ရန်ကုန်၊ ဖေဖော်ဝါရီ ၁၇ ။           ။ ပြီးခဲ့သည့် ၂၀၁၅ အထွေထွေရွေးကောက်ပွဲတွင် ပြည်သူလူထုက စည်းကမ်းရှိစွာ ပူးပေါင်းဆောင်ရွက်ခဲ့သည့် အတွက် အောင်မြင်ခဲ့ခြင်းဖြစ်ကြောင်း   ပြည်ထောင်စုရွေးကောက်ပွဲ ကော်မရှင်ဥက္ကဋ္ဌ ဦးတင်အေးက ဖေဖော်ဝါရီ ၁၇ရက်တွင် တော်ဝင်နှင်းဆီ၌ ပြုလုပ်သည့် ရွေးကောက်ပွဲမှ ရလာသော ဒီမိုကရေစီ အလေ့အကျင့်ကောင်းများ အလုပ်ရုံဆွေးနွေးပွဲတွင် ပြောကြားလိုက်သည်။

ရွေးကောက်ပွဲတွင် လွတ်လွတ်လပ်လပ် မျှမျှတတ တည်တည်ငြိမ်ငြိမ် အေးချမ်းစွာ ကျင်းပခဲ့ပြီးဖြစ်ကြောင်း၊ နိုင်ငံတကာအနေဖြင့်လည်း ချီးကျူးရသည့် ရွေးကောက်ပွဲဖြစ်သလို   ပြည်သူလူထု၏ ရွေးကောက်ပွဲအပေါ် စိတ်ဝင်စားမှုနှင့် ပူးပေါင်းဆောင်ရွက်မှုကို အံ့သြလေးစားခဲ့ရကြောင်း ဦးတင်အေးက ပြောသည်။

ကျင်းပပြီးစီးခဲ့သည့် ရွေးကောက်ပွဲတွင်  အတွေ့အကြုံ ဗဟုသုတနည်းခဲ့သည့် အတွက် လုပ်ငန်းစဉ် အဆင့်ဆင့်တွင် အားနည်းခဲ့ကြောင်း သို့ဖြစ်၍ ယခုပြုလုပ်သည့် အလုပ်ရုံဆွေးနွေးပွဲမှ အားနည်းချက် အားသာချက်များကို ပွင့်ပွင့်လင်းလင်း ဖော်ထုတ်အကြံပြုရန် တိုက်တွန်းကြောင်း ၎င်းကဆိုသည်။

အဆိုပါ အလုပ်ရုံဆွေးနွေးပွဲတွင် မော်ကွန်းမဂ္ဂဇင်းမှ အယ်ဒီတာဦးဇေယျာလှိုင်၊ PACE မှဒါရိုက်တာ စိုင်းရဲကျော်စွာမြင့်၊ ပြည်ထောင်စုရွေးကောက်ပွဲကော်မရှင်မှ နယ်မြေတာဝန်ခံ ဦးဝင်းကိုကိုတို့က ဦးဆောင်ဆွေးနွေးခဲ့ကြပြီး Moderator အဖြစ် မဇ္ဈိမမီဒီယာမှ အယ်ဒီတာချုပ်ဦးစိုးမြင့်က ဆောင်ရွက်ခဲ့သည်။

အလုပ်ရုံဆွေးနွေးပွဲမှ ရလာသည့် ရလဒ်ကောင်းများကို နောင်လာမည့် ရွေးကောက်ပွဲတွင် အသုံးချသွားမည်ဖြစ်ကြောင်း ဆွေးနွေးပွဲမှ သိရသည်။

ယင်းအလုပ်ရုံဆွေးနွေးပွဲကို အရပ်ဖက်လူ့အဖွဲ့အစည်းများ၊ မီဒီယာများ၊ ပြည်ထောင်စုရွေးကောက်ပွဲမှ တာဝန်ရှိသူများ စုစုပေါင်း ၇၆ဦး တက်ရောက်ခဲ့ကြောင်း သိရသည်။