ယာယီဒုက္ခသည်စခန်းမှ လှေစီး ဒုက္ခသည် ဆယ်ဦးထိ ထွက်ပြေး

ယာယီဒုက္ခသည်စခန်းမှ လှေစီး ဒုက္ခသည် ဆယ်ဦးထိ ထွက်ပြေး

ရန်ကုန်၊ ဇွန် ၃၀ ။        ။ ရခိုင်ပြည်နယ် တောင်ပြိုလက်ဝဲမြို့နယ်တွင် ယာယီစစ်ဆေးမှုခံယူနေသော လှေစီးဒုက္ခသည်များ ထွက်ပြေးလျက်ရှိရာ ဇူလိုင် ၂၈ ရက်တွင် ငါးဦးထပ်မံထွက်ပြေးသွားပြီး စုစုပေါင်း ဆယ်ဦးထိ ရှိပြီဖြစ်သည် ဟု ရခိုင်ပြည်နယ် အစိုးရအဖွဲ့ အတွင်းရေးမှူး ဦးတင်မောင်ဆွေက ဆိုသည်။

မောင်တောနယ်စပ်တွင် ဖမ်းဆီးမိသော လှေစီးရွှေ့ပြောင်းဒုက္ခသည် များနှင့် ဟိုင်းကြီးကျွန်းမှ ဖမ်းဆီးမိသော အမျိုးသမီးနှင့် ကလေးတချို့ကို တောင်ပြိုလက်ဝဲမြို့နယ်တွင် ယာယီစိစစ်ရေး စခန်းဖွင့်ကာ ထားရှိစစ်ဆေးနေခြင်းဖြစ်သည်။

ရခိုင်ပြည်နယ် အစိုးရအဖွဲ့ အတွင်းရေးမှူး ဦးတင်မောင်ဆွေက "အဲဒီဘက်က ဘင်္ဂလားဒေ့ရှ်နဲ့ နီးတော့ ထွက်ပြေးသွားကြ တာ ဖြစ်နိုင်တယ်၊ ဘယ်လိုပုံစံနဲ့ ထွက်ပြေးတာ အတိအကျတော့မပြောနိုင်ဘူး၊ စုစုပေါင်း ဆယ်ယောက်ရှိပြီ"ဟု ပြောသည်။

ထိုစိစစ်ရေးစခန်းကို မောင်တောနယ်ခြားစောင့်ရပ်တပ်ဖွဲ့က ကြီးကြပ်စောင့်ထိမ်းခြင်းဖြစ်ပြီး ယာယီ စိစစ်ရေးစခန်းများဖြစ်သဖြင့် လုံခြုံမှုမရှိဟုဆိုသည်။

မောင်တောနယ်ခြားစောင့်ရဲတပ်ဖွဲ့ ဌာနချုပ်မှ တာဝန်ရှိသူ တစ်ဦးက"သူတို့က အချုပ်သားတွေ မဟုတ်တော့ ချုပ်ထားလို့လည်းမရ ဒုက္ခသည်လိုထားရတာ ဒီနေရာက ဘယ်နေရာကြည့်ကြည့်တော ဖြစ်နေတဲ့အတွက် လစ်တဲ့ အချိန်မှာထွက်ကြတာ" ဟု ပြော သည်။

မြန်မာရေပိုင်နက်အတွင်း မေလတွင်းက ရွှေ့ပြောင်း ဒုက္ခသည်များပါဝင်သည့် သင်္ဘော နှစ်စီးကိုဖမ်းမိခဲ့ပြီး စုစုပေါင်း လှေစီးဒုက္ခ သည် ၉၀၀ ကျော်ကို ရခိုင်ပြည်နယ်တွင်ထားရှိစိစစ်ခဲ့သည်။

 ထိုအနက် ၁၈၇ ဦးကို ဘင်္ဂလားဒေ့ရှ် နိုင်ငံသို့ တရားဝင်လွဲပြောင်းထားပြီး ၁၉၅ ဦးမှာ ရခိုင်ပြည်တွင်နေ ထိုင်သူများဖြစ် ကာ သက်ဆိုင်ရာမြို့နယ်များသို့ လွဲပြောင်းနေခြင်းဖြစ်သည်။

 ကျန်ငါးရာကျော်မှာ မိုင်တိုင် ၃၇ တွင် ထားရှိကာ ဘင်္ဂလားဒေ့ရှ် အစိုးရ၏ အတည်ပြုမှုကို ခံယူလျှက်ရှိသည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly