ဂူးဂဲလ်မောင်းသူမဲ့ကားက ဘက်စ်ကားကို ၀င်တိုက်မိမှု အစီရင်ခံစာ ပေါ်ထွက်

ဂူးဂဲလ်မောင်းသူမဲ့ကားက ဘက်စ်ကားကို ၀င်တိုက်မိမှု အစီရင်ခံစာ ပေါ်ထွက်

မောင်တိန်ဗြူး၊ မတ်၊ ၁ ။           ။ ပြီးခဲ့သောလအတွင်းက ဖြစ်ပွားခဲ့သည့် ဂူးဂဲလ်မောင်းသူမဲ့ကားက ဘက်စ်ကားတစ်စီးကို ဝင်တိုက်မှုနှင့် ပတ်သတ်သော အစီရင်ခံစာ တနင်္လာနေ့က ထွက်ပေါ်လာခဲ့သည်။

ဖေဖော်ဝါရီလ၊ ၁၄ ရက်နေ့က ကယ်လီဖိုးနီးယားပြည်နယ်၊ မောင်တိန်ဗြူးမြို့ရှိ ဂူးဂဲလ်ရုံးချုပ်အနီးတွင် စမ်းသပ် မောင်းနှင်နေခဲ့သော မောင်းသူမဲ့ကားတစ်စီးက လူအများလိုက်ပါစီးနင်းလာသော ဘက်စ်ကားတစ်စီးကို ဝင်တိုက်မိခဲ့ခြင်း ဖြစ်သည်။

လူတစ်ဦးတစ်ယောက်မျှ ထိခိုက်ဒဏ်ရာ ရရှိခဲ့ခြင်းမရှိသော ယင်းယာဉ်တိုက်မှုတွင် ၎င်းတို့၏ မောင်းသူမဲ့ကားဘက်မှလည်း တာဝန်မကင်းကြောင်း ဂူးဂဲလ်က ဝန်ခံပြောကြားသည်။

ယခင်က ဂူးဂဲလ်၏ မောင်းသူမဲ့ကားများသည် ယာဉ်တိုက်မှုအချို့တွင် ပါဝင်ပတ်သတ်ခဲ့ဖူးသော်လည်း မောင်းသူမဲ့ ကားက အခြားယာဉ်တစ်စီးစီးကို ဝင်တိုက်မိခြင်းမှာမူ ယခုအကြိမ်သည် ပထမဆုံးအကြိမ် ဖြစ်သည်။

ယာဉ်ပေါ်တွင် လူတစ်ဦးလိုက်ပါလာသော မောင်းသူမဲ့ကားသည် တစ်နာရီ ၂ မိုင်နှုန်းဖြင့် မောင်းနှင်လာစဉ် တစ်နာရီ ၁၅ မိုင်နှုန်းဖြင့် မောင်းနှင်လာနေသော ဘက်စ်ကားတစ်စီးကို ဝင်တိုက်မိခဲ့ကြောင်း ဂူးဂဲလ်က ထုတ်ပြန်သည့် အစီရင်ခံစာတွင် ဖော်ပြထားသည်။

ဘက်စ်ကားဘက်ကအရှိန်လျှော့ချမည်ထင်သဖြင့် မောင်းသူမဲ့ကား၏ အလိုအလျောက်မောင်းနှင်စနစ်ကို ဝင်ရောက် ထိန်းချုပ်မှု မပြုလုပ်ခဲ့ကြောင်း မောင်းသူမဲ့ကားပေါ်တွင် လိုက်ပါသူက ပြောကြားထားသည်။

အကယ်၍၎င်းတို့၏ ကားသာမရွေ့ခဲ့ပါက ယာဉ်တိုက်မှုလည်း ဖြစ်မည်မဟုတ်သဖြင့် မောင်းသူမဲ့ကားတွင်လည်း တာဝန်မကင်းသည်မှာထင်ရှားကြောင်း ဂူးဂဲလ်၏ တာဝန်ရှိသူများက ပြောကြားသည်။

သို့ရာတွင် ယာဉ်တိုက်မှုနှင့်ပတ်သတ်ပြီး ဂူးဂဲလ်မှ တာဝန်ရှိသူများသည် မည်သူ့တွင် အပြစ်ရှိသည်ဆိုသည်ကို ကယ်လီဖိုးနီးယားပြည်နယ် စက်တပ်ယာဉ်များဆိုင်ရာဌာနနှင့် တွေ့ဆုံဆွေးနွေးသွားဦးမည် ဖြစ်သည်။

ဂူးဂဲလ်၏ မောင်းသူမဲ့ကားများကို အမေရိကန်ပြည်ထောင်စုတဝမ်းတွင် မိုင်ပေါင်းသန်းနှင့်ချီ၍ စမ်းသပ်မောင်းနှင်မှုများ ပြုလုပ်ခဲ့ပြီးပြီဖြစ်ကာ လက်ရှိအချိန်ထိ အသေးစားယာဉ်တိုက်မှုများသာ ဖြစ်ပွားခဲ့သေးပြီး ယခင်ဖြစ်ခဲ့သမျှ ယာဉ်တိုက်မှုများမှာ အခြားယာဉ်များ၏အမှားကြောင့်သာ ဖြစ်သည်။

Mizzima Weekly