ကုလသမဂ္ဂ လူ့အခွင့်အရေး သုံးသပ်ချက်အပေါ် မြန်မာအစိုးရတုံ့ပြန်ပုံအလွန် စိတ်ပျက်ဖွယ်ရာကောင်းဟု နိုင်ငံတကာ လူ့အခွင့်အရေးအဖွဲ့ချုပ် ထုတ်ပြန်

ကုလသမဂ္ဂ လူ့အခွင့်အရေး သုံးသပ်ချက်အပေါ် မြန်မာအစိုးရတုံ့ပြန်ပုံအလွန် စိတ်ပျက်ဖွယ်ရာကောင်းဟု နိုင်ငံတကာ လူ့အခွင့်အရေးအဖွဲ့ချုပ် ထုတ်ပြန်

မတ်၊ ၁၇ ။           ။ ကုလသမဂ္ဂ၏ မြန်မာနိုင်ငံအပေါ် ဒုတိယမြောက် ကမ္ဘာလုံးဆိုင်ရာ လူ့အခွင့်အရေး အခြေအနေ သုံးသပ်ချက်ကို မကြာမီ အာဏာလွှဲပြောင်းပေးရတော့မည့် မြန်မာအစိုးရ၏တုံ့ပြန်ပုံမှာ အလွန်ပင်စိတ်ပျက်စရာကောင်းကြောင်း နိုင်ငံတကာ လူ့အခွင့်အရေးအဖွဲ့ချုပ် (FIDH) နှင့် ၎င်း၏ အဖွဲ့ဝင်အဖွဲ့အစည်းတစ်ခုဖြစ်သော ALTERSEAN -Burma တို့က ယနေ့ ထုတ်ပြန်လိုက်သော ပူးတွဲကြေညာချက်ထဲတွင် ဖော်ပြထားသည်။

'' လူ့အခွင့်အရေးဆိုင်ရာအကြံပြုထောက်ခံချက်တွေကို လိုက်လံလုပ်ဆောင်ခြင်းမပြုဘဲ ငြင်းပယ်ခဲ့တဲ့ ရာထူးက ထွက်ခွာတော့မယ့် မြန်မာအစိုးရရဲ့ လုပ်ဆောင်ချက်တွေဟာ အလွန်စိတ်ပျက်စရာပါပဲ '' ဟု FIDH ၏ ဥက္ကဌ ကာရင်မ်လာဟစ်ဂျီ က ပြောကြားသည်။

ထို့ပြင် မြန်မာအစိုးရသည် လူ့အခွင့်အရေးနှင့်ပတ်သတ်ပြီး ကုလသမဂ္ဂ၏ ကမ္ဘာလုံးဆိုင်ရာပုံမှန်သုံးသပ်ချက် (UPR) တွင် ညွှန်ကြားထားသည်များကို အပြောသာရှိပြီး အမှန်တကယ်လိုက်နာခဲ့ခြင်း မရှိကြောင်းနှင့် အစိုးရသစ်အနေဖြင့် ထိုအတိတ်ဖြစ်ရပ်များကို ချေဖျက်ကာ ထိရောက်သည့်လုပ်ဆောင်ချက်များ ဆောင်ရွက်ပြရန်လိုအပ်လိမ့်မည်ဟုလည်း ၎င်းက ပြောကြားသည်။

မြန်မာနိုင်ငံအပေါ် ဒုတိယအကြိမ်မြောက် UPR ကို ၂၀၁၅ ခုနှစ်၊ နိုဝင်ဘာလ၊ ၆ ရက်နေ့ကပြုလုပ်ခဲ့သည်။ ထိုသို့ပြုလုပ် ရာတွင် လူ့အခွင့်အရေးနှင့်ပတ်သတ်ပြီး အခြားနိုင်ငံများက အကြံပြုထောက်ပြ ခဲ့သည့် ၂၈၁ ချက် အနက်မှ ၁၆၆ ချက်ကိုသာလက်ခံကြောင်း ၂၀၁၆ ခုနှစ်၊ မတ်လ၊ ၁၀ ရက်နေ့ကထုတ်ပြန်သည့် ကြေညာချက်ထဲတွင် မြန်မာအစိုးရက ဖော်ပြထားသည်။

တိုင်းပြည်အတွင်း လူမျိုးရေးနှင့်ဘာသာရေးကို အခြေခံ၍ ခွဲခြားဆက်ဆံမှုများမရှိကြောင်း မြန်မာအစိုးရကငြင်းဆိုခဲ့ကာ မူစလင်အပါအဝင် လူနည်းစုများအပေါ်တွင် အမုန်းပွားစေသည့် လုပ်ဆောင်ချက် များကို တားဆီးရန်နှင့် ၎င်းတို့၏ ရပိုင်ခွင့် များကို ကာကွယ်ပေးရန်တောင်းဆိုမှုများကို ပယ်ချခဲ့သည်။

ထို့ပြင် မြန်မာအစိုးရက အမျိုးဘာသာကာကွယ်ရေးဥပဒေများကို ပြင်ဆင်ရန်၊ သို့မဟုတ်ဖျက်သိမ်းရန် အကြံပြုထောက်ပြမှု ၁၀ ခုကိုလည်း လက်မခံဘဲငြင်းပယ်ခဲ့သည်။

မူစလင်ရိုဟင်ဂျာများနှင့်ပတ်သတ်၍ ရည်ရွယ်အကြံပြုထောက်ပြချက် ၂၇ ချက်ကိုလည်း မြန်မာအစိုးရက ငြင်းပယ်ခဲ့ကာ လူနည်းစုတိုင်းရင်းသားများ နိုင်ငံသားဖြစ်ခွင့်နှင့်ပတ်သတ်ပြီးတိုက်တွန်းထားသည့် အကြံပြုချက် ၁၆ ချက်ကိုလည်း ပယ်ချခဲ့သည်။

မြန်မာအစိုးရသည် ငြိမ်းချမ်းစွာစီတန်းလှည့်လည်ခွင့်ဥပဒေ ကိုပြင်ဆင်ရန်တိုက်တွန်းထားသည့်အကြံပြုချက်များကိုလည်း ငြင်းပယ်ခဲ့ကာ ထိုဥပဒေဖြင့် တက်ကြွလှုပ်ရှားသများ၊ကျောင်းသားများကို ဆက်လက်ဖမ်းဆီးအရေးယူနေကြောင်းလည်း FIDH ၏ ကြေညာချက်ထဲတွင် ဖော်ပြထားသည်။

မြန်မာအစိုးရကလက်ခံခဲ့သော အကြံပြုတိုက်တွန်းချက်အများစုမှာ နိုင်ငံတကာလူ့အခွင့်အရေးစံနှုန်းများနှင့် ဆက်နွယ်နေသည့် အချက်များဖြစ်ပြီး အမျိုးသမီးများကိုအကြမ်းဖက်ခြင်းနှင့်စပ်လျဉ်း၍ လုပ်ဆောင်ရန် အကြံပြုတိုက်တွန်းချက် ၅ ချက်ကိုလည်း လက်ခံခဲ့သည်ကိုတွေ့ရသည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly