ဖေဖော်ဝါရီ ၁၀ ၊ ရန်ကုန်။ ။ လာမည့် စင်ကာပူလက်ရွေးစင်အသင်းနှင့် ခြေစမ်းပွဲ၊ ကမ္ဘာ့ဖလားခြေစစ်ပွဲအတွက် ထုတ်ပြန်လိုက်သည့် မြန်မာ့လက်ရွေးစင်အသင်း လူစာရင်းတွင် နိုင်ငံတကာပြိုင်ပွဲ အတွေ့အကြုံရှိသည့်သူများကို ဦးစားပေးရွေးချယ်ခဲ့သည် ဟု လက်ရွေးသင်နည်းပြချုပ် ဂတ်ဇီဆီဖရိုင်းဒရစ်က ဆိုသည်။
အဆိုပါလူစာရင်းတွင် မြန်မာနေရှင်နယ်လိဂ် ကလပ်အသင်းများ၌ နေရာမရသည့် လူငယ်ကစားသမားအများအပြားပါဝင်နေခြင်းကို မြန်မာဘောလုံးပရိသတ်များက ဝေဖန်နေကြသည်။
ယင်းနှင့်ပတ်သက်၍ “အဓိက, ကတော့ ဒီလူစာရင်းက ခြေစွမ်းနဲ့ နိုင်ငံတကာပြိုင်ပွဲအတွေ့အကြုံကို ဦးစားပေးရွေးထားတာပါ။ ယူ-၂၀ က ကစားသမားတွေများတယ် ဆိုတာကလည်း သူတို့က နိုင်ငံတကာအတွေ့အကြုံကောင်းတွေ အများအပြားရှိထားလို့ပါ။
တစ်ချို့ကစားသမားတွေက ကလပ်အသင်းမှာ နေရာမရပေမယ့် သူတို့နဲ့ လက်တွဲဖူးတော့ ခြေစွမ်းကို ယုံကြည်လို့ အခုလိုရွေးချယ်တာပါ။ ဂိုးသမား သီဟစည်သူကို မရွေးပဲ မျိုးမင်းလတ်ကို ရွေးတာကတော့ ဂိုးနည်းပြရဲ့ ရွေးချယ်မှုပါ ” ဟု ဖရိုင်းဒရစ်က ပြန်လည်ဖြေရှင်းခဲ့သည်။
မြန်မာ့လက်ရွေးစင်အသင်း၏ လက်ရှိ ကစားသမား ၂၉ ဦး စာရင်းတွင် ကမ္ဘာ့ဖလားသွားရောက်ယှဉ်ပြိုင်ခဲ့သည့် ယူ-၂၀ အသင်းမှ ကစားသမား ကိုးဦးအထိ ပါဝင်ခဲ့ပြီး ယခုနှစ် မြန်မာနေရှင်နယ်လိဂ်တွင် ခြေစွမ်းပြနေသည့် အောင်မိုး၊ သီဟစည်သူ အစရှိသူတို့ ပါဝင်ခြင်းမရှိပဲ ဒဏ်ရာကြောင့်ကာလရှည်ကြာနားနေရသည့် ငြိမ်းချမ်းအောင်မှာမူ ပါဝင်လာခဲ့သည်။
မြန်မာအသင်းသည် မတ်၂၃ တွင် စင်ကာပူလက်ရွေးစင်အသင်းနှင့် စင်ကာပူနိုင်ငံတွင် ခြေစမ်းကစားမည် ဖြစ်ပြီး မတ် ၂၉ တွင် လက်ဘနွန်အသင်းနှင့် ကမ္ဘာ့ဖလားခြေစစ်ပွဲ အုပ်စုနောက်ဆုံးပွဲအဖြစ် အဝေးကွင်းတွင် သွားရောက်ယှဉ်ပြိုင်ကစားရမည် ဖြစ်သည်။