ကန်ဒေါ်လာ ရ.၆ ဘီလျံ လိမ်လည်မှုတွင် ပါ၀င်ပတ်သက်သူ ၂၁ ယောက်ကို တရုတ်အာဏာပိုင်များ ဖမ်းဆီး

ကန်ဒေါ်လာ ရ.၆ ဘီလျံ လိမ်လည်မှုတွင် ပါ၀င်ပတ်သက်သူ ၂၁ ယောက်ကို တရုတ်အာဏာပိုင်များ ဖမ်းဆီး

ပေကျင်း၊ ဖေဖော်ဝါရီ - ၁ ။              ။ ရင်းနှီးမြှုပ်နှံသူ ၉၀၀၀၀၀ ထံမှ ယွမ်ငွေ ၅၀ ဘီလျံ (ကန်ဒေါ်လာ ၇.၆ ဘီလျံ )ကို လိမ်လည်ခဲ့သည်ဟု သံသယရှိရသည့် အွန်လိုင်း ရံပုံငွေအစီအစဉ်တစ်ခုတွင် ပါဝင် ပတ်သက်နေသူ ၂၁ ယောက်ကို တရုတ်အာဏာပိုင်များက ဖမ်းဆီးခဲ့သည်။ အဆိုပါ ၂၁ယောက်မှာ တရုတ် နိုင်ငံပိုင်မီဒီယာတွင် ပေါင်ရှီအစီအစဉ်ဟု ကျယ်ကျယ်ပြန့်ပြန့် ဖော်ပြနေသည့် ငွေချေးကုမ္ပဏီ အီရှူပေါင်အတွက် အလုပ်လုပ်ပေးနေသူများပင် ဖြစ်သည်။

အီရှူပေါင်မှာ တရုတ်နိုင်ငံ၏ အကြီးဆုံး ငွေချေးလုပ်ငန်းတစ်ခုအဖြစ် ယူဆထားကြသည်။ စုံစမ်းစစ်ဆေးမှုများအရ ဝက်ဘ်ဆိုက်ပေါ်တွင် ကမ်းလှမ်းထားသည့် ရင်းနှီးမြှုပ်နှံမှုများ၏ ၉၅ ရာခိုင်နှုန်းကျော်မှာ အတုများဖြစ်ကြောင်း တွေ့ရှိရသည်ဟု နိုင်ငံပိုင်မီဒီယာက ပြောကြားခဲ့သည်။  

တရုတ်ရုပ်သံက အန်ဟွီပြည်နယ်တွင် အခြေစိုက်သည့် ကုမ္ပဏီမှ ဝန်ထမ်းဟောင်းနှစ်ဦး၏ ဝန်ခံချက်များဟု ယူဆရသည်များကို ထုတ်လွှင့်သွားခဲ့သည်။

အီရှူပေါင်ကို ၂၀၁၄ခုနှစ်တွင် အဖမ်းခံရသူများထဲတွင် တစ်ယောက်အပါအဝင်ဖြစ်သည့် Yucheng Group ကုမ္ပဏီ၏ ဥက္ကဌ ဒင်းနင်းက စတင်ခဲ့သည်ဟု သတင်းများတွင် ဖော်ပြထားသည်။

လူအများက ၎င်းတို့၏ ဥစ္စာဓနများကို အလျင်အမြန် တိုးပွားလိုလာကြရာ တရုတ်နိုင်ငံ၏ ကြီးထွားလာနေသည့် လူလတ်တန်းစားမှာ အွန်လိုင်း ရင်းနှီးမြှုပ်နှံမှု အစီအစဉ်များအပေါ် တိုး၍ စိတ်ဝင်စားလာနေကြသည်။

သို့ရာတွင် အာဏာပိုင်များမှာမူ ကန်ဒေါ်လာ ၂.၅ ထရီလျံကျော်ဖိုးရှိမည်ဟု ခန့်မှန်းရသည့် ဓနဥစ္စာ စီမံခန့်ခွဲမှုနယ်ပယ်ကို ထိန်းကျောင်းရန် ရုန်းကန်နေကြရသည်။

ပေါင်ရှီအစီအစဉ်မှာ ရေတိုရင်းနှီးမြှုပ်နှံမှုများအပေါ်တွင် မြင့်မားသော အမြတ်အစွန်းများကို ပေးနေသောကြောင့် လိမ်လည်သော ရင်းနှီးမြှုပ်နှံမှုလုပ်ငန်းအဖြစ် ယူဆနေကြသည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly