဟာ ဥရောပမှာ ဒုတိယ စက်မှု အထွန်းကားဆုံး နိုင်ငံဖြစ်တယ်ဆိုတဲ့ အချက်ကိုလည်း ထည့်သွင်း စဉ်းစားသင့်ပါတယ်။ အီးယူအဖွဲ့ထဲမှာ ဂျာမနီရဲ့နောက်မှာ အီတလီဟာ ပို့ကုန် ဒုတိယ အားအကောင်းဆုံး နိုင်ငံဖြစ်ပါတယ်။ ကျွန်တော်တို့ဟာ အစဉ်အလာအရ စက်မှုအားကောင်းတဲ့ နိုင်ငံဖြစ်လို့ အခြား အရေးပါတဲ့ အီးယူ အဖွဲ့ဝင်နိုင်ငံတွေထက် ခြေတစ်လှမ်း သာနေပါတယ်။

၂၀၀၈-၉ ခုနှစ်မှာ အနည်းငယ် ကြာရှည်ခဲ့တဲ့ ဘဏ္ဍာရေး အကျပ်အတည်းဟာ ကျွန်တော်တို့ကိုလည်း ရိုက်ခတ်ခဲ့ပါတယ်။ ဒါပေမဲ့ ကျွန်တော်တို့ရဲ့ စီးပွါးရေးက အားကောင်းနေဆဲပါပဲ။ ဒါကြောင့်မို့ ကုန်သွယ်ရေးမှာရော၊ ရင်းနှီးမြှုပ်နှံမှုမှာပါ ကျွန်တော်တို့ ပိုလုပ်နိုင်လိမ့်မယ်လို့ ကျွန်တော်ထင်ပါတယ်။

ပြီးခဲ့တဲ့နှစ်က ရန်ကုန်မှာ အီတလီ ကုန်စည်ပြပွဲ တစ်ခု လုပ်ခဲ့ပါတယ်။ အဲဒါ အခြေအနေ ဘယ်လို ရှိပါသလဲ။

ဒါဟာ အီတလီကုမ္ပဏီတွေရဲ့ အကျိုးစီးပွါးအတွက် ဥပမာကောင်း တစ်ခုပါ။ အီတလီကို ကိုယ်စားပြုပြီး ကုမ္ပဏီ ၁၀၀ ဝန်းကျင်လောက် ပါဝင်ပြသခဲ့ကြတာမို့ အပေါင်းလက္ခဏာ အရမ်းဆန်တဲ့ စမှတ်တစ်ခုပါ။ အဲဒါဟာ ပိုပြီး ယေဘုယျဆန်တဲ့ ပြပွဲ တစ်ခု ဖြစ်ခဲ့တာမို့ အခုနှစ်မှာတော့ ပိုပြီး အမျိုးအစား သတ်သတ်မှတ်မှတ်ရှိမယ့် ကုန်စည်ပြပွဲမျိုး ကျွန်တော်တို့ လုပ်ချင်ပါတယ်။ ပိုပြီးတိတိကျကျရှိမယ့် ကဏ္ဍတွေအတွက် ကုန်စည်ပြပွဲမျိုး လုပ်ဖို့လိုတယ်လို့ ကျွန်တော်ယုံကြည်ပါတယ်။ ဒီနှစ်အကုန် နိုဝင်ဘာ၊ ဒီဇင်ဘာလောက်မှာ အရေးကြီးတဲ့ ကုန်စည်ပြပွဲ အမျိုးအစား နှစ်မျိုး လုပ်ဖို့ရှိပါတယ်။ တစ်ခုကတော့ အစားအသောက်ဆိုင်ရာ နဲ့ပတ်သတ်ပြီး နောက်တစ်ခုကတော့ အိမ်ရာဆောက်လုပ်ရေး လုပ်ငန်းနဲ့ ပတ်သတ်ပါတယ်။ အဲဒီ အမျိုးအစား နှစ်မျိုးမှာ၊ တူညီတဲ့ ကဏ္ဍတွေမှာ သီးသန့်အီတာလျံပြပွဲ နှစ်ခုရှိမှာပါ။ဘာကြောင့်လည်းဆိုတော့ အစားအသောက် နဲ့ အိမ်ရာဟာ ကျွန်တော်တို့အတွက် အရမ်း အရေးကြီးလို့ပါ။ အီတလီ အစားအသောက် အကြောင်းတော့ လူတိုင်း သိကြပါတယ်။ ဒါပေမဲ့ ကျွန်တော်တို့ဟာ အိမ်ဒီဇိုင်း၊ ဗိသုကာ စတာတွေနဲ့ ပတ်သတ်ပြီးတော့လည်း ထူးချွန်ကြတာမို့ ကျွန်တော်တို့ ပိုပြီးလုပ်ကိုင်ချင်ပါတယ်။ 

