ကွာလာလမ်ပူ၊ ဖေဖော်ဝါရီ ၂ ။ ။ မလေးရှားတွင် နိုင်ငံခြားသားအလုပ်သမားများအတွက် အခွန်စည်းကြပ်ငွေကို တိုးမြှင့်ပြီး တစ်ချို့အလုပ်သမားများတွင် စည်းကြပ်ငွေ နှစ်ဆတိုးမြှင့်ကောက်ခံ ပြီဖြစ်သည်။
ဖေဖော်ဝါရီ ၁ ရက်တွင် ယင်းစည်းကြပ်ခွန်ကို စတင်ကောက်ခံပြီး ကုန်ထုတ်လုပ်ငန်းများနှင့် ဆောက်လုပ်ရေးလုပ်ငန်းများက အလုပ်သမားများက ယခင် ရင်းဂစ် ၁၂၅၀ ပေးဆောင်ရရာမှ ၂၅၀၀ အထိ တိုးမြှင့်ပေးရမည်ဖြစ်သည်။
ဝန်ဆောင်မှုလုပ်ငန်းများမှ အလုပ်သမားများမှာလည်း အလားတူပမာဏပင် ပေးရမည်ဖြစ်ပြီး ယခင်က ၁၈၅၀ ရင်းဂစ် ကောက်ခံခဲ့ရာမှ ၂၅၀၀ သို့ တိုးမြှင့်ခြင်းဖြစ်သည်။
စိုက်ပျိုးရေးလုပ်ငန်းများက ပြည်ပအလုပ်သမားများကို ရင်းဂစ် ၁၅၀၀ ကောက်ခံမည်ဖြစ်သည်။
နိုင်ငံခြားသားပြည်တွင်းအလုပ်သမားများအတွက် ရင်းဂစ် ၄၁၀ ကိုပဲ ဆက်လက်ကောက်မည်ဖြစ်သည်။ ယခုကဲ့သို့ ပြည်ပအလုပ်သမားများအား စည်းကြပ်ခွန်တိုးမြှင့်ကောက်ခံခြင်းဖြင့် အစိုးရဘဏ္ဍာသို့ ထပ်တိုးဘဏ္ဍာငွေ ၂ ဒသမ ၅ ဘီလီယံ ရရှိစေရန် ပြင်ဆင်ကောက်ခံခြင်းဖြစ်ကြောင်း ဒုတိယဝန်ကြီးချုပ် ဒေါက်တာအာမတ်ဇာဟစ်ဟာမီဒီက ဇန်နဝါရီ ၃၁ ရက်က ကြေညာခဲ့ခြင်းဖြစ်သည်။
ပြည်ပအလုပ်သမားများထံ စည်းကြပ်ခွန်နှုန်းသစ်ကောက်ခံခြင်းသည် ပြီးခဲ့သည့် သီတင်းပတ်က မလေးရှားဝန်ကြီးချုပ် ကြေညာခဲ့သည့် ဘတ်ဂျတ်အသုံးစရိတ်ကို ပြန်လည်ချိန်ညှိခြင်းလည်းဖြစ်သည်။
စည်းကြပ်ခွန်ပြင်ဆင်ကောက်ခံခြင်းသည် မှတ်ပုံတင်ရှိ ပြည်ပအလုပ်သမား ၂ ဒသမ ၁၃၅ သန်းအတွက်လည်း မလေးရှားနိုင်ငံသားများ ခံစားရသည့် စားနပ်ရိက္ခာထောက်ပံ့ငွေနှင့် အခြားဝန်ဆောင်မှုများ ကို ခံစားရစေမည်ဖြစ်ကြောင်း အာမတ်ဇာဟစ်က ပြောသည်။
“စည်းကြပ်ခွန်ပြင်ဆင်ကောက်ခံခြင်းက နိုင်ငံတွင်းက ပြည်ပအလုပ်သမားများကို ထိန်းချုပ်စီမံခန့်ခွဲနိုင်မှု ပိုမိုကောင်းမွန်စေမှာလည်းဖြစ်ပါတယ်။”ဟု ဆာရာဝတ်နည်းပညာတက္ကသိုလ်သို့ ဖေဖော်ဝါရီ ၁ ရက်က ရောက်ရှိစဉ် သတင်းစာရှင်းလင်းပွဲ ပြုလုပ်ရာ၌ အာမတ်က ပြောကြားခဲ့သည်။
ယခုစည်းကြပ်ခွန်သည် အမျိုးသားစီးပွားရေးမျှော်မှန်းချက်လည်းဖြစ်ပြီး နိုင်ငံတကာအဆင့်နှင့် လည်းအညီဖြစ်သည်ဟု ဒေါက်တာအာမတ်ဇာဟစ်က ပြောကြားခဲ့သည်။
