ထိုင်းငါးစည်သွပ် ကုမ္ပဏီထံမှ မြန်မာအလုပ်သမားများ လျော်ကြေး ဒေါ်လာ တစ်သန်းကျော် ရရှိ

ထိုင်းငါးစည်သွပ် ကုမ္ပဏီထံမှ မြန်မာအလုပ်သမားများ လျော်ကြေး ဒေါ်လာ တစ်သန်းကျော် ရရှိ

ထိုင်းနိုင်ငံမှ ပင်လယ်စာလုပ်ငန်းစက်ရုံကြီးတစ်ခုက အလုပ်သမားများအပေါ် အလွဲသုံးစားပြုလုပ်ခြင်းအတွက် လျော်ကြေးအဖြစ် အမေရိကန်ဒေါ်လာ ၁ ဒသမ ၃ သန်းအား အလုပ်သမားများထံ ပေးဆောင်ရန် သဘောတူလိုက်ရကြောင်း တာဝန်ရှိသူတစ်ဦးက မတ် ၁ ရက်က ပြောသည်။ ထိုင်းနိုင်ငံ၏ အရှုပ်အထွေးများ တင်းကြမ်းပြည့်နေသည့် ပင်လယ်စာထုတ်လုပ်သည့် လုပ်ငန်းတွင် ရွှေ့ပြောင်းအလုပ်သမားများအတွက် ရှားရှားပါးပါး အောင်မြင်မှုတစ်ရပ်လည်းဖြစ်သည်။

ကမ္ဘာအနှံ့ ငါးစည်သွပ်ဘူးများ ထုတ်လုပ်ရောင်းချသည့် ကုမ္ပဏီကြီးဖြစ်သော ဆာမတ်ဆတ်ခွန်ရှိ Golden Prize Tuna Canning ကုမ္ပဏီမှ ထောင်နှင့်ချီသည့် မြန်မာအလုပ်သမားများက   ခေါင်းပုံဖြတ်ခိုင်းစေခြင်းခံနေရသည့် လုပ်ငန်းခွင်အခြေအနေအတွက် လျော်ကြေးပေးရန် လများစွာ တောင်းဆိုတိုက်ပွဲဝင်ခဲ့ခြင်းဖြစ်သည်။

ထိုင်းနိုင်ငံသည် ကမ္ဘာ့တတိယအကြီးဆုံး ပင်လယ်စာတင်ပို့သည့် နိုင်ငံဖြစ်သော်လည်း ယင်းလုပ်ငန်း၌ အခွင့်အရေးအလွဲသုံးစားမှုများဖြင့် ဆိုးဝါးသည့် လုပ်ငန်းဖြစ်နေကာ အိမ်နီးချင်းမြန်မာနှင့် ကမ္ဘောဒီးယားတို့က အလုပ်သမားများကို လူမှောင်ခိုကူးမှုများ ရှိနေသည်။

ပြီးခဲ့သည့်နှစ်အတွင်း ထိုင်းက ပင်လယ်စာတင်ပို့မှုများကို တားမြစ်မည်ဟု အီးယူ၏ ခြိမ်းခြောက်ဖိအားပေးမှုနှင့်အတူ နိုင်ငံခြားအစိုးရများ၏ ထိုင်းပင်လယ်စာလုပ်ငန်းကို စေ့စပ်စစ်ဆေးမှုများ တိုးမြှင့်လုပ်ဆောင်လာခဲ့သည်။

အမေရိကန်ကလည်း အတင်းအဓမ္မခိုင်းစေခြင်းများရှိသည့် ဥပဒေဘောင်အပြင်ဖက်မှ ကုန်ထုတ်မှုများအား တားမြစ်မည့် ဥပဒေကြမ်းအား အတည်ပြုခဲ့သည်။ ယင်းဥပဒေက ထိုင်းနိုင်ငံအတွက် ပစ်မှတ်ထားခြင်းတစ်ရပ်လည်းဖြစ်သည်။

Golden Prize ကုမ္ပဏီမှ အလုပ်သမားများက ဥပဒေစည်းမျဉ်းစည်းကမ်းနှင့် မညီသော နည်းပါးသည့် လုပ်ခလစာ၊ အလုပ်ကြပ်များ၏ အလွဲသုံးစားပြုမှုခြင်းများနှင့် ၂၅ ဧကရှိ စက်ရုံဝင်းအတွင်း စက်ပစ္စည်းကိရိယာများကြောင့် ထိခိုက်မှုများအတွက် နစ်နာကြေး ပေးရန် ပျက်ကွက်ခြင်းများအတွက် ရေရှည်တောင်းဆိုလာခဲ့ခြင်းဖြစ်ကြောင်း လှုပ်ရှားတက်ကြွသူများက ပြောသည်။

ပြီးခဲ့သည့် သီတင်းပတ်အတွင်း မြန်မာအလုပ်သမား ၁၀၀၀ ကျော်က ဆန္ဒပြသပိတ်မှောက်လာသည်အထိ ဖြစ်ပွားခဲ့ပြီးနောက် စစ်တပ်တာဝန်ရှိသူများ၊ အစိုးရတာဝန်ရှိသူများနှင့်   ရွှေ့ပြောင်းအလုပ်သမားများ၏ ခေါင်းဆောင်များက ကုမ္ပဏီတာဝန်ရှိသူများနှင့် စေ့စပ်ညှိနှိုင်းမှုများ လုပ်ဆောင်ခဲ့ပြီး ဖေဖော်ဝါရီ ၂၉ ရက်တွင် သဘောတူညီမှု ရရှိခဲ့ခြင်းဖြစ်သည်။

"ကုမ္ပဏီက အလုပ်သမား ၁၁၀၀ ကို နစ်နာမှုလျော်ကြေး ဘတ်ငွေ ၄၈ သန်း(အမေရိကန်ဒေါ်လာ ၁ ဒသမ ၃ သန်း) စတင်ပေးပြီဖြစ်ပါတယ်။"ဟု ပြည်နယ်အလုပ်သမားရုံး အကြီးအကဲ ဘွန်လူးဆတ်ပတ်က ပြောသည်။

မြန်မာအလုပ်သမားအများစုဖြစ်သည့် အလုပ်သမား ၂၀၀၀ ရှိရာ ယင်း Golden Prize Tuna Canning ကုမ္ပဏီက ထင်မြင်ချက်ပေးပြောကြားရန် ငြင်းဆန်ခဲ့သည်။

Mizzima Weekly