အီတလီ ယဉ်ကျေးမှှု အတွက် ရည်ရွယ်ချက်ကြီးမားတဲ့ အစီအစဉ်တစ်ခုလည်း ကျွန်တော့်မှာ ရှိပါတယ်။ ကျွန်တော်တို့ဟာ လှှုပ်ရှားဆောင်ရွက်မှှုတွေ ပိုလုပ်နေပြီး "Italy in Myanmar 2016" လို့ခေါ်တဲ့ အစီအစဉ်သစ်တစ်ခု ရှိပါတယ်။ အဲဒီအစီအစဉ်ကို လာမယ့် ရက်သတ္တပတ် အနည်းငယ်မှာ စတင်တော့မှာ ဖြစ်တာမို့၊ လာမယ့်လ အနည်းငယ်အတွင်းမှာ ဒီနိုင်ငံမှာ အီတလီယဉ်ကျေးမှှုတွေကို ပိုမြင်တွေ့ရတော့မယ်ဆိုတာ သေချာပါတယ်။

လာမယ့်နှစ်အနည်းငယ်အတွင်း ကျွန်တော်တို့ နှစ်နိုင်ငံ ဆက်ဆံရေးနဲ့ ပတ်သက်ပြီး ဘယ်လိုမြင်ပါသလဲ။

အများကြီး ပိုပြီးပူးပေါင်းဆောင်ရွက်မယ့် ချဉ်းကပ်မှုမျိုးကို ကျွန်တော်တို့ ပြုလုပ်ချင်ပါတယ်။ ပြီးတော့ အီတလီနိုင်ငံကိုလည်း အရှိတရားအတိုင်းပဲ တင်ပြဖို့ ကြိုးပမ်းသွားမှာပါ။ ဒီမှာရှိကြတဲ့ လူအများအပြားဟာ အီတလီကို မသိကြပါဘူး။ ဘာကြောင့်လဲဆိုတော့ အီတလီကို သွားရောက်လည်ပတ်ဖို့ သူတို့တွေ အခွင့်အလမ်း မရကြလို့ပါ။ ဥရောပ တစ်တိုက်လုံးကို အကုန် အတူတူ ထင်နေခဲ့တဲ့ လူတချို့ ရှိခဲ့ပါတယ်။ ဒါပေမဲ့ သူတို့တွေ ဥရောပကို ရောက်သွားကြတဲ့အခါ နိုင်ငံတွေ တစ်ခုနဲ့တစ်ခု ဘယ်လောက် ကွာခြားကြသလဲ ဆိုတာကို သဘောပေါက်လာကြပါတယ်။ ကျွန်တော့်ရဲ့ အိုင်ဒီယာကတော့ အီတလီကို ပိုပြီး ကျယ်ပြန့်တဲ့ နည်းလမ်းမျိုးနဲ့ မိတ်ဆက်ပေးဖို့ပါ။

ကျွန်တော် အရင်က ပြောခဲ့သလိုပဲ ကျွန်တော်တို့ဆီမှာ စားကောင်းသောက်ဖွယ်တွေ ပေါများပြီး ယဉ်ကျေးမှုလည်း ကြွယ်ဝပါတယ်။ လှပတဲ့ ရုပ်ရှင်တွေ ထွက်ရှိခဲ့ပြီး အံ့ဩစရာကောင်းတဲ့ ဗိသုကာ လက်ရာတွေ နဲ့ ဒီဇိုင်းတွေလည်း ရှိပါတယ်။ ဒါကြောင့်မို့ အဲဒါတွေကို ပိုပြီး ပြသချင်ပါတယ်။ ပြီးတော့ ဘောလုံးအကြောင်းကို ကျွန်တော်တို့ ဖော်ပြခဲ့ကြတယ်နော်။ အားကစားနဲ့ ပတ်သက်ပြီး ကျွန်တော်တို့ ပိုပြီး ဆောင်ရွက်ချင်ပါတယ်။ ဘာကြောင့်လည်းဆိုတော့ အားကစားဟာ လူတွေကို စည်းလုံးညီညွတ်စေလို့ပါ။ အဲဒါဟာ ကလေးတွေအတွက်လည်း ကောင်းပါတယ်။ ဒါကြောင့်မို့ ကျွန်တော်တို့ဟာ မြန်မာ ဘောလုံးအဖွဲ့ချုပ်၊ အီတလီ ဘောလုံးအဖွဲ့ချုပ် တို့နဲ့ ဆွေးနွေးနေပါတယ်။ ဘောလုံး လေ့ကျင့်ရေး အပါအဝင် တချို့ဖလှယ်မှုတွေ ပိုမို လွယ်ကူချောမွေ့လာစေဖို့ အတွက်ပါ။ ဘာကြောင့်လဲဆိုတော့ ဒါဟာ အရည်အသွေး မြှင့်တင်ရေးအတွက် အစိတ်အပိုင်းတစ်ခုလည်း ဖြစ်လို့ပါ။

ဒါဟာ အရည်အသွေးတည်ဆောက်မှု နည်းလမ်းတစ်ခုဖြစ်ပြီး အားကစားဟာ အလွန် အရေးကြီးပါတယ်။ စီးပွားရေး ရှု့ထောင့်တစ်ရပ်ကနေ ကြည့်မယ်ဆိုရင်လည်း အရေးကြီးပါတယ်။ အီတလီရဲ့ပုံရိပ် ပိုပြီး စုစုစည်းစည်း ရှိစေဖို့အတွက် ဒီအားထုတ်မှှုတွေ အားလုံးကို အတူတကွ ဆောင်ရွက်သင့်တယ်လို့ ကျွန်တော်ထင်ပါတယ်။

ယဉ်ကျေးမှုဆိုင်ရာ ကိစ္စရပ်တွေကို ဆောင်ရွက်တဲ့နေရာမှာ အစဉ်အလာနည်းလမ်းသာ မကဘဲ ပိုပြီး ကျယ်ကျယ်ပြန့်ပြန့် ဆောင်ရွက်ဖို့ ကျွန်တော်တို့ လေးလေးနက်နက် ရည်ရွယ်ထားပါတယ်။ ဒါပေမဲ့ အားကစားလို၊ အီတလီ အစားအသောက်လို ကိစ္စရပ်တွေလည်း ပါဝင်မှာပါ။ အစားအသောက်ဆိုတာ အသက် ဆက်လက်ရှင်သန်နိုင်ရေးအတွက် စားသောက်နေရတဲ့ အရာသက်သက်လို့ တချို့လူတွေက ထင်တတ်ကြပါတယ်။ ဒါပေမဲ့ အစားအသောက်ဆိုတာ ယဉ်ကျေးမှုရဲ့ အစိတ်အပိုင်းတစ်ခုလည်း ဖြစ်ပါတယ်။ ဥပမာအားဖြင့် ကျွန်တော်တို့ဟာ ကျွန်တော်တို့ရဲ့ အတွေ့အကြုံကို မျှဝေဖို့အတွက် အီတလီက အလွန်တော်တဲ့ စားဖိုမှူးတစ်ယောက်ကို ဒီကိုလွှတ်ဖို့ စီစဉ်နေပါတယ်။ ကျွန်တော်တို့ ဒီကို တင်ပို့နိုင်တဲ့ စက်ပစ္စည်းတွေအပြင်၊ အီတလီက ဘဝအရည်အသွေးဆိုတာ ဘာလဲ၊ အီတလီ ဘဝပုံစံဆိုတာ ဘာလဲ စတာတွေကို မြန်မာနိုင်ငံကလူတွေ သိရှိလာစေမယ့် စိတ်ကူးစိတ်သန်းလည်း ဖြစ်ပါတယ်။ ဒါဟာ အီတလီ ယဉ်ကျေးမှုဆိုင်ရာ ကျယ်ပြန့်တဲ့ ပုံစံပါ။