ဖူးခက်၊ မတ် ၂၆ ။ ။ ထိုင်းနိုင်ငံ ဖူးခက်ကမ်းခြေတွင် မတ် ၂၆ ရက် နံနက်ပိုင်းက နိုင်ငံခြားသားအမျိုးသားတစ်ဦး၏ သေဆုံးလျက်ရုပ်အလောင်းတစ်လောင်းကို တွေ့ရှိသည်။
မည်သူမည်ဝါ မသိရသေးသည့် အသက် ၅၀ အရွယ် နိုင်ငံခြားသား၏ ဖူယောင်နေသည့် အလောင်းအား ချိုယန်းသာလေးကမ်းခြေနေရာတွင် တွေ့ခြင်းဖြစ်ကြောင်း ရဲမှူး နိုးဖာယတ်က ပြောသည်။
ကမ်းခြေတစ်လျှောက် လေ့ကျင့်ခန်းလုပ်နေသည့် နိုင်ငံခြားသားတစ်ဦးက အလောင်းကို စတင်တွေ့ပြီး နံနက် ၇ နာရီခန့်တွင် ရဲစခန်းသို့ သတင်းရောက်လာခြင်းဖြစ်သည်။
သေဆုံးသူနိုင်ငံခြားသားမှာ တီရှပ်နှင့် ဘောင်းဘီတိုဝတ်ဆင်ထားပြီး ရုပ်အလောင်း၏ အနေအထားအရ ရုန်းရင်ဆန်ခတ်ဖြစ်ထားသည့် လက္ခဏာမတွေ့ရကြောင်း ရဲမှူးနိုဖာယတ်က ပြောသည်။
အလောင်းတွင် အထောက်အထားတစ်စုံတစ်ရာမှ မတွေ့ရဘဲ ဘတ်ငွေ ၉၀ ကိုသာ တွေ့ရှိရသည်။ အလောင်းတွေ့ရှိချိန်တွင် ၎င်းသေဆုံးသည်က အနည်းဆုံး ခြောက်နာရီမှ ရှစ်နာရီကြားတွင် ဖြစ်နိုင်ကြောင်း ရဲမှူးက ပြောသည်။
