အမျိုးသားအဆင့် နုုိင်ငံရေး ဆွေးနွေးမှုများနှင့် ပြည်ထောင်စုု ငြိမ်းချမ်းရေး ညီလာခံ ကျင်းပရေးတို့ကိုဆောင်ရွက်သွားမည်

အမျိုးသားအဆင့် နုုိင်ငံရေး ဆွေးနွေးမှုများနှင့် ပြည်ထောင်စုု ငြိမ်းချမ်းရေး ညီလာခံ ကျင်းပရေးတို့ကိုဆောင်ရွက်သွားမည်
ဓာတ်ပုံ- ဖနိဒါ

ချင်းမိုင်၊ မတ် ၂၅ ။             ။ အမျိုးသားအဆင့် နိုင်ငံရေး ဆွေးနွေးမှုများနှင့် ပြည်ထောင်စု ငြိမ်းချမ်းရေး ညီလာခံ ကျင်းပရေးတို့ကိုဆောင်ရွက်သွားမည် ဖြစ်ကြောင်း တစ်နိုင်ငံလုံး အပစ်အခတ် ရပ်စဲရေးသဘောတူ စာချုပ် မူကြမ်း(NCA)လက်မှတ် ရေးထိုးထားသော တိုင်းရင်းသား လက်နက်ကိုင် အဖွဲ့အစည်း ၈ ဖွဲ့က ပြောဆိုလိုက်သည်။

ထိုင်းနိုင်ငံ ချင်းမိုင်မြို့တွင် မတ်လ ၂၄ ရက်က စတင်ကျင်းပနေသော ဒုတိယအကြိမ်မြောက် ထိပ်သီးအစည်းအဝေး၏ ရှေ့လုပ်ငန်းစဉ်များအတွင်း အမျိုးသားအဆင့် နိုင်ငံရေး   ဆွေးနွေးမှုများနှင့် ပြည်ထောင်စု ငြိမ်းချမ်းရေး ညီလာခံ ကျင်းပရေးကိစ္စများနှင့် တက်လာမည့် အစိုးရ သစ်နှင့် ချိတ်ဆက် ဆောင်ရွက်ရေးကိစ္စများ ထည့်သွင်း ဆွေးနွေးသွားမည် ဖြစ်ကြောင်း သိရသည်။

“ညီလာခံကနေပြီးတော့ ဆွေးနွေးပွဲမှာ ဆွေးနွေးမဲ့အကြောင်း အရာကို ဦးဆောင်မဲ့ လုပ်ငန်းကော်မတီ ဖွဲ့ရမှာဘဲ။ ဒါပေမဲ့ လုပ်ငန်းကော်မတီ မဖွဲ့နိုင်ပေမဲ့လည်း ဒါက သဘောတူညီထားတဲ့ မူဘောင်မှာ ပါပြီး သားဖြစ်တဲ့ အတွက်ကြောင့် ဒါကို ဆက်လက် အကောင်အထည်ဖော်နိုင်ဖို့အတွက် အစိုးရကလည်း ညွန်ကြားထားပြီးသားဖြစ်တယ်”ဟု ကရင်အမျိုးသား အစည်းအရုံး(KNU) မှ အထွေထွေအတွင်းရေးမှူး ပဒိုကွယ်ထူးဝင်းက ပြောသည်။

အမျိုးသားအဆင့် နိုင်ငံရေးဆွေးနွေးပွဲသည် တိုင်းနှင့် ပြည်နယ်အလိုက် အားလုံးပါဝင်ရေး မူကို အခြေခံထားခြင်း ဖြစ်ပြီး တိုင်းနှင့် ပြည်နယ်များရှိ အောက်ခြေ လူထုလူ တန်းစားများအား စီးပွားရေး၊ နိုင်ငံရေးနှင့် ဖက်ဒရယ် စသည့်ကိစ္စများပေါ် အမြင်သဘောထားများ ရယူ၍ ၎င်းတို့ လိုလားသည့် ဆန္ဒအရ တိုင်းရင်းသား အဖွဲ့အစည်းများက ပြန်လည် စုစည်းမှု ရယူကာ ပြည်ထောင်စု ငြိမ်းချမ်းရေး ညီလာခံတွင် တင်ပြကာ အမျိုးသားအဆင့် နိုင်ငံရေး ဆွေးနွေးပွဲတွင် ဆုံးဖြတ်ချက် ချရမည် ဖြစ်ကြောင်း ၎င်းက သတင်းထောက်များကို ပြောကြားသည်။

တက်လာမည့် အစိုးရသစ်၏ ငြိမ်းချမ်းရေးတည်ဆောက်မှု ပေါ်လစီ တိတိကျကျ မသိရသေးသဖြင့် ငြိမ်းချမ်းရေး တည်ဆောက်မှု၏ ဖြစ်စဉ်များကို ပြန်လည် သုံးသပ်ခြင်း၊ နိုင်ငံရေး ဆွေးနွေးမှု မူဘောင်တွင် ပါဝင်မည့် အစုအဖွဲ့၊ အချိုးအစားများကို ပြန်လည် လုပ်ဆောင်နိုင်ကြောင်း ၎င်းကရှင်းပြသည်။

