ပေကျင်း၊ မတ် ၂၆ ။ ။ တရုတ်နိုင်ငံတွင် သမ္မတရှီကျင့်ဖျင်အား ရာထူးမှ အနားယူရန် တိုက်တွန်းသည့် စာဖြန့်ဝေခဲ့မှုဖြစ်ပွားပြီးနောက် လူပေါင်း ၂၀ ဖမ်းဆီးထားကြောင်း ဘီဘီစီက သတင်းကြားသိရသည်။
နိုင်ငံပိုင်ဝက်ဘ်ဆိုက်ဖြစ်သည့် Wujie News တွင် မတ်လအစောပိုင်းက ယင်းစာအား ဖော်ပြခဲ့ခြင်းဖြစ်သည်။
ယင်းစာကို အာဏာပိုင်များက ချက်ချင်းအလျင်အမြန် ဖြုတ်ချလိုက်နိုင်သော်လည်း အမေးအမြန်းရှိလာလျှင် သက်သေအဖြစ် ဆုံးဖြတ်နိုင်ရန် Google က သိမ်းဆည်းသိုလှောင်ထားသော cached version အဖြစ် အွန်လိုင်းတွင် ရှိနေဆဲဖြစ်သည်။
ဖမ်းဆီးထားသူများအနက် သတင်းကော်လံစားတစ်ဦးဖြစ်သူကို ပြန်လွှတ်ပေးလိုက်ဖွယ်ရှိသော်လည်း အများစုကို ဆက်လက်ထိန်းသိမ်းထားဆဲဖြစ်သည်ဟု ယူဆဖွယ်ရှိသည်။
အွန်လိုင်းတွင် ရှိနေဆဲယင်းစာ၌ “ခင်မင်ရသော ရဲဘော်ရဲဖက် ရှီကျင့်ဖျင်၊ ကျွန်တော်တို့က ကွန်မြူနစ်ပါတီဝင်များပဲဖြစ်တယ်။”ဟု အစပျိုးရေးသားထားသည်။
“ခင်ဗျားအနေနဲ့ ပါတီစုက ထွက်ကာ နိုင်ငံခေါင်းဆောင်နေရာက အနားယူလိုက်ဖို့ ဒီစာကနေတစ်ဆင့် ကျွန်တော်တို့ တိုက်တွန်းရေးသားလိုက်တာပဲဖြစ်တယ်။”ဟု ယင်းစာတွင် ရေးသားဖော်ပြထားသည်။
