အယ်လ်နီညို ဆက်လက်အားကောင်းမယ်

29 January 2016
အယ်လ်နီညို ဆက်လက်အားကောင်းမယ်

တစ်ပတ်အတွင်း မိုးလေဝသသ ခန့်မှန်းချက်များကို မိုလေဝသပညာရှင် ဒေါက်တာ ထွန်းလွင်နှင့် တွေ့ဆုံမေးမြန်းလျက် အပတ်စဉ် သောကြာနေ့တိုင်း မဇ္ဈိမက တင်ပြလျက် ရှိပါတယ်။  ဒီတစ်ပတ် တင်ပြချက်ကတော့ ဇန်နဝါရီ ၃၀ ရက်ကနေ ဖေဖော်ဝါရီ ၅ရက် အထိ ခန့်မှန်းချက်ပဲ ဖြစ်ပါတယ်။

နိုင်ငံတဝှမ်း အပူချိန်

မြန်မာနိုင်ငံမှာ လက်ရှိဖြစ်ပေါ်နေတဲ့ နေ့အပူချိန်တွေဟာ မြန်မာနိုင်ငံ မြောက်ဘက်စွန်း ကချင်ပြည်နယ် မြောက်ဖျားစွန်းကနေပြီးတော့ တောင်ဘက် တနင်္လာရီတိုင်း တောင်ဖျားစွန်းအထိ အပူချိန်ကို အကြမ်းအားဖြင့် ၆မျိုး ခွဲခြား ဖော်ပြလို့ ရနေပါတယ်။ မြန်မာနိုင်ငံရဲ့မြောက်ဘက်စွန်း ကချင်ပြည်နယ်ရဲ့ မြောက်ဘက်စွန်း ဒေသတွေမှာ အပူချိန်တွေဟာ နေ့အပူချိန် သုညဒီဂရီမှာ ၅ ဒီဂရီစင်တီဂရိတ်လောက်ထိ ကျဆင်းနေတာ တွေ့ရပါတယ်။ ဒါပေမယ့် ဒီဒေသဟာ အများအားဖြင့် လူနေရပ်ကွက် မဟုတ်ဘဲနဲ့ တောင်တန်းဒေသတွေပဲ ဖြစ်တာများပါတယ်။ အဲဒီဒေသရဲ့ တောင်ဘက် ကချင်ပြည်နယ် စစ်ကိုင်းတိုင်း အထက်ပိုင်း စတဲ့ ဒေသတွေမှာ နေ့အပူချိန်တွေဟာ ၅ ဒီဂရီမှ ၁၀ ဒီဂရီစင်တီဂရိတ်လောက်ထိ ရှိနေပါတယ်။ အဲဒီကနေ အောက်ဘက် တောင်ဘက်ကို ဆင်းလာမယ် ဆိုရင်တော့ စစ်ကိုင်းတိုင်း အောက်ပိုင်း ရှမ်းပြည်နယ် စတဲ့ ဒေသတွေမှာ နေ့အပူချိန်ဟာ ၁၅ ဒီဂရီမှ ၂၀ ဒီဂရီစင်တီဂရိတ်လောက်ထိ ရှိနေပြီးတော့ အဲဒီမှတစ်ဆင့် တောင်ဘက်ဒေသတွေ   ဖြစ်တဲ့ မြန်မာနိုင်ငံ အလယ်ပိုင်း မကွေးတိုင်း၊ မန္တလေးတိုင်း၊ ရခိုင်ပြည်နယ်မြောက်ပိုင်း၊ ချင်းပြည်နယ် တောင်ပိုင်း၊ ကယားပြည်နယ်၊ ကရင်ပြည်နယ်၊ ပဲခူးတိုင်းမြောက်ပိုင်း စတဲ့ဒေသတွေမှာတော့ နေ့အပူချိန်တွေဟာ ၂၀ ဒီဂရီမှ ၂၅ ဒီဂရီစင်တီဂရိတ်လောက်ထိ ရှိပါတယ်။ အဲဒီနောက် မြစ်ဝကျွန်းပေါ် ဒေသတွေ မွန်ပြည်နယ်၊ ကရင်ပြည်နယ်စတဲ့ဒေသတွေမှာ   နေ့အပူချိန်တွေဟာ အကြမ်းအားဖြင့် ၂၅ မှ ၃၀ လောက်ရှိနေပြီးတော့ တနင်္သာရီတိုင်းရဲ့ တောင်ဘက်စွန်းမှာတော့ နေ့အပူချိန်တွေဟာ ၃၀ မှ ၃၅ ဒီဂရီစင်တီဂရိတ်လောက်ထိ အပူချိန်တွေ ရှိပါတယ်။