“အစိုးရသစ်က ဒီလိုလုပ်ဆောင်တဲ့ နေရာမှာ ကျွန်တော်တို့သဘောတူညီမှု ရှိထားတာက ဒီနိုင်ငံရေးတွေ့ဆုံ ဆွေးနွေးမှု အစုအဖွဲ့ အကုန်လုံးရဲ့ သဘောတူညီမှုကို လက်ခံရမယ်။ ဒုတိယအချက်က အန်စီအေကို အခြေခံရမယ်။ ဒီဂွင်အတွင်းမှာဘဲ လုပ်ရမယ်၊ ဒါကို ချိတ်ဆက်ပြီးတော့ လုပ်သွားမှာပေါ့”ဟု ပဒိုကွယ်ထူးဝင်းက ပြောသည်။

ထို့ပြင် နိုင်ငံရေး မူဘောင်အရ ပြည်ထောင်စု ငြိမ်းချမ်းရေး ညီလာခံကို ကျင်းပရန်အတွက် ညီလာခံ တစ်ခုနှင့် တစ်ခုကြားတွင် ၄ လအကြာတွင် ကျင်းပရမည် ဖြစ်သော်လည်း ဒုတိယအကြိမ်   ပြည်ထောင်စု ညီလာခံကို ကျင်းပရမည် ဖြစ်ကြောင်း ပထမနေ့ အစည်းအဝေးတွင် အရံသဘောပတိအဖြစ် တာဝန်ယူခဲ့သော ပအိုဝ့်အမျိုးသားလွတ်မြောက်ရေးအဖွဲ့ချုပ်(PNLO) ဥက္ကဌ ဦးခွန်မြင့်ထွန်းက သတင်းထောက်များကို ပြောသည်။

“သို့သော် လက်ရှိ ဖြစ်နေတဲ့ အာဏာလွဲပြောင်းရေး အခြေအနေအရ အချိန်ကာလတခုက ကြာကောင်းကြာသွားနိုင်တယ်။ ဒါပေမဲ့ သိပ်အကြာကြီး ထားလို့ မရဘူး။ ဒုတိယ အကြိမ် ညီလာခံကို ကျနော်တို့ ကျင်းပရမှာဖြစ်တယ်။ မကျင်းပမီစပ်ကြားမှာ  ပြည်ထောင်စု အစိုးရနဲ့ လက်မှတ်မထိုးရတဲ့ ကျွန်တော်တို့ ညီနောင်တွေကြားမှာ အန်စီအေ အပေါ်မှာ ပူးပေါင်းဆောင်ရွက်မှု ဖြစ်လာဖို့အတွက် အားလုံးက ဆောင်ရွက်ကြရမှာ ဖြစ်ပါတယ်”ဟု သူက ပြောသည်။

ပြည်ထောင်စု ညီလာခံ ကျင်းပမည် ဆိုပါက သဘောတူညီမှု ရရှိထားသော နိုင်ငံရေးမူဘောင်များအပေါ် ပြင်ဆင်ခြင်း၊ ပြောင်းလဲနိုင်သည်ဟု သဘောတူညီခဲ့သော်လည်း အာဏာ ရလာမည့် အမျိုးသား ဒီမိုကရေစီအဖွဲ့အချုပ် (NLD)အနေဖြင့် နိုင်ငံရေးမူဘောင်များအပေါ် ဆက်လက် ညှိနှိုင်းသွားမည် ဖြစ်ကြောင်း ဦးခွန်မြင့်ထွန်းက ပြောသည်။

ထိုထိပ်သီးခေါင်းဆောင် အစည်းအဝေး ကျင်းပပြီးနောက် NCA လက်မှတ်မထိုးသေးသည့် တိုင်းရင်းသား လက်နက်ကိုင် အဖွဲ့အစည်းများနှင့်လည်း တွေ့ဆုံ ဆွေးနွေးနိုင်ရေး ကြိုးပမ်းသွားမည် ဖြစ်ကြောင်း သူက ပြောဆိုသည်။

ပထမနေ့ အစည်းအဝေးတွင် တိုင်းရင်းသားလက်နက်ကိုင် အဖွဲ့အစည်းမှ ပူးပေါင်းဆောင်ရွက်ရေးအဖွဲ (EAO CT) အပစ်ရပ်စာချုပ် စောင့်ကြည့်ရေး ပူးတွဲကော်မတီ(EAO JMC)နှင့် ပြည်ထောင်စု ငြိမ်းချမ်းရေး ဆွေးနွေးပွဲ ပူးတွဲကော်မတီ(EAO UPDJC)တို့မှ အစီရင်ခံစာများ တင်သွင်းခြင်းနှင့် တက်လာမည့် အစိုးရနှင့် ချိတ်ဆက်ဆောင်ရွက်ရေးကိစ္စများ ဆွေးနွေးခဲ့သည်ဟု သိရသည်။

ထိုင်းနိုင်ငံ ချင်းမိုင်မြို့ရှိ Khum Phucome ဟိုတယ်တွင် ပြုလုပ်နေသော NCA လက်မှတ်ရေးထိုးထားသော တိုင်းရင်းသား လက်နက်ကိုင် အဖွဲ့အစည်း ၈ ဖွဲ့မှ ကိုယ်စားလှယ်များနှင့် လေ့လာသူများ အပါအဝင် ၅၀ ကျော် တက်ရောက် ဆွေးနွေးနေခြင်း ဖြစ်သည်။ ပထမနေ့ သဘာပတိများအဖြစ် RCSS ဥက္ကဌ ဒုဗိုလ်ချုပ်ကြီး ယွပ်ဆစ်၊ PNLO ဥက္ကဌ ဦးခွန်မြင့်ထွန်းနှင့် ALP မှ ဒုဥက္ကဌ ဦးခိုင်စိုးနိုင်အောင်တို့ ဆောင်ရွက်ခဲ့သည်။

Mizzima Weekly

Tags