ညအပူချိန်တွေ

ညအပူချိန်တွေ အနေနဲ့လည်း အကြမ်းအားဖြင့် မြန်မာနိုင်ငံ မြောက်ဖျားစွန်းကနေ တောင်ဖျားစွန်းအထိ အမျိုးစား ၆ မျိုးလောက် တွေ့နေရပါတယ်။ မြန်မာနိုင်ငံရဲ့ မြောက်ဘက်အစွန်ဆုံး ဒေသတွေမှာ ညအပူချိန်တွေဟာ ရေခဲမှတ်ရဲ့အောက် ၅ ဒီဂရီစင်တီဂရိတ်လောက်ထိ ကျဆင်းနေပြီးတော့ မြန်မာနိုင်ငံရဲ့ တောင်ဘက် အစွန်ဆုံး ဒေသတွေမှာတော့ ညအပူချိန်တွေဟာ ၂၀ ဒီဂရီမှ ၂၅ ဒီဂရီစင်တီဂရိတ်လောက်ထိ ရှိနေတဲ့အတွက် အကြမ်းအားဖြင့် ညအပူချိန် တောင်မြောက် ကွာခြားမှုဟာ ၃၀ ဒီဂရီစင်တီဂရိတ်လောက် ရှိပါတယ်။ မြစ်ဝကျွန်းပေါ်ဒေသတွေ ဧရာဝတီတိုင်း၊ ပဲခူးတိုင်း၊ ရန်ကုန်တိုင်း၊ ကရင်ပြည်နယ်၊ မွန်ပြည်နယ်၊ ကယားပြည်နယ်၊ ရခိုင်ပြည်နယ်၊ မကွေးတိုင်းတောင်ပိုင်းစတဲ့ အများအားဖြင့် မြေပြန့်ဒေသတွေ ဖြစ်တဲ့ မြေလတ်ပိုင်းနှင့် မြစ်ဝကျွန်းပေါ်ဒေသတွေမှာတော့ အပူချိန်တွေဟာ အကြမ်းအားဖြင့် ၁၀ ဒီဂရီမှ ၁၅ ဒီဂရီစင်တီဂရိတ်လောက် ရှိနေတဲ့အတွက် လောလောဆယ်မှာတော့ ညအပူချိန် အနည်းငယ် ပြန်လည် ကျဆင်းနေတာကို တွေ့ရပါတယ်။

မိုးရွာသွန်းမှု အခြေအနေ

မိုးရွာသွန်းမှု အနေနဲ့တော့ တစ်ပြည်လုံးလိုလို မိုးရွာသွန်းမှု အနည်းဆုံးလောက် ရှိနေပါတယ်။ ဒါပေမယ့် ရံဖန်ရံခါမှာတော့ ရှမ်းပြည်နယ် အရှေ့ပိုင်းနှင့် တနင်္သာရီတိုင်းတို့မှာ မိုးအနည်းငယ် ရွာသွန်းမှု ရှိပါတယ်။

ခရမ်းလွန်ရောင်ခြည် အညွှန်းကိန်းများ အနေနဲ့တော့ မြန်မာနိုင်ငံမှာ နှစ်မျိုးတွေ့နေရပါတယ်။ မြန်မာနိုင်ငံရဲ့ အနောက်ဘက်တစ်ခြမ်းမှာ ခရမ်းလွန်ရောင်ခြည် အညွှန်းကိန်း တန်ဖိုးတွေဟာ အလွန်မြင့်မားတဲ့ အဆင့်ကို ရောက်နေပြီး အရှေ့ဘက်ခြမ်းမှာတော့ အရမ်းလွန်ရောင်ခြည် Hight လို့ခေါ်တဲ့ မြင့်တဲ့အဆင့်မှာ ရောက်လို့နေတာ တွေ့ရပါတယ်။

တစ်ပတ်အတွင်း ခန့်မှန်းချက်များ

လာမယ့်တစ်ပါတ်အတွက် မိုးလေဝသ ခန့်မှန်းချက်များ အနေနဲ့တော့ နေ့အပူချိန်များအား အထူးသဖြင့် မြန်မာနိုင်ငံ မြောက်ပိုင်း ဖြစ်တဲ့ စစ်ကိုင်းတိုင်းအထက်ပိုင်း ကချင်ပြည်နယ်တွေမှာ လာမယ့်တစ်ပါတ်အတွက် နေ့အပူချိန်တွေဟာ ပုံမှန်ရဲ့အထက် အနည်းဆုံး ၄ ဒီဂရီမှ ၆ ဒီဂရီစင်တီဂရိတ်လောက်ထိ ပိုနိုင်ပါတယ်။ တောင်ပိုင်းဒေသဖြစ်တဲ့ တနင်္သာရီတိုင်းမှာတော့   နေ့အပူချိန်တွေဟာ ဖြစ်မြဲရဲ့အထက် ၂ ဒီဂရီမှ ၃ ဒီဂရီလောက် ပိုနိုင်ပြီး ရှမ်းပြည်နယ်မှာတော့ နေ့အပူချိန်တွေဟာ ဖြစ်မြဲရဲ့အောက် ၁ ဒီဂရီမှ ၃ ဒီဂရီလောက်ထိ လျော့နည်းနိုင်ပါတယ်။

မိုးရွာသွန်းမှု အနေနဲ့တော့ လာမယ့် တစ်ပါတ်လုံးမှာ အဓိကအားဖြင့် ရှမ်းပြည်နယ်၊ ကယားပြည်နယ်၊ ကရင်ပြည်နယ်၊ မွန်ပြည်နယ်၊ မန္တလေးတိုင်း၊ မြစ်ဝကျွန်းပေါ်ဒေသများဖြစ်တဲ့ ဧရာဝတီတိုင်း၊ ပဲခူး၊ ရန်ကုန် စတဲ့ဒေသတွေမှာ အနည်းဆုံး ၂ရက်မှ ၃ရက်ခန့် နေရာကွက်ကျားမှ နေရာကျဲကျဲ မိုးထက်ချုန်း ရွာသွန်းနိုင်ပါတယ်။ ဒီလိုရွာသွန်းမှုဟာ အထူးသဖြင့် ရှမ်းပြည်နယ်၊ မန္တလေးတိုင်း တောင်ပိုင်း၊ ပဲခူးတိုင်း၊ ဧရာဝတီတိုင်း၊ ရန်ကုန်တိုင်း၊ ကယားပြည်နယ် စတဲ့ဒေသတွေမှာ ပုံမှန် ရွာသွန်းမြဲ မိုးရေချိန်များရဲ့ အထက် ကျော်လွန်နိုင်တယ်လို့ ခန့်မှန်းရရှိထားပါတယ်။

ညအပူချိန်ခန့်မှန်းချက်များအနေနဲ့တော့ မြန်မာနိုင်ငံမှာ အပူချိန် အကြမ်းအားဖြင့် သုံးမျိုးသုံးစား တွေ့မြင်ရပြီးတော့ မြန်မာနိုင်ငံ အထက်ပိုင်းနှင့် မြောက်ပိုင်းဒေသတွေမှာ ညအပူချိန်တွေဟာ ရေခဲမှတ်ရဲ့အောက် အနှုတ် ၁၀ ဒီဂရီစင်တီဂရိတ်မှ ၈ဒီဂရီစင်တီဂရိတ်ခန့်အထိ အပူချိန်များ ရှိနေပါတယ်။ မြစ်ဝကျွန်းပေါ်ဒေသများနှင့် မြန်မာနိုင်ငံ တောင်ပိုင်းတွေမှာတော့ ၂၀ ဒီဂရီမှ ၂၄ ဒီဂရီစင်တီဂရိတ်လောက်ထိ ရှိနေပြီးတော့ ကျန်ဒေသ အများအပြားမှာတော့ ၈ ဒီဂရီမှ ၂၀ ဒီဂရီစင်တီဂရိတ်ခန့်အထိ ညအပူချိန်များ ရှိနိုင်တယ်လို့ ခန့်မှန်းရရှိထားပါတယ်။

ထူးခြားဖြစ်စဉ်များ

အထူးတင်ပြလိုတဲ့ အချက်တစ်ခုကတော့ ပြီးခဲ့တဲ့ ဇန်နဝါရီလရဲ့ ဒုတိယ အပတ်ဖြစ်တဲ့ ဇန်နဝါရီလ ၁၁ မှ ဇန်နဝါရီလ ၂၀ ရက်နေ့အထိ ကြာမြင့်တဲ့ ၁၀ ရက်အတွင်းမှာ မြန်မာတစ်နိုင်ငံလုံးမှာ   မြန်မာနိုင်ငံရဲ့ တောင်ဘက် အစွန်းမှာ ရှိတဲ့ ကော့သောင်းမြို့မှာ မိုးရွာသွန်းမှု ပုံမှန်ထက် ကျော်လွန်ခဲ့ပြီး ကျန်ဒေသအားလုံးမှာ မိုး လုံးဝ မရွာသွန်းတာကို တွေ့ခဲ့ရပါတယ်။ ဒီလို မိုးလျော့နည်းနေတာဖြင့် ဒီနှစ်အဖို့ ရက်ကာလ အတော်ကြာပြီ ဖြစ်ပါတယ်။ အဲတာကြောင့်မို့လဲ အခုရက်များအတွင်းမှာ မြန်မာနိုင်ငံ ထိုင်းနယ်စပ်တစ်လျောက်မှာ ရေရှားပါးမှုများ ကြုံတွေ့နေရပြီး သောက်သုံးရေများကို လူအများက အများအပြား ဝယ်ယူစုဆောင်း နေတယ်ဆိုတဲ့ သတင်း များလည်း ကြားသိနေရခြင်း ဖြစ်ပါတယ်။

အယ်နီညို ဆက်လက်အားကောင်း

အယ်နီညိုဟာ ဆက်လက် ဖြစ်ပေါ်နေပြီး အားကောင်းနေဆဲပဲ ဖြစ်ပါတယ်။ ဒီနှစ် အကြမ်းအားဖြင့် ဇွန် လအထိ အယ်နီညိုရဲ့ အင်အားရှိနိုင်တဲ့ အတွက် မြန်မာနိုင်ငံအနေနဲ့ ဆောင်းရာသီ၊ နွေရာသီ မိုးကြိုရာသီ၊ မိုးဦးရာသီ စတဲ့ ရာသီများအပေါ်မှာ အယ်နီညိုရဲ့ ထိခိုက်မှုများ ရှိလာနိုင်တယ်လို့ ခန့်မှန်း ရရှိပါတယ်။ နောက်ဆုံး တင်ပြလိုတဲ့ အချက်ကတော့ လာမယ့် တစ်ပါတ်မှာ မြန်မာနိုင်ငံတစ်ဝန်းမှာ အများအားဖြင့် မိုးရွာသွန်းနိုင်ပါတယ်။ ညအပူချိန်များလည်း ပြီးခဲ့တဲ့ရက်များနဲ့ နှိုင်းစာရင် ပိုမိုကျဆင်း လာဖွယ်ရာ ရှိပါတယ်။ အထူးသဖြင့် မိုးရွာသွန်းမှုများကို ရှမ်းပြည်နယ်၊ ကယားပြည်နယ်၊ မွန်ပြည်နယ်၊ မန္တလေးတိုင်း၊ ပဲခူးတိုင်း၊ ဧရာဝတီတိုင်း၊ ရန်ကုန်တိုင်း၊ စတဲ့ဒေသတွေမျာ အနည်းဆုံး နှစ်ရက်မှ ၃ရက်ခန့် အများအားဖြင့် ကြုံတွေ့နိုင်တယ်လို့ ခန့်မှန်း ရရှိထားပါကြောင်း တင်ပြအပ်ပါတယ်